Pisalema ya 93

₁Xikwembu i mufumi wa hinkwaswo, xi ambele vukulukumba;

xi tikhama hi matimba ya xona hikokwalaho misava yi tiyile yi nge tsekatseki.

₂We HOSI, xiluvelo xa wena u xi tiyisile ku sukela khale,

na wena u vile kona minkarhi hinkwayo.

₃Milambu ya pfuma we HOSI, yi pfuma ngopfu,

mpfumawulo wa yona wu twakala kule.

₄Kambe we HOSI ya le henhla-henhla u tlula hi matimba

milambu leyikulu leyi hobomulanaka ni magandlati layo chavisa ya lwandle.

₅Swileriso swa wena swi tiyile we HOSI,

Tempele ya wena yi fanele ku hlawuleka minkarhi hinkwayo.