Pisalema ya 37

₁U nga tshuki u tipandzisa nhloko hikwalaho ka vanhu lavo homboloka;

vadyohi, u nga tshuki u va vondzoka!

₂Va ta hatla va oma kukota byanyi,

va vuna ku fana ni swimilana swa rihlaza.

₃Wena tshemba HOSI, u endla leswinene,

kutani u ta tshamiseka etikweni, u nga chavisiwi hi nchumu.

₄Tsakela HOSI Xikwembu,

kutani xona xi ta ku nyika leswi mbilu ya wena yi swi navelaka.

₅Andlala makungu ya wena emahlweni ka HOSI Xikwembu,

xi tshembe, kutani xona xi ta tirha.

₆Xi ta ku khanisa, xi vangamisa ku lulama ka wena

ku fana ni dyambu ninhlekanhi.

₇Loko u ri emahlweni ka HOSI Xikwembu, miyela u langutela xona;

lava humelelaka etindleleni ta vona, kumbe lava endlaka makungu layo biha,

u nga tipandzisi nhloko hi vona.

₈Tshika ku hlundzuka, u fularhela vukari,

u nga tipandzisi nhloko, hikuva swi vanga leswo biha ntsena.

₉Lavo homboloka va ta herisiwa,

kasi lava tshembaka HOSI va ta kuma tiko, va ri teka ri va ra vona.

₁₀Ku nga ri khale, lavo homboloka va ta nyamalala,

u ta va lava endhawini ya vona, kambe u nge va kumi.

₁₁Kambe lava titsongahataka va ta kuma tiko ra vona,

va ta dya mihandzu ya rona leyo tala va tiphina.

₁₂Lowo homboloka ú boha makungu yo lwa ni lowo lulama,

a n'wi mpfhumpfhela,

₁₃kambe N'wini wa hinkwaswo ú hleka lavo homboloka,

hikuva wa swi vona leswaku siku ra ku avanyisiwa ka vona ri le kusuhi.

₁₄Lavo homboloka va hloma matlhari va konga ni vurha,

va lava ku herisa swisiwana ni lava pfumalaka,

va ringeta ku dlaya lava lulameke;

₁₅kambe matlhari ya vona ma ta tlhava vona vinyi,

vurha bya vona byi ta tshoveleriwa.

₁₆Leswitsanana leswi munhu wo lulama a nga na swona,

swi tlula rifuwo ra vanhu vo tala lavo homboloka;

₁₇matimba ya vona ma ta herisiwa,

kambe vanhu lavo lulama, HOSI Xikwembu xa va biyelela.

₁₈Masiku hinkwawo HOSI Xikwembu xi tikarhatela lava nga riki na xisandzu;

ndzhaka ya vona yi ta va kona hilaha ku nga heriki.

₁₉Enkarhini lowo tika va nge nyumisiwi,

va ta dya va xurha hambiloko dyandza ri ri kona;

₂₀kambe lavo homboloka va nge poni,

valala va HOSI Xikwembu va ta vuna kukota swiluva swa le nhoveni,

va ta tshwa va hela, va nyamalala.

₂₁Munhu wo homboloka ú tsakela ku lomba swa van'wana, kambe a nga swi tlherisi;

kasi lowo lulama ú twela vanhu vusiwana, wa hanana.

₂₂Hakunene, vanhu lava Xikwembu xi va katekisaka, va ta nyikiwa tiko ri va ra vona,

kambe lava xi va rhuketelaka, va ta humesiwa eka rona.

₂₃Munhu loyi HOSI Xikwembu xi tsakelaka mahanyelo ya yena,

ú nyikiwa hi xona ku famba a nga chavi nchumu.

₂₄Loko o tshuka a wile, a nge etleleli makumu,

HOSI Xikwembu xi ta n'wi khoma hi voko, xi n'wi pfuxa.

₂₅Ndzi vile jaha, sweswi ndzi dyuharile,

kambe a ndzi si vona Xikwembu xi tshika munhu wo lulama;

hambi va ri vana va yena a ndzi si va vona va kongomela swakudya.

₂₆Minkarhi hinkwayo ú twela van'wana vusiwana, a va lomba swa yena,

ni vana va yena va kateka.

₂₇Loko mi endla leswinene mi fularhela leswo biha,

mi ta tshamiseka minkarhi hinkwayo,

₂₈hikuva HOSI Xikwembu xi tsakela leswo lulama,

lava va xi khongelaka, a xi nga va tshiki empfhukeni,

xi ta va hlayisa hilaha ku nga heriki;

kambe vana va lavo homboloka vona va ta heriseriwa makumu.

₂₉Lavo lulama va ta nyikiwa tiko ri va ra vona,

va ta tshama eka rona hilaha ku nga heriki.

₃₀Nomo wa munhu wo lulama wu humesa swa vutlhari,

ririmi ra yena ri vulavula leswi lulameke.

₃₁Ú hlayisa nawu wa Xikwembu xa yena embilwini ya yena;

loko a famba, a nga khuguli hi nchumu.

₃₂Munhu wo homboloka ú xiyaxiya lowo lulama,

a lava ndlela ya ku n'wi dlaya;

₃₃kambe HOSI Xikwembu xi nge pfumeli leswaku lowo lulama a hluriwa hi lowo homboloka;

hambiloko lowo lulama a nga tisiwa ehubyeni, Xikwembu xi ta n'wi biyelela.

₃₄Tshemba HOSI Xikwembu, u famba endleleni ya xona,

xi ta ku tlakusa xi ku nyika tiko,

kutani u ta hlalela ku herisiwa ka lavo homboloka.

₃₅Ndzi vonile munhu wo homboloka, wo chavisa:

A a navile ku fana ni murhi wa matluka ya rihlaza.

₃₆Kuteloko ndzi tlhela ndzi hundza ha kona, a ndza ha n'wi kumanga;

ndzi lavile hinkwako, kambe a a nyamalarile.

₃₇Xiyaxiya lava nga riki na xisandzu, u languta lava lulameke,

u ta vona leswaku lava tisaka ku rhula, va ni vatukulu.

₃₈Kambe lava tiarisaka va ta herisiwa,

vatukulu va lavo homboloka a va nga ha vi kona.

₃₉Vanhu vo lulama va ponisiwa hi HOSI Xikwembu,

hi xona khokholo ra vona enkarhini wa khombo.

₄₀HOSI Xikwembu xa va pfuna ni ku va kutsula,

xi va lamulela eka lavo homboloka, xi va ponisa;

lavo lulama va sirheleriwa hi xona.