Pisalema ya 43

₁We Xikwembu, ndzi avanyisele mhaka ya mina,

u ndzi lwela eka vanhu lava nga khongeriki;

ndzi lamulele eka vanhu lavo homboloka,

lava kanganyisaka.

₂We Xikwembu, u khokholo ra mina,

xana u ndzi tshikele yini?

Hikwalaho ka yini valala va mina va ndzi xanisa,

kutani ndzi famba-famba tanihi muferiwa xana?

₃Ndzi kombe ku vonakala ka wena ni ntiyiso wa wena;

a swi ve swona swi ndzi fambisaka,

swi ndzi fikisa entshaveni ya wena leyo hlawuleka,

laha Tempele ya wena yi nga kona.

₄Kutani ndzi ta fika alitarini ya wena,

we Xikwembu lexi xi ndzi nyikaka ku tsaka;

ndzi ta yimbelela ndzi ku dzunisa hi swichaya-chayani,

wena u nga Xikwembu xanga.

₅We moya wanga, u tlhavekela yini ke?

U vavisekela yini endzeni ka mina xana?

Tshemba Xikwembu!

Hakunene, ndza ha ta xi dzunisa,

xona Xikwembu xanga, muponisi wanga wa xiviri.