Pisalema ya 110

₁HOSI Xikwembu xi byerile murhangeri wa tiko ra ka hina xi ku:

“Tana u ta tshama evokweni ra mina ra xinene,

kutani ndzi ta veka valala va wena ehansi ka minkondzo ya wena.”

₂HOSI Xikwembu lexi nga Siyoni

a xi tiyise vuhosi bya wena xi byi kurisa.

Fuma emahlweni ka valala va wena!

₃Siku u hlomaka matlhari,

tinhenha ti ta huma na wena ti tsakile.

Majaha ma ta ta eka wena

ma huma etintshaveni leto hlawuleka,

ma fana ni mberha leyi waka loko vurhonga byi tshwuka.

₄HOSI Xikwembu xi ku tshembisile,

xi nga ka xi nga tlheleli ndzhaku;

xi te: “U muprista hilaha ku nga heriki,

hileswi u nga wa rixaka rin'we na Melkisedeke.”

₅HOSI N'wini wa hinkwaswo ú le vokweni ra wena ra xinene.

Siku a hlundzukaka, ú tshova matimba ya tihosi;

₆siku a avanyisaka matiko,

ú herisa varhangeri ematlhelweni hinkwawo ya misava,

kutani mintsumbu yi tala hinkwako.

₇Loko murhangeri wa tiko ra ka hina a ri endleleni,

ú timula torha enambyeni, kutani a ololoka a ya hlula valala.