Pisalema ya 42

₁Ku fana ni ntswele ya mhunti

loko yi rilela nambu lowu khulukaka,

hi sweswo ni moya wanga,

wu rilela wena Xikwembu xanga.

₂Moya wanga wu twa torha ra Xikwembu,

ra Xikwembu lexi hanyaka.

Xana ndzi ta nghena rini eTempeleni ya xona,

ndzi ya yima emahlweni ka xona xana?

₃Mihloti i swakudya swa mina

vusiku ni nhlekanhi,

hikuva va tshamela ku ndzi vutisa va ku:

“Xana Xikwembu xa wena xi kwihi ke?”

₄Loko ndzi ri karhi ndzi phofula swa moya wanga,

ndzi tsundzuka swa khale,

hilaha a ndzi longoloka hakona ni lavakulu,

hi ya endlwini ya Xikwembu,

hi ri karhi hi ba minkulungwana ya ntsako ni ku yimbelela tinsimu ta minkhenso

hi ri emintshungwini leyi dyaka nkhuvo.

₅We moya wanga, u tlhavekela yini xana?

U vavisekela yini endzeni ka mina ke?

Tshemba Xikwembu! Mina ndza ha ta xi dzunisa,

xona Xikwembu xanga, muponisi wanga wa xiviri.

₆We HOSI, moya wanga wa tlhaveka endzeni ka mina,

hikokwalaho ndza ku anakanya

ndzi ri etikweni ra le Yordani ni ra Hermoni,

ni le ntshaveni ya Mizara.

₇Maxangu ya mina ma landzelelana kukota magandlati,

u ma pfumisa wonge i maboboma;

magandlati ya wena ni maboboma ya wena hinkwawo

ma hundzile hi le henhla ka mina.

₈Hambiswiritano, HOSI Xikwembu xi ta ndzi komba tintswalo loko ri xile,

nivusiku ndzi ta yimbelela risimu ra xona,

ndzi khongela xona

n'wini wa vutomi byanga.

₉Ndzi ta vutisa Xikwembu, ribye ra mina,

ndzi ku: “U ndzi tshikele yini?

Hikwalaho ka yini ndzi famba tanihi muferiwa,

ndzi ri karhi ndzi xanisiwa hi valala va mina xana?”

₁₀Ndzi titwa ndzi tshoveke swirho,

loko valala va mina va ndzi rhukana,

ni loko va tshamela ku ndzi vutisa va ku:

“Xana Xikwembu xa wena xi kwihi ke?”

₁₁We moya wanga, ú tlhavekela yini xana?

U vavisekela yini endzeni ka mina ke?

Tshemba Xikwembu! Mina ndza ha ta xi dzunisa,

xona Xikwembu xanga, muponisi wanga wa xiviri.