Luka 21

₁Loko Yesu a tlakusa mahlo, a vona swifumi leswi hoxaka tinyiko ta swona exibyeni xa nhlengo wa Tempele. ₂A vona ni noni leyi a yi ri xisiwana, yi hoxa swimalana swimbirhi leswi lavaka ku ringana sente ntsena. ₃Kutani a ku: “Hakunene ndzi ri ka n'wina: Noni leyi ya xisiwana yi humesile ku tlula hinkwavo; ₄hikuva vanhu lava hinkwavo va humesile tinyiko leti va ti pambuleke exumeni xa vona lexo tala, kasi wansati loyi ú humesile swa vusiwana bya yena, swi nga hinkwaswo leswi a a ta hanya ha swona.”

₅Van'wana a va vulavula hi Tempele, va khumba ta ku sasekisiwa ka yona hi maribye layo saseka ni tinyiko ta vagandzeri; kutani Yesu a ku: ₆“Loko swi ri leswi mi swi vonaka, ku ta ta masiku lawa ku nga ta ka ku nga ha sali ribye ehenhla ka ribye rin'wana; hinkwawo ma ta hindzimuxiwa.”

₇Kutani va vutisa Yesu, va ku: “Mudyondzisi, timhaka leti ti ta humelela rini xana? Xana xikombiso xi ta va xihi xa leswaku ti lava ku humelela ke?” ₈Kutani Yesu a ku: “Tivoneleni leswaku mi nga xisiwi, hikuva lavo tala va ta ta hi vito ra mina, un'wana ni un'wana a ku: ‘Mina ndzi yena’, ni leswaku ‘nkarhi wu fikile’! Mi nga va landzi! ₉Loko mi twa huwa ya tinyimpi ni ya mikitsikitsi, mi nga tshuki mi chava, hikuva sweswo swi fanele ku rhanga swi humelela, kambe makumu wona ma ta hlwela ku fika.”

₁₀Yesu a engeta a ku ka vona: “Tiko rin'wana ri ta pfukela rin'wanyana, mfumo wun'wana wu ta lwa ni wun'wanyana; ₁₁ku ta va ni ku tsekatseka ka misava; mintungu ni tindlala swi ta va kona ematlhelweni layo tala; ku ta humelela ni swilo leswi chavisaka ngopfu, ni masingita lamakulu lama humaka etilweni.

₁₂“Kambe loko swilo leswi hinkwaswo swi nga si va kona, va ta mi khoma, va mi xanisa, va mi nyiketa emasinagogeni ne makhotsweni, va mi yisa emahlweni ka tihosi ni ka tindhuna hikwalaho ka vito ra mina; ₁₃wu ta va wona nkarhi wa n'wina wo humesa vumbhoni. ₁₄Hikokwalaho swi vekeni emiehleketweni ya n'wina leswaku a mi nga tikarhati ku pfa mi lulamisile leswi mi nga ta hlamurisa swona, ₁₅hikuva mina ndzi ta mi nyika marito ya vutlhari lawa valala va n'wina hinkwavo va nga ta tsandzeka ku lwa na wona ni ku ma kaneta. ₁₆Mi ta nyiketiwa hi vatswari va n'wina, ni vamakwenu, ni maxaka, ni vanakuloni; va ta dlaya van'wana va n'wina; ₁₇mi ta vengiwa hi vanhu hinkwavo hikwalaho ka vito ra mina. ₁₈Kambe a ku nga lovi hambi wu ri nsisi ni wun'we wa tinhloko ta n'wina; ₁₉hi ku tiyisela ka n'wina, mi ta tikumela vutomi.

₂₀“Kutakuloko mi vona muti wa Yerusalema wu rhendzeriwile hi mavuthu ya valala, tivani leswaku ku hangalasiwa ka wona ku kusuhi. ₂₁Hi nkarhi wolowo, lava nge Yudiya, a va tsutsumele etintshaveni; lava nga mutini, a va hume ka wona; kutani lava nge handle etikweni, va nga tshuki va nghena emutini. ₂₂Masiku walawo ma ta va masiku ya ku avanyisiwa, leswaku hinkwaswo leswi nga matsalweni swi hetiseka. ₂₃Va ta va ni khombo vavasati lava tikeke ni lava mamisaka eminkarhini yoleyo, hikuva ku xaniseka lokukulu ku ta va kona emisaveni, ni vukari bya Xikwembu byi ta wela vanhu lava. ₂₄Va ta dlawa hi fumu, va ta yisiwa va ri mahlonga ematikweni hinkwawo; kutani muti wa Yerusalema wu ta kandziyeriwa hi vamatiko ku kondza loko minkarhi ya vona yi ta va yi herile.

₂₅“Masingita ma ta va kona edyambyini, ni le n'wetini, ni le tinyeletini. Laha misaveni, matiko ma ta hela ntamu, ma tshukisiwa hi ku pfuma ka lwandle ni ka magandlati. ₂₆Vanhu va ta titivala hi ku chava ni ku ehleketa leswi nga ta humelela la misaveni, hikuva leswa matimba swa le matilweni swi ta dzinginisiwa. ₂₇Hi kona va nga ta vona N'wana-wa-Munhu a ta hi papa, a ri ni matimba ni ku kwetsima lokukulu. ₂₈Loko swilo sweswo swi sungula ku humelela, ololokani, mi languta henhla, hikuva ku kutsuriwa ka n'wina ku kusuhi.”

₂₉Kutani a va byela xifaniso a ku: “Langutani murhi wa nkuwa ni mirhi hinkwayo; ₃₀loko mi yi vona yi hluka, ma swi tiva na n'wina leswaku ximumu xi le kusuhani. ₃₁Hi mukhuva wolowo, loko mi vona swilo sweswo swi humelela, mi ta tiva leswaku Mfumo wa Xikwembu wu le kusuhi. ₃₂Ndzi tiyisile ndzi ri ka n'wina, rixaka leri ri nga ka ri nga hundzi, ku nga si humelela swilo leswi hinkwaswo. ₃₃Tilo ni misava swi ta hundza, kambe marito ya mina ma nga ka ma nga hundzi.

₃₄“Tivoneleni leswaku timbilu ta n'wina ti nga tikeriwi hi makolo ni ku pyopyiwa, ni ku vilela hi swa vutomi lebyi, na swona tivoneleni leswaku siku rero ri nga mi tshuketi; ₃₅hikuva, kukotisa xirimbani, ri ta wela hinkwavo lava akeke emisaveni hinkwayo. ₃₆Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N'wana-wa-Munhu.”

₃₇Ninhlekanhi Yesu a a tshama a dyondzisa eTempeleni, kambe nimadyambu a a huma, a ya etlela entshaveni leyi vuriwaka ya Mitlhwari. ₃₈Loko ri xa, tiko hinkwaro a ri vindzuka ri ta ka yena eTempeleni ku ta n'wi yingisa.