Marka 9

₁A engeta a ku ka vona: “Ndzi tiyisile ndzi ri ka n'wina, exikarhi ka lava nga kwala, ku ni van'wana lava nga ta ka va nga khumbiwi hi rifu, va nga si vona Mfumo wa Xikwembu wu ta hi matimba.”

₂Endzhaku ka masiku ya 6, Yesu a teka Petro na Yakobo na Yohane, a ya na vona entshaveni leyo leha va ri voxe. Kutani a hundzuka nghohe emahlweni ka vona; ₃swiambalo swa yena swi sungula ku vangama, swi basa swinene, ku tlula leswi vahlantswi va swiambalo va laha misaveni va nga swi basisisaka xiswona. ₄Kutani Eliya na Muxe va humelela ka vona, va ri karhi va vulavula na Yesu. ₅Hiloko Petro a ku ka Yesu: “Mufundhisi, swi sasekile loko hi ri kwala; a hi akeni mintsonga minharhu, wun'wana wa wena, wun'wana wa Muxe, wun'wana wa Eliya.” ₆A a nga tivi leswaku ú ta vula yini, hikuva a va tshukile ngopfu. ₇Kutani papa ri ta ri ta va funengeta, ku huma ni rito epapeni leri nge: “Loyi i N'wananga la rhandzekaka; n'wi yingiseni.” ₈Hi nomu lo va rhalarhala hinkwako, kambe va nga ha voni munhu, loko a nga ri Yesu ntsena.

₉Loko va ha rhelela hi le ntshaveni, Yesu a va laya a ku: “Mi nga tshuki mi byela munhu leswi mi swi voneke, N'wana-wa-Munhu a nga si pfuka eku feni.” ₁₀Vona va hlayisa mhaka leyi, va ri karhi va vutisana va ku: “Ku pfuka eku feni hi leswo yini?”

₁₁Kutani va n'wi vutisa va ku: “Hikwalaho ka yini vatsari va vula leswaku Eliya ú fanele ku rhanga a ta?” ₁₂A va hlamula a ku: “Eliya ú fanele ku rhanga a ta hakunene, a tlhela a pfuxeta hinkwaswo; kambe hikwalaho ka yini ku tsariwile leswaku N'wana-wa-Munhu ú ta fanela ku twisiwa ku vaviseka lokukulu, a va a soriwa ke? ₁₃Ntsena ndza mi byela leswaku Eliya ú tile, kutani va n'wi endlile hinkwaswo leswi va swi rhandzeke, hilaha ku tsariweke hakona ehenhla ka timhaka ta yena.”

₁₄Kuteloko va fikile eka vadyondzisiwa lavan'wana, va kuma ntshungu lowukulu wu va rhendzerile va sala xikarhi, ni vatsari va ri karhi va kanetana na vona. ₁₅Loko ntshungu hinkwawo wu vona Yesu, wu hlamala ngopfu, wu tsutsuma wu ya hlangana na yena, wu n'wi xeweta. ₁₆Yena a va vutisa a ku: “I ncini lexi mi kanetanaka na vadyondzisiwa ha xona xana?” ₁₇Un'wana exikarhi ka ntshungu a hlamula a ku: “Mudyondzisi, ndzi tisile n'wana wa mina eka wena; ú ni moya lowu wu n'wi endlaka mbheveve. ₁₈Loko wu n'wi khoma, wa n'wi tlatlalata, a tlhutlha xikhuvi, a getsela meno, kutani a oma; ndzi komberile vadyondzisiwa va wena leswaku va wu hlongola, kambe va tsandzekile.” ₁₉Yesu a hlamula, a ku: “Ha! Rixaka leri nga pfumeriki, ndzi ta va na n'wina ku fikela rini? Ndzi ta mi lehisela mbilu ku fikela rini ke? N'wi tiseni haleno!” ₂₀Kutani va n'wi tisa ka yena. Loko moya wu vona Yesu, wu rhurhumerisa n'wana hi matimba, a wela hansi, a vumbuluka a ri karhi a tlhutlha xikhuvi. ₂₁Yesu a vutisa tata wa yena, a ku: “Xana swi n'wi sungurile rini?” A ku: “Ku sukela loko a ha ri ntsongo! ₂₂Ko tala wu n'wi wisele endzilweni kumbe ematini ku n'wi lovisa; kambe loko u swi kota, hi twele vusiwana u hi pfuna.” ₂₃Yesu a ku ka yena: “U ri, ‘loko u swi kota’? Hinkwaswo swi nga kota ku endleriwa la pfumelaka.” ₂₄Tata wa n'wana a hatla a tlakusa rito, a ku: “Ndza pfumela! Ndzi pfune eku kanakaneni ka mina.”

₂₅Loko Yesu a vona leswaku ntshungu wu ya wu engeteleleka, a tshinya moya wa thyaka, a ku: “Wena moya lowu nga vulavuriki, lowu nga twiki, ndza ku lerisa ndzi ri, huma ka n'wana loyi, u nga ha tlheli u vuya ka yena ni siku ni rin'we!” ₂₆Kutani wu huma wu ri karhi wu huwelela, wu rhurhumerisa n'wana hi matimba, a va tanihi mufi, lavo tala va kala va ku: “Ú file.” ₂₇Kambe Yesu a n'wi khoma hi voko, a n'wi pfuxa, kutani a yima.

₂₈Kuteloko Yesu a nghenile ndlwini, vadyondzisiwa va yena va n'wi vutisa va ri etlhelo va ku: “Xana hina hi tsandzekile ha yini ku hlongola moya lowu ke?” ₂₉A ku ka vona: “Moya lowo tano a wu koti ku huma loko ku nga ri hi ku khongela ntsena.”

₃₀Loko va suka kwalaho, va tsemakanya Galeliya, kambe Yesu a a nga lavi leswaku swi tiviwa hi munhu; ₃₁hikuva a a dyondzisa vadyondzisiwa va yena, kutani a ku ka vona: “N'wana-wa-Munhu ú ta nyiketiwa sweswi emavokweni ya vanhu. Va ta n'wi dlaya; loko va n'wi dlele, ú ta pfuka eku feni hi siku ra vunharhu.” ₃₂Kambe a va twisisanga marito lawa, naswona a va chava ku n'wi vutisa.

₃₃Va fika eKapernawume. Loko Yesu a nghenile ndlwini, a vutisa vadyondzisiwa a ku: “A mi kanetana hi tihi endleleni?” ₃₄Kambe va miyela, hikuva endleleni a va kanetana hi ta vukulukumba. ₃₅Kuteloko Yesu a tshamile hansi, a vitana lava khume na vambirhi, a ku ka vona: “Loko un'wana a rhandza ku va lowo rhanga, a a ve lowo hetelela eka hinkwavo, a va nandza wa hinkwavo.” ₃₆Kutani a teka n'wana, a n'wi yimisa exikarhi ka vona; kuteloko a n'wi vukarhile, a ku ka vona: ₃₇“Loyi a amukelaka un'wana wa vana lava hi vito ra mina, ú amukela mina; ni loyi a ndzi amukelaka, a nga amukeri mina ntsena, kambe ú amukela ni loyi a ndzi rhumeke.”

₃₈Yohane a n'wi tivisa a ku: “Mudyondzisi, hi vonile un'wana la nga riki wa hina, a hlongola mademona hi vito ra wena, kutani hi n'wi siverile, hikuva a hi wa hina.” ₃₉Kambe Yesu a ku: “Mi nga tshuki mi n'wi sivela, hikuva a ku na munhu loyi a nga hatlaka a vula swo biha hi mina, loko a endlile mahlori hi vito ra mina. ₄₀Loyi a nga lwiki na hina ú yima na hina. ₄₁Ndzi tiyisile ndzi ri ka n'wina, munhu loyi a mi nyikaka ndzheko wa mati hi leswi mi vuriwaka va ka Kriste, a nga ka a nga pfumali hakelo ya yena.

₄₂“La khunguvanyisaka un'wana wa lavatsongo lava pfumelaka eka mina, swi nga antswa loko a boheleriwa ribye ra ku sila enhan'wini, a hoxiwa elwandle. ₄₃Loko voko ra wena ri ku khunguvanyisa, ri tseme; swi nga antswa loko u nghena evutomini u ri xilema, ku ri na ku ya eTiheleni, endzilweni lowu nga timekiki, u ri ni mavoko mambirhi. [ ₄₄Exivandleni xexo, ‘xivungu lexi xi va dyaka a xi fi, ni ndzilo a wu timeki.’] ₄₅Ni loko nenge wa wena wu ku khunguvanyisa, wu tseme; swi nga antswa loko u nghena evutomini u ri karhi u khwita, ku ri na ku hoxiwa eTiheleni u ri ni milenge mimbirhi. [ ₄₆Exivandleni xexo, ‘xivungu lexi xi va dyaka a xi fi, ni ndzilo a wu timeki.’] ₄₇Ni loko tihlo ra wena ri ku khunguvanyisa, ri xokole; swi nga antswa loko u nghena eMfun'weni wa Xikwembu u fe tihlo rin'we, ku ri na ku hoxiwa eTiheleni u ri ni mahlo mambirhi. ₄₈Exivandleni xexo, ‘xivungu lexi xi va dyaka a xi fi, ni ndzilo a wu timeki.’

₄₉“Un'wana ni un'wana ú ta basisiwa hi ndzilo, ku fana ni magandzelo yo cheriwa munyu.

₅₀“Munyu i xilo lexo nandziha; kambe loko munyu wu phyama, mi ta wu lunga hi yini ke? Lungani ku fana ni munyu, mi hanyisana hi ku rhula.”