Pisalema ya 27

₁Rivoni ra mina ni muponisi wa mina i HOSI Xikwembu,

xana i mani la nga ndzi chavisaka xana?

HOSI Xikwembu i khokholo ra vutomi bya mina,

xana i mani loyi ndzi nga n'wi chavaka xana?

₂Loko vanhu lavo homboloka va ndzi tela va ri ni makungu ya ku ndzi dlaya,

ndzi vula vona valala va mina, hi vona va nga ta dlayiwa va fa.

₃Hambiloko vuthu lerikulu ro ta ri ta ndzi rhendzela,

ndzi nga ka ndzi nga rhurhumeli,

ni loko vanhu va nga hloma matlhari va ndzi tela,

ndzi nga ka ndzi nga tsemeki nhlana.

₄Ndzi komberile xilo xin'we eka HOSI;

xilo xa kona ndzi xi tsakela ngopfu,

ku nga ku tshama eTempeleni ya HOSI vutomi bya mina hinkwabyo,

ndzi hlalela ku saseka ka yona ndzi ri ndlwini ya yona.

₅Esikwini ra khombo, HOSI yi ta ndzi tumbeta entsongeni wa yona,

yi ta ndzi fihla endzeni ka yindlu ya yona;

yi ndzi veka ehenhla ka ribye lerikulu.

₆Hikokwalaho, ndzi ta hlula valala va mina

lava va ndzi rhendzeleke matlhelo hinkwawo;

ndzi ta humesa magandzelo endlwini ya HOSI ndzi ri karhi ndzi ba nkulungwana;

ndzi ta yimbelela ndzi dzunisa HOSI.

₇We HOSI, ndzi yingise loko ndzi huwelela hi rito lerikulu,

ndzi twele vusiwana u ndzi hlamula!

₈Hi wena u vuleke u ku: “Ndzi laveni!”

Hikokwalaho ndzi vula sweswo ndzi ri:

Ndzi le ku ku laveni, we HOSI,

₉u nga tshuki u ndzi fularhela.

Mina nandza wa wena, u nga ndzi kariheli u ndzi hlongola,

hikuva hi wena mupfuni wa mina,

u nga ndzi fularheli, u nga ndzi tshiki,

hikuva we Xikwembu, u muponisi wa mina.

₁₀Hambiloko vatswari va mina va ndzi tshika,

we HOSI u ta ndzi hlayisa.

₁₁We HOSI, ndzi kombe leswi u rhandzaka swona,

u ndzi sirhelela lomu ndzi fambaka kona,

hikuva ndzi ni valala.

₁₂U nga pfumeli leswaku valala va mina va tlanga hi mina,

vona lava va ndzi lumbetaka etihubyeni,

lava vulavulaka ku ndzi endla tihanyi.

₁₃Ndzi tshemba swinene

leswaku ndzi ta vona vunene bya HOSI, ndza ha hanya!

₁₄Tshemba HOSI, u tiya nhlana;

u nga tsekatseki, ina tshemba HOSI!