Zakariya 10

₁Kombelani mpfula eka HOSI Xikwembu

hi nkarhi hinkwawo wa yona,

hikuva hi xona xi nga muendli wa mapapa,

munyiki wa timpfula letikulu;

munhu un'wana ni un'wana,

xi n'wi mirisela swa le masin'wini.

₂Swifaniso leswi vatliweke swa swikwembu, swona swa hemba;

lava hlahluvaka va vona swivono leswi kanganyisaka,

milorho leyi va yi lorhaka i mavunwa ntsena,

ku khongotela ka vona a ku pfuni nchumu.

Hikokwalaho Vaisraele va tsendzeleka kukota tinyimpfu,

leti xanisekaka hi ku pfumala murisi.

₃Xikwembu xi ri:

“Ndzi hlundzukerile lava tiendlaka varisi;

lava tivulaka varhangeri, ndzi ta va tshinya;

hikuva mina HOSI ya matimba hinkwawo

ndzi tikarhatela ntlhambi wa mina va nga vanhu va le Yuda,

ndzi ta va endla tihanci ta mina ta nyimpi leti tiyeke.

₄Exikarhi ka vona ku ta huma vafambisi lavo tala,

hinkwavo va ta tiya kukota ribye ra yinhla,

kukota mhingu ya ntsonga kumbe vurha bya masocha.

₅Hinkwavo va ta va tinhenha enyimpini,

va kandziyela valala endzhopeni.

Va ta lwa va hlula, hikuva mina HOSI ndzi ta va na vona,

kutani va ta nyumisa valala va vona lava gadeke tihanci.

₆“Va ka Yuda ndzi ta va nyika matimba,

ndzi kutsula ni va ka Yosefa.

Ndzi ta va vuyisa, hikuva ndzi va twela vusiwana;

swi ta fana ni loko ndzi nga si tshama ndzi va cukumeta,

hikuva hi mina HOSI Xikwembu xa vona,

kutani ndzi ta va hlamula.

₇Va ka Efrayimi va ta fana ni tinhenha,

va ta tsaka onge va lo nwa vhinyo.

Vana va vona va ta swi vona va tsaka,

timbilu ta vona ti ta ndzi tsakela mina HOSI.

₈“Ndzi ta ba khwela ndzi va hlengeleta,

hikuva ndzi va kutsurile,

kutani va ta tala ku fana ni khale.

₉Hambileswi ndzi va hangalaseleke ematikweni,

va ta ndzi tsundzuka va ri kwale kule;

va ta kurisela kona vana va vona,

kambe va ta tlhela va vuya na vona.

₁₀Ndzi ta va vuyisa va huma etikweni ra Egipta,

ndzi ta va hlengeleta va suka etikweni ra Asiriya;

ndzi ta va tshamisisa etikweni ra Giliyadi ni ra Lebanoni,

va kondza va pfumala ni ndhawu.

₁₁Ndzi ta tsemakanya lwandle lero chavisa,

ndzi ba magandlati ya rona;

swidziva hinkwaswo swa nambu wa Nilo swi ta phya.

Ku tikurisa ka Vaasiriya ku ta herisiwa,

Vaegipta va ta tekeriwa nhonga ya vona ya vuhosi.

₁₂Kambe vanhu va mina ndzi ta va tiyisa,

va ta hanya hi ndlela leyi yi ndzi tsakisaka.

Ndzi vurisa sweswo mina HOSI.”