Swivuriso 3

₁N'wananga, u nga rivali leswi

ndzi ku dyondzisaka swona.

Hlayisa milawu ya mina,

₂swi ta ku engetelela masiku ya ku hanya,

swi ta ku nyika ku rhula evuton'wini bya wena.

₃Namarhela tintswalo ni ku tshembeka;

swi bohelele enhan'wini,

u swi fihla endzeni ka mbilu ya wena.

₄Hi ndlela leyi, Xikwembu xi ta ku tsakela,

ni vanhu va ta ku xixima.

₅Tshemba HOSI Xikwembu hi mbilu ya wena hinkwayo,

u nga tshembi ntsena vutlhari bya wena.

₆Eka hinkwaswo leswi u swi endlaka, tsundzuka HOSI Xikwembu,

xi ta ku basisela tindlela.

₇U nga tshuki u tiendla ntlhari,

chava HOSI Xikwembu, u hambana ni leswo biha.

₈Leswi, swi ta horisa miri wa wena,

swi tiyisa ni marhambu ya wena.

₉Nkhensa HOSI Xikwembu hi leswi u nga na swona,

u xi humesela ni leswi u nga ta rhanga u swi tshovela emasin'wini hinkwawo ya wena,

₁₀kutani switlati swa wena swi ta tlhemuka hi mavele,

ni vhinyo yi ta tala yi khapa emakhuwaneni.

₁₁N'wananga, loko HOSI Xikwembu xi ku laya, u nga soli,

ni loko xi ku tshinya, u nga vi ni ximbilwa-mbilwana,

₁₂hikuva HOSI Xikwembu xi tshinya loyi xi n'wi rhandzaka,

xi ba loyi xi n'wi tsakelaka.

₁₃Munhu loyi a kumeke vutlhari

ni ku twisisa, ú katekile,

₁₄hikuva vutlhari byi hakela ku tlula silivhere,

byi vuyerisa ku tlula nsuku.

₁₅Vutlhari byi ni nkoka ku tlula swilo swo bomba ha swona,

byi tlula ni swilo hinkwaswo leswi munhu a swi navelaka.

₁₆Hi byona lebyi nyikaka munhu masiku layo tala ya ku hanya,

byi nyika rifuwo ni ku dzuneka.

₁₇Tindlela ta byona ta tsakisa swinene,

mabudula ya byona i ku rhula ntsena.

₁₈Vutlhari i murhi lowu nyikaka vutomi eka lava va byi kumaka;

lava va byi namarhelaka, va katekile!

₁₉Hi vutlhari, HOSI Xikwembu xi tumbuluxile misava,

matilo xi ma endlile hi vutivi;

₂₀vutivi bya xona byi handzurile misava, mati ya swidziva ma huma,

byi endlile leswaku mapapa ma tshonisa mberha.

₂₁N'wananga, hlayisa vutivi lebyinene ni mianakanyo leyinene,

swilo leswi, u nga tshuki u hambana na swona;

₂₂hi swona swi nga ta ku hanyisa,

swi sasekisa vutomi bya wena;

₂₃kutani tindlela ti ta ku basela,

a ku nga vi na nchumu lexi nga ta ku khugula.

₂₄Loko u etlele, a ku nga vi na lexi xi nga ta ku chavisa,

ni vurhongo byi ta nandziha;

₂₅loko ku tshuka ku humelela leswo chavisa, u nga tsemeki nhlana,

ni loko lavo homboloka va ku tela ku fana ni xidzedze, u nga chavi,

₂₆hikuva HOSI Xikwembu hi xona xi nga ta ku tiyisa,

xi nga ka xi nga ku tshiki u wela ekhombyeni.

₂₇Loko u ri ni matimba yo lawula swilo leswinene,

u nga tshuki u tsona vanhu lava nga ni tifanelo ta ku swi kuma.

₂₈U nga byeli munhu-kuloni, u ku: “Famba, u ta tlhela u vuya mundzuku, ndzi ta ku nyika swona”,

kasi swilo swa kona, u na swona.

₂₉Munhu-kuloni loyi a akelaneke na wena hi ku ku tshemba,

u nga tshuki u n'wi tshama xikungu.

₃₀Loko munhu a nga ku hoxelanga,

u nga tshuki u holova na yena.

₃₁U nga tshuki u navela munhu wa tinyimpi,

ni mikhuva ya yena, u nga yi tekeleli,

₃₂hikuva HOSI Xikwembu xi venga munhu lowo homboloka,

kasi lavo lulama, xi twanana na vona.

₃₃HOSI Xikwembu xi vanga makhombo endlwini ya lowo homboloka,

kambe emitini ya lavo lulama, xi nghenisa minkateko;

₃₄lava sandzaka, xa va sandza,

kambe xi tsakela lava titsongahataka.

₃₅Ku dzunisiwa i swa lavo tlhariha,

tingana i ta swiphunta.