Pisalema ya 31

₁We HOSI, ndzi ta ka wena leswaku u ta ndzi lwela,

u nga pfumeli leswaku ndzi khomiwa hi tingana;

We Xikwembu xo tshembeka, ndzi sirhelele!

₂Rhiya ndleve u ndzi yingisa,

hatlisa u ta ndzi ponisa,

u va ribye ro tiya leri ndzi tumbelaka eka rona,

ni khokholo leri ndzi hlayisekaka eka rona.

₃Hakunene, u ribye ra mina ni khokholo ra mina;

ndzi kombe ndlela u tlhela u ndzi fambisa, leswaku vito ra wena ri nga sandziwi.

₄Ndzi phonyokise entlhan'wini lowu ndzi rhiyiweke ha wona,

hikuva hi wena u nga xisirhelelo xa mina.

₅We HOSI, ndzi veka vutomi bya mina emavokweni ya wena;

u ndzi kutsurile we HOSI, wena Xikwembu xo tshembeka.

₆Vanhu lava namarhelaka swikwembu swa hava, a ndzi twanani na vona.

We HOSI, hi wena ntsena ndzi ku tshembaka.

₇Ndzi ta yimbelela ndzi tsakile, hikuva u ndzi kombile tintswalo,

u vonile ku xanisiwa ka mina,

ni maxangu ya mina u ma tivile.

₈A wu ndzi nyiketanga eka valala va mina,

u ndzi famba-fambisile hinkwako hi ku ntshunxeka.

₉We HOSI, ndzi twele vusiwana, hikuva ndzi le khombyeni,

gome ri ndzi heta matimba emirini ni le moyeni,

ni ku vona a ndza ha voni.

₁₀Malembe ya vutomi bya mina ma hela ndzi ri karhi ndzi konya ndzi ri enhlomulweni,

vusiwana byi ndzi heta ntamu, byi ndzi tshova ni swirho.

₁₁Valala va mina hinkwavo va ndzi sandza,

ngopfu-ngopfu lava ndzi akelaneke na vona;

lava va ndzi tivaka, va ndzi chava,

ni loko hi hlangana endleleni, va ndzi papalata.

₁₂Vanhu va ndzi rivarile, a va ha ri na mhaka na mina,

onge ndzi lo fa, kumbe ndzo va xibya lexi fayekeke.

₁₃Ndzi twa lavo tala va ku:

“Munhu loyi wa nyenyetsa emutini hinkwawo!”

Va twanana ku lwa na mina,

va boha ni makungu ya ku ndzi dlaya.

₁₄Kambe mina ndzi tshemba wena, we HOSI,

ndzi ri, u Xikwembu xanga.

₁₅Minkarhi hinkwayo ndzi hlayisiwa hi wena,

hikokwalaho ndzi kutsule emavokweni ya valala va mina ni ya lava va ndzi xanisaka!

₁₆Ndzi nandza wa wena; ndzi langute hi tintswalo,

u ndzi ponisa hi rirhandzu ra wena lero tshembeka.

₁₇We HOSI, u nga pfumeli leswaku ndzi khomiwa hi tingana,

hikuva ndzi huwelela eka wena;

lavo homboloka hi vona u fanelaka ku va khomisa tingana,

va ya exivandleni xa vafi va nga ha ri na xo vula.

₁₈Vahembi lava vo titshemba ni ku tikukumuxa,

lava nga chaviki ku lumbeta munhu wo lulama, va hundzule timbheveve!

₁₉Swilo leswinene leswi u swi hlayiselaka malandza ya wena

a hi ku tala ka swona!

U swi endlela lava tumbelaka ka wena,

vanhu hinkwavo va ri karhi va swi vona.

₂₀U va sirhelela laha u nga kona,

kule ni lava bohaka makungu layo biha;

u va sirhelela entsongeni wa wena,

kule ni lava va va rhuketelaka.

₂₁Ndza ku nkhensa we HOSI:

U ndzi kombile rirhandzu ra wena hi ndlela yo hlamarisa,

hikuva a ndzi rhendzeriwe hi valala kukota muti lowu hlaseriwaka.

₂₂Eku chaveni ka mina a ndzi ku:

Ndzi yisiwile kule na wena, a wu nga ha ndzi voni!

Kasi wena u ndzi twile loko ndzi ku khongela,

u twile ku huwelela ka mina loko ndzi kombela ku pfuniwa.

₂₃Rhandzani HOSI, n'wina hinkwenu lava mi yi tshembaka;

yi sirhelela lava pfumelaka eka yona,

kambe lava va tikurisaka, yi va ba yi vuyelela.

₂₄N'wina hinkwenu lava mi tshembaka HOSI,

tiyani, mi nga heli matimba!