Nhlavutelo 10

₁Kutani ndzi vona ntsumi yin'wana ya matimba yi xika hi le tilweni yi phutseriwile hi papa, yi ri ni nkwangulatilo ehenhla ka nhloko ya yona; nghohe ya yona a yi fana ni dyambu, milenge ya yona yi fana ni timhandze ta ndzilo. ₂Evokweni ra yona a yi ri ni xibukwana lexi phendliweke. Kutani yi veka nenge wa yona wa xinene elwandle, lowa ximatsi yi wu veka laha ku omeke, ₃yi huwelela hi rito leri tlakukeke ku fana ni loko nghala yi vomba. Loko yi huwelerile, ku twala ku dzindza ka matilo ya 7. ₄Kuteloko matilo ya 7 ma dzindzile, ndzi tilulamisela ku tsala, kambe ndzi twa rito leri humaka etilweni ri ku: “Hlayisa embilwini leswi vuriweke hi ku dzindza ka matilo lawa ya 7, u nga swi tsali.”

₅Kutani ntsumi leyi ndzi yi voneke yi yimile elwandle ni laha ku omeke, yi tlakusela voko ra yona ra xinene etilweni, ₆yi hlambanya hi vito ra Loyi a hanyaka hilaha ku nga heriki, la tumbuluxeke tilo ni leswi nga ka rona, ni misava ni leswi nga ka yona, ni lwandle ni leswi nga ka rona, kutani ntsumi yi ku: “A ku nga ha vi na ku hlwela, ₇kambe siku ntsumi ya vu-7 yi chayaka nanga, makungu ya Xikwembu lawa a ma fihliwile, lawa xi ma byeleke vaprofeta malandza ya xona, ma ta hetiseka.”

₈Kutani rito leri ndzi ri tweke ri huma etilweni, ri engeta kambe ri vulavula na mina ri ku: “Famba u ya teka buku leyi phendliweke, evokweni ra ntsumi leyi yimeke elwandle ni laha ku omeke.” ₉Hiloko ndzi ya eka ntsumi ndzi ya kombela leswaku yi ndzi nyika xibukwana lexi nge vokweni ra yona. Ntsumi yi ku ka mina: “Xi teke u xi dya; ekhwirini ra wena xi ta bava, kambe enon'weni xi ta tsokombela ku fana ni vulombe.” ₁₀Hiloko ndzi teka xibukwana evokweni ra ntsumi, ndzi xi dya. A xi tsokombela ku fana ni vulombe enon'weni, kambe loko ndzi xi dyile, ndzi twa xi ndzi luma-luma ekhwirini ra mina. ₁₁Kutani ndzi byeriwa leswi nge: “Wa ha fanele ku ya twarisa rito ra Xikwembu ehenhla ka vanhu va swivongo swo hambana-hambana, ni va matiko layo tala, ni va tindzimi to hambana-hambana, u ya byela ni tihosi leto tala.”