Marka 10

₁Loko Yesu a sukile kwalaho, a ya etikweni ra Yudiya ni le ntsungeni wa Yordani. Mintshungu yi tlhela yi ta yi ta hlengeletana eka yena; kutani a engeta a va dyondzisa, hilaha a a tolovele ku endla hakona.

₂Kutani Vafarisi va ta va ta n'wi vutisa, ku ri ku n'wi ringa, va ku: “Xana wanuna a nga pfumeleriwa ku tshika nsati wa yena ke?” ₃Na yena a va vutisa a ku: “Muxe ú mi lerisile yini xana?” ₄Va ku: “Muxe ú swi pfumelerile leswaku ku tsariwa papila ra ku ntshunxa nsati, ni ku n'wi tshika.” ₅Yesu a va hlamula a ku: “Muxe ú mi tsalele nawu lowu hikwalaho ka ku nonon'hwa ka timbilu ta n'wina. ₆Kambe eku sunguleni ka ntumbuluko, ku vuriwe leswi: ‘Xikwembu xi endlile munhu wa xinuna ni munhu wa xisati. ₇Hikwalaho ka swona wanuna ú ta sukela tata wa yena ni mana wa yena, a namarhela nsati wa yena; ₈kutani lavambirhi va ta va nyama yin'we ntsena.’ Swi vula leswaku a va ha ri vambirhi kambe i nyama yin'we ntsena. ₉Hikokwalaho, leswi Xikwembu xi swi hlanganiseke, swi nga tshuki swi hambanyisiwa hi munhu!”

₁₀Loko va tlhelele ndlwini, vadyondzisiwa va vutisa Yesu mhaka yoleyo. ₁₁Yena a ku ka vona: “Loyi a tshikaka nsati wa yena a ya teka un'wana, wa oswa, naswona ú dyohela nsati wa yena. ₁₂Na yena wansati, loko a tshika nuna wa yena a ya tekiwa hi un'wana, wa oswa.”

₁₃Vanhu van'wana va tisa vana eka Yesu leswaku a va khumba; kambe vadyondzisiwa va va tshinya. ₁₄Loko Yesu a swi vona, a vilela ngopfu, a ku ka vona: “Tshikani vana va ta ka mina, mi nga tshuki mi va sivela, hikuva Mfumo wa Xikwembu i wa lava fanaka na vona. ₁₅Ndzi tiyisile ndzi ri ka n'wina: La nga amukeriki Mfumo wa Xikwembu tanihi n'wana, a nga ka a nga ngheni ka wona.” ₁₆Kuteloko a vukarhile vana, a va tlhandleka mavoko, a va katekisa.

₁₇Kuteloko Yesu a humile ni ku khoma ndlela, munhu un'wana a ta ka yena hi ku tsutsuma, a fika a nkhinsama emahlweni ka yena, a n'wi vutisa a ku: “Mudyondzisi lonene, ndzi nga endla yini leswaku ndzi ta dya ndzhaka ya vutomi lebyi nga heriki?” ₁₈Yesu a ku ka yena; “U ndzi vulela yini lonene? A ku na lonene, loko ku nga ri Xikwembu ntsena. ₁₉U tiva Milawu leyi nge: ‘U nga tshuki u dlaya, u nga tshuki u oswa, u nga tshuki u yiva, u nga tshuki u humesa vumbhoni byo hemba, u nga dyeleli van'wana, u va ni xichavo ka tata wa wena ni ka mana wa wena.’ ”

₂₀Munhu loyi a hlamula, a ku ka yena: “Mudyondzisi, hinkwaswo leswi ndzi swi hlayisile ku sukela evuntshweni bya mina.” ₂₁Kuteloko Yesu a n'wi langutile, a n'wi rhandza, kutani a ku ka yena: “Wa ha pfumala xilo xin'we ntsena; famba, u ya xavisa hinkwaswo leswi u nga na swona, u nyika swisiwana, kutani u ta va ni xuma etilweni; kutani u ta, u ndzi landza.” ₂₂Kambe munhu loyi a tsuva hi ku twa marito lawa, a famba a hlunamile, hikuva a a ri ni rifuwo lerikulu.

₂₃Kutani Yesu a rhalarhala, a ku ka vadyondzisiwa va yena: “Swi ta nonon'hwa ngopfu eka lava nga ni rifuwo ku nghena eMfun'weni wa Xikwembu.” ₂₄Vadyondzisiwa va hlamala swinene hi marito ya yena. Kambe Yesu a engeta a ku ka vona: “Vanakulorhi, swi nonon'hwa ngopfu ku nghena eMfun'weni wa Xikwembu. ₂₅Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun'weni wa Xikwembu.” ₂₆Kutani ku hlamala ka vona ku engeteleleka; va vutisana, va ku: “Loko swi ri tano, ku nga pona mani xana?” ₂₇Yesu a va languta a ku: “Loko va ri vanhu swa va tsandza, kambe a swi tsandzi Xikwembu, hikuva Xikwembu xi kota hinkwaswo.”

₂₈Kutani Petro a ku ka Yesu: “Waswivo, hina hi tshikile hinkwaswo, hi ku landza.” ₂₉Yesu a ku: “Ndzi tiyisile ndzi ri ka n'wina: Un'wana ni un'wana la tshikeke muti wa yena, kumbe makwavo wa xinuna kumbe wa xisati, kumbe mana wa yena, kumbe tata wa yena, kumbe vana, kumbe masimu, hikwalaho ka mina ni hikwalaho ka Evhangeli, ₃₀ú ta nyikiwa swilo leswi ka dzana eminkarhini ya sweswi: hi leswaku tindlu, ni vamakwavo, ni vamanana, ni vana, ni masimu, swin'we ni ku xaniseka; kutani eminkarhini leyi taka, ú ta nyikiwa vutomi lebyi nga heriki. ₃₁Kambe vanyingi lava nga va le mahlweni va ta va va le ndzhaku, ni va le ndzhaku va ta va va le mahlweni.”

₃₂Loko va ha ri endleleni, va ri karhi va tlhandlukela eYerusalema, Yesu a a va rhangele mahlweni; vadyondzisiwa a va hlamala; ni vanhu lava a va va landzelela, a va chava; kutani a engeta a vitanela lava khume na vambirhi etlhelo, a va tivisa leswi nga ta n'wi humelela, ₃₃a ku: “Vonani, hi tlhandlukela eYerusalema, kutani N'wana-wa-Munhu ú ta nyiketiwa eka vaprista lavakulu ni ka vatsari; va ta n'wi avanyisela rifu ni ku n'wi nyiketa eka vamatiko; ₃₄va ta tlanga hi yena, va n'wi tshwutela marha, va n'wi ba hi minkhavi, va n'wi dlaya; kutani endzhaku ka masiku manharhu ú ta pfuka eku feni.”

₃₅Yakobo na Yohane, vana va Zebediya, va ta ka yena, va ku: “Mudyondzisi, hi rhandza leswaku u hi endlela leswi hi nga ta ku kombela swona.” ₃₆A ku ka vona: “Mi lava leswaku ndzi mi endlela yini xana?” ₃₇Va ku ka yena: “Hi kombela ku nyikiwa leswaku hi tshama eMfun'weni wa wena lowo kwetsima, un'wana evokweni ra wena ra xinene, un'wana eka lera ximatsi.” ₃₈Yesu a ku ka vona: “A mi tivi lexi mi xi kombelaka. Xana mi nga swi kota ku nwela exinwelweni lexi ndzi nwelaka eka xona, ni ku khuvuriwa hi ku khuvula loku ndzi khuvuriwaka ha kona ke?” ₃₉Va ku ka yena: “Hi nga swi kota.” Yesu a ku ka vona: “Kunene mi ta nwela exinwelweni lexi ndzi nwelaka eka xona, mi ta khuvuriwa hi ku khuvula loku ndzi khuvuriwaka ha kona; ₄₀kambe loko ku ri ku tshama evokweni ra mina ra xinene, hambi ka lera ximatsi, a hi mina ndzi nga mi nyikaka swona, kambe swi ta va swa lava swi lunghiseriweke vona.”

₄₁Kutani lava khume, loko va twa mhaka leyi, va hlundzukela Yakobo na Yohane. ₄₂Kavaloko Yesu a va vitana a ku ka vona: “Ma swi tiva leswaku lava tivulaka tihosi ta matiko va ma fuma hi ntamu; na vona vakulukumba va matiko lawa va ma fuma hi matimba. ₄₃Kambe swi nga tshuki swi va tano exikarhi ka n'wina; un'wana ni un'wana la lavaka ku va lonkulu exikarhi ka n'wina, a a ve mutirheli wa n'wina; ₄₄naswona, un'wana ni un'wana la lavaka ku va wa le mahlweni exikarhi ka n'wina, a a ve nandza wa hinkwavo; ₄₅hikuva na yena N'wana-wa-Munhu, a nga telanga ku ta tirheriwa, kambe ku tirhela van'wana ni ku nyiketa vutomi bya yena ku kutsula lavo tala.”

₄₆Va fika eYeriko. Kakuloko a huma eYeriko, swin'we ni vadyondzisiwa va yena, ni ntshungu lowukulu, Bartimiya lowo-fe-mahlo, n'wana Timiya, a a tshamile kusuhi ni ndlela, a ri karhi a kombela. ₄₇Loko a twa leswaku i Yesu wa Nazareta la taka, a sungula ku huwelela, a ku: “Yesu N'wana Davhida, ndzi twele vusiwana!” ₄₈Lavo tala va n'wi tshinya leswaku a miyela; kambe yena a engeta a huwelela, a ku: “N'wana Davhida, ndzi twele vusiwana!” ₄₉Kutani Yesu a yima, a ku: “N'wi vitaneni!” Va vitana lowo-fe-mahlo, va ku ka yena: “Tiyisa mbilu, suka u yima, wa ku vitana.” ₅₀Kavaloko a hluvula jasi ra yena, a tlula, a ta ka Yesu. ₅₁Kutani Yesu a n'wi vutisa a ku: “U lava yini? Ndzi nga ku pfuna hi yini?” Lowo-fe-mahlo a ku ka yena: “Mufundhisi, ndzi navela ku tlhela ndzi vona!” ₅₂Yesu a ku ka yena: “Famba, ku pfumela ka wena ku ku hanyisile.” Hi nomu lo a tlhela a vona, kutani a landza Yesu.