Luka 7

₁Loko Yesu a hetile ku dyondzisa vanhu swilo leswi hinkwaswo, a nghena eKapernawume. ₂A ku ri ni ndhuna ya dzana ra masocha kona; a yi ri ni nandza loyi yi n'wi rhandzaka ngopfu, kambe nandza loyi a a vabya, a ri kusuhi ni ku fa. ₃Loko ndhuna yi twa ta Yesu, yi rhuma vakulukumba van'wana va Vayuda eka yena, va ya n'wi khongela leswaku a ta, a ta hanyisa nandza wa yona. ₄Loko va fika eka Yesu, va n'wi khongela ngopfu, va ku: “Swa n'wi fanela leswaku a endleriwa sweswo, ₅hikuva ú rhandza va ka hina, naswona ú hi akele sinagoga.” ₆Kutani Yesu a famba na vona. A a fikile kusuhi ni kaya ka ndhuna loko yona yi rhuma vanakulobye, va ya n'wi byela, va ku: “Hosi, u nga tikarhati ku ta fika la, hikuva a swi ndzi fanelanga leswaku u nghena endlwini ya mina. ₇Na mina ke, a ndzi titwanga ndzi ri loyi ndzi fanelaka ku ta ku hlanganisa; kambe lerisa kunene leswaku nandza wa mina a hanya. ₈Mina ndzi nga munhu la fumiwaka hi van'wana, ndzi ni masocha ehansi ka mina; loko ndzi ku eka rin'wana ra wona: ‘Famba!’ ra famba; eka rin'wana: ‘Tana!’ ra ta; ni le ka nandza wa mina: ‘Endla leswo karhi!’ wa swi endla.” ₉Loko Yesu a twa marito lawa, a hlamala, kutani a hundzuluka a languta ntshungu lowu wu n'wi heleketaka a ku: “Ndza mi byela ndzi ri: A ndzi si kuma ku pfumela loko tano, hambi ku ri exikarhi ka Vaisraele.” ₁₀Loko lava rhumiweke va tlhelele ekaya, va kuma nandza a hanyile.

₁₁Endzhaku ka sweswo, Yesu a ya emutini lowu va nge i Nayini. Vadyondzisiwa va yena ni vanhu lavo tala va famba na yena. ₁₂Loko a fika kusuhi ni nyangwa ya muti, a vona vanhu lava humaka va rhwele mufi, loyi a a ri n'wana yexe eka mana wa yena wa noni, kutani ntshungu lowukulu wa vanhu va muti a wu heleketa manana loyi. ₁₃Loko Hosi Yesu a n'wi vona, a n'wi twela vusiwana, a ku ka yena: “U nga rili.” ₁₄Hiloko a tshinela, a khumba vuhlaka, kutani lava va byi rhwalaka va yima; kutani a ku: “Jaha, ndzi ri ka wena: Pfuka!” ₁₅Kutani mufi a pfuka a tshama, a sungula ku vulavula. Kutani Yesu a n'wi yisa eka mana wa yena. ₁₆Hinkwavo va khomiwa hi ku chava, va dzunisa Xikwembu va ku: “Ku humelele muprofeta lonkulu exikarhi ka hina.” Naswona a va ku: “Xikwembu xi endzele tiko ra xona.” ₁₇Kutani mahungu lawa ya yena ma hangalaka hinkwako etikweni ra Vayuda ni le matikweni lama nga kusuhi na rona.

₁₈Timhaka leti hinkwato ti ya runguleriwa Yohane hi vadyondzisiwa va yena. ₁₉Kutani Yohane a hlawula vambirhi exikarhi ka vona, a va rhuma eka Hosi ku ya vutisa va ku: “Xana hi wena loyi va nge wa ta, kumbe ha ha langutela un'wana ke?” ₂₀Loko vavanuna lava va fikile eka Yesu, va ku: “Yohane Mukhuvuri ú hi rhumile eka wena, ú te: ‘Xana hi wena loyi va nge wa ta, kumbe xana ha ha langutela un'wana ke?’ ”

₂₁Hi nkarhi wolowo Yesu a hanyisa lavo tala lava xanisiwaka hi mavabyi, ni lava karhatekaka, ni lava nga ni mimoya leyo biha, a hanyisa ni lavo tala lava feke mahlo. ₂₂Kutani a hlamula varhumiwa, a ku: “Fambani, mi ya rungulela Yohane leswi mi swi voneke ni leswi mi swi tweke; lava feke mahlo va vona, swilema swa famba, vanhlokonho va basisiwa, lavo-fe-tindleve va twa, vafi va pfuka, swisiwana swi byeriwa Evhangeli. ₂₃Kutani ku katekile la nga ta ka a nga khunguvanyeki hikwalaho ka mina.”

₂₄Kuteloko varhumiwa va Yohane va sukile, Yesu a sala a vulavula hi Yohane, a ku ka ntshungu: “A mi yile ku ya hlalela yini emananga xana? A ri ri rihlanga leri tsekatsekisiwaka hi mheho xana? ₂₅E-e! Loko swi ri tano, a mi yela ku ya vona yini ke? Xana a a ri munhu la ambaleke swo saseka ngopfu xana? Vonani, lava ambalaka swa vubombi, ni lava tshamaka emafurheni, va le tindlwini ta vuhosi. ₂₆Kumbe ndzi byeleni, a mi yela ku ya vona yini ke? A a ri muprofeta xana? Ina, a a ri yena, ni ku tlula ni muprofeta. ₂₇Hi yena loyi ku nga tsariwa ta yena loko va te:

₂₈“Ndzi tiyisile ndzi ri ka n'wina: Exikarhi ka vanhu lava tswariweke hi vavasati, a ku na loyi a tlulaka Yohane; kambe lontsongo eka hinkwavo, la nga Mfun'weni wa Xikwembu, i nkulukumba eka Yohane.”

₂₉(Vanhu hinkwavo, ku katsa ni valuvisi, a va yingisa Yesu; a va endlile ku rhandza lokunene ka Xikwembu hi ku khuvuriwa hi Yohane. ₃₀Vafarisi ni vadyondzisi va Nawu vona a va nga khuvuriwanga hi Yohane, hikuva a va ala makungu ya Xikwembu ehenhla ka vona.)

₃₁Yesu a engeta a ku: “Vanhu va masiku lawa, ndzi nga va fanisa na yini ke? Va fana ni vanhu vahi ke? ₃₂Va fana ni swihlangi leswi huhaka entsendzeleni, swi huwelelana, swi ku:

₃₃“Hi ndlela leyi, Yohane Mukhuvuri ú tile a nga dyi swakudya, a nga nwi vhinyo, kutani mi ku: ‘Ú ni rihuhe.’ ₃₄N'wana-wa-Munhu ú tile a dya, a nwa, kutani mi ku: ‘Langutani, munhu wa makolo hi loyi, wa xidakwa, la twananaka ni valuvisi ni vadyohi!’ ₃₅Hambiswiritano, hinkwavo lava amukelaka vutlhari bya Xikwembu, va byi kuma byi lulamile.”

₃₆Un'wana wa Vafarisi a rhamba Yesu ku ta ta dya na yena. Hiloko a nghena ndlwini ya Mufarisi loyi, a tshama eswakudyeni. ₃₇A ku ri ni wansati wa mudyohi emutini wolowo; loko a twa leswaku Yesu ú tshamile eswakudyeni endlwini ya Mufarisi, a tisa ximbitana xa ribye ro basa lexi teleke hi mafurha layo nun'hwela. ₃₈Kutani a ta hi le ndzhaku ka Yesu, a nkhinsama a ri karhi a rila, a tsakamisa ni milenge ya Yesu hi mihloti, a yi sula hi misisi ya yena, a yi ntswontswa; endzhaku ka sweswo a yi tota hi mafurha layo nun'hwela. ₃₉Loko Mufarisi la nga rhamba Yesu a swi vona, a vilela embilwini ya yena a ku: “Loko munhu loyi a a ri muprofeta, a a ta va a tivile leswaku wansati loyi a n'wi khumbaka i mani, ni leswaku i munhu muni, hikuva i mudyohi.” ₄₀Yesu a vulavula na yena a ku: “Simoni, ndzi ni rito eka wena.” Yena a ku: “Vulavula, Mudyondzisi.”

₄₁Yesu a ku: “A ku ri ni vanhu vambirhi lava a va ri ni nandzu eka munhu wa mabindzu. Un'wana a a ri ni nandzu wa timali ta 500, un'wana ta 50. ₄₂Leswi a va pfumala xo riha ha xona, munhu loyi a va rivalela hi vumbirhi bya vona. Xana hi wihi exikarhi ka vona loyi a nga ta n'wi rhandza ngopfu ke?” ₄₃Simoni a hlamula a ku: “Ndza tshemba, hi loyi a rivaleriweke nandzu lowukulu.” Yesu a ku ka yena: “Kunene, u tiyisile.” ₄₄Kutani a hundzuluka a languta wansati, a ku ka Simoni: “Wansati loyi, wa n'wi vona ke? Ndzi nghene endlwini ya wena, a wu ndzi nyikanga mati ndzi hlamba milenge; kambe yena ú tsakamisile milenge ya mina hi mihloti, a tlhela a yi sula hi misisi ya yena. ₄₅A wu ndzi ntswontswanga; kambe loyi, hi mpfhuka ndzi nghena la, a nga tshikanga ku ndzi ntswontswa milenge. ₄₆A wu ndzi totanga mafurha enhlokweni; kambe loyi ú totile milenge ya mina hi mafurha layo nun'hwela. ₄₇Hikokwalaho ndzi ri, loyi a rivaleriweke swidyoho leswo tala, rirhandzu ra yena i rikulu, kasi loyi a rivaleriweke leswitsongo, na rirhandzu ra yena i ritsongo.” ₄₈Kutani a ku ka wansati: “Swidyoho swa wena swi rivaleriwile.”

₄₉Lava tshameke eswakudyeni swin'we na yena, va sungula ku vilela etimbilwini ta vona, va ku: “Loyi i mani xana, leswi a kotaka ni ku rivalela vanhu swidyoho swa vona?” ₅₀Hiloko a ku eka wansati: “Ku pfumela ka wena ku ku ponisile, famba hi ku rhula.”