Pisalema ya 146

₁Dzunisani HOSI!

Ndzi lava ku dzunisa HOSI Xikwembu ndzi vuyelela.

₂Ndzi ta vonga HOSI vutomi bya mina hinkwabyo,

ndzi twarisa Xikwembu xanga hi tinsimu loko ndza ha hanya.

₃Mi nga veki ku tshemba ka n'wina eka vanhu va swiyimo swa le henhla,

hikuva i va nyama ni ngati, va nge ponisi munhu!

₄Siku va hlalaka, va tlhelela entshurini,

kutani makungu ya vona ma lovisa sweswo, enkarhini wolowo!

₅Ku katekile munhu loyi Xikwembu xa va ka Yakobo xi nga mupfuni wa yena,

loyi a vekaka ku tshemba ka yena eka HOSI Xikwembu xakwe.

₆Xikwembu hi xona xi endleke tilo ni misava ni lwandle,

ni hinkwaswo leswi hanyaka eka swona;

minkarhi hinkwayo xa tshembeka.

₇Xi yima ni lava xanisiwaka,

lava sikaka xa va phamela,

lava bohiweke xi va humesa ekhotsweni.

₈HOSI Xikwembu xi pfula mahlo ya lava nga voniki,

lava tshikeleriwaka xa va kutsula,

xi rhandza vanhu lava lulameke.

₉HOSI Xikwembu xi hlayisa valuveri,

xi tikarhatela swisiwana ni tinoni,

kambe xi hingakanya tindlela ta lavo homboloka.

₁₀HOSI Xikwembu xi ta fuma hilaha ku nga heriki,

hi xona Xikwembu xa wena, we muti wa Siyoni, hi minkarhi ni minkarhi!

Dzunisani HOSI!