Pisalema ya 58

₁N'wina varhangeri, xana hakunene mi avanyisa hi ku lulama xana?

Xana mi avanyisela vanhu timhaka ta vona hilaha swi fanelaka hakona xana?

₂E-e! Mi ehleketa ntsena ku endla leswo biha,

mi rhandza ku pfuxa tinyimpi laha misaveni.

₃Lavo homboloka va dyohile va ha ku velekiwa,

vahembi valavo va lahlekile ku sukela evuhlangini bya vona.

₄Va ni vuxungu ku fana ni nyoka,

va fana ni mhiri yo fa tindleve,

₅leyi nga yingisiki ku yimbelela ka n'wini wa yona lowa mungoma,

hambiloko mungoma loyi a ri nsini exikarhi ka vangoma-kulobye.

₆We Xikwembu, tshovelela meno ya tinghalanyana leti,

fayetela tinhlaya ta tona we HOSI.

₇A va dzudzeke va nyamalala ku fana ni mberha,

a va kandziyeriwe hansi va vuna kukota byanyi.

₈A va fambe ku fana ni humba leyi siyaka ritshepu ntsena;

a va nyamalale kukota n'wana la velekiweke a file.

₉Loko va nga si tiva nchumu, va tsuvule ku fana ni mahlampfu ya mitwa,

u va hisa hi vukari bya wena va ha hanya.

₁₀Munhu wo lulama ú ta tsaka loko a vona ku biwa ka lavo homboloka,

ú ta hlamba milenge engatini ya vona.

₁₁Vanhu va ta vula va ku: “Lavo lulama va vuyeriwa hakunene,

Xikwembu lexi avanyisaka misava, xi kona!”