Pisalema ya 23

₁We HOSI, u murisi wanga,

ndzi nga ka ndzi nga pfumali nchumu.

₂U ndzi fikisa emadyelweni ya rihlaza,

u ndzi yisa ematini layo tenga.

₃U hlayisa moya wa mina,

u ndzi fambisa etindleleni leto lulama hikwalaho ka vito ra wena.

₄Ni loko ndzi nga famba enkoveni wa xinyami xo chavisa,

a ndzi chavi nchumu xo biha,

hikuva u na mina:

Wa ndzi lwela ni ku ndzi hlayisa.

₅U ndzi endlela nkhuvo

valala va mina va langutile;

u ndzi chela mafurha yo nun'hwela enhlokweni,

ni ndzheko wa mina wa khapa.

₆Ina, vunene ni rirhandzu ra wena swi ta ndzi sirhelela

masiku hinkwawo ya ku hanya ka mina,

kutani ndzi ta tshama endlwini ya wena

vutomi bya mina hinkwabyo.