I Tikronika 4

₁Vana va Yuda hi lava: Perese, na Hesironi, na Karimi, na Huru, na Xobala. ₂Xobala a veleka Reyaya, Reyaya a veleka Yahata, Yahata a veleka Ahumayi na Lahada. Lava hi vona vatata wa va le Sora. ₃Vana va Etamu i Yizriele, na Ixima, na Yidibaxa, makwavo wa vona wa xisati a ri Haseleli-Poni. ₄Penuwele i tata wa va le Gedori; Ezere yena i tata wa va le Huxa. Lava hi vona vana va Huru mativula ya Efrata, ni tata wa va le Betlehema. ₅Axuru tata wa va le Tekowa a a ri ni vasati vambirhi, Hela na Naara. ₆Naara i mana wa vanhu lava: Ahuzama, na Hefere, na Temeni, na Ahaxitari; hinkwavo i vana va Naara. ₇Hela i mana wa vanhu lava: Sereta, na Yisihara, na Etinana. ₈Hakosi i tata wa Anuba na Sobeba, naswona i tata wa va ka Aharele wa Harumu.

₉A ku ri ni wanuna wo fundzheka ku tlula vamakwavo, loyi a va ku i Yabese; mana wakwe a a n'wi thyile vito ra Yabese (hileswaku “maxangu”), hikuva a a ku: “Ndzi xanisekile loko ndzi n'wi veleka!” ₁₀Kutani Yabese a khongela Xikwembu xa Israele, a ku: “We Xikwembu, ndzi kombela leswaku u ndzi katekisa, u tlhengusa ni mindzilekana ya tiko ra mina, u ndzi biyelela eka leswo biha leswi swi nga ndzi xanisaka.” Kutani Xikwembu xi n'wi nyika leswi a swi kombeleke.

₁₁Kelubi makwavo wa Xuwa a veleka Mehiri, Mehiri a veleka Exitoni, ₁₂Exitoni a veleka Beta-Rhafa, na Paseyaka, na Tehina tata wa Iri-Nahaxa. Lava hi vona va ka Rheka. ₁₃Vanhu va Kenazi i Otiniele na Seraya. Vana va Otiniele i Hatati na Meonotayi. ₁₄Meonotayi i tata wa Ofira. Seraya i tata wa Yowabu, Yowabu i tata wa va le Geharaxi (hileswaku “va-le-nkoveni-wa-vatirhi”), hikuva a va tiva mintirho ya mavoko. ₁₅Vana va Kalebe wa Yefune i Iru, na Ela, na Naama; n'wana Ela i Kenazi. ₁₆Vana va Yehaleleli i Zifi, na Zifa, na Tiriya, na Asarele. ₁₇Vana va Ezra i Yetere, na Merede, na Efere, na Yaloni. Nsati wa Merede i Bitiya n'wana Faro. Vana va vona i Meriyamu, na Xamayi, na Yixiba tata wa va le Exitemoka. ₁₈Merede a tlhela a teka nsati exikarhi ka va ka Yuda, kutani va veleka Yerede tata wa va le Gedori, na Hevere tata wa va le Soko, na Yekutiele tata wa va le Zanowaka. ₁₉Nsati wa Hodiya a a ri makwavo wa Nahamu; vana va vona i vatata wa va ka Keyila va le Garimi, ni vatata wa va ka Exitemoka va le Maaka. ₂₀Vana va Ximoni hi lava: Aminoni, na Rhina, na Beni-Hanani, na Tiloni. Vana va Yixi hi lava: Zohete na Beni-Zohete. ₂₁Vana va Xela n'wana Yuda i Ere tata wa Leka, na Layada tata wa Marexa, ni vanhu va le Beta-Axabeya lava tivaka ku luka swa ntsembyani, ₂₂ni va le Yokimi, ni va le Kozeba, ni va le Yowaxi, ni va le Sarafu lava nga teka vasati etikweni ra Mowabu, va tlhelela eBetlehema. Matimu ya vanhu lava i ya khale swinene; ₂₃hinkwavo a va ri vavumbi va timbita, va tshama ni hosi ya vona le Netayimi ni le Gedera, va ri karhi va yi tirhela.

₂₄Vana va Simiyoni hi lava: Nemuwele, na Yamini, na Yaribi, na Zera, na Xawulu. ₂₅N'wana Xawulu i Xalumi, n'wana Xalumi i Mibisama, n'wana Mibisama i Mixima. ₂₆Va ka Mixima hi lava: N'wana Mixima i Hamuwele; n'wana Hamuwele i Zakuru; n'wana Zakuru i Ximeyi. ₂₇Hambileswi Ximeyi a velekeke vana va xinuna va 16 ni va xisati va 6, vamakwavo wa yena vona a va kumanga vana lavo tala; hikokwalaho vanhu va nyimba ya ka Simiyoni a va andzanga ku fana ni vanhu va nyimba ya ka Yuda. _28-31Miti leyi va ka Simiyoni va tshameke eka yona ku kondza loko Davhida a vekiwa ku va hosi, hi leyi: Berexeba, na Molada, na Hasari-Xuwela, na Biliha, na Esemu, na Tolada, na Betuwele, na Horma, na Sikilaga, na Beta-Marikaboto, na Hasari-Susimi, na Beta-Biri, na Xaarayimi; hi yona miti ya kona leyikulu. ₃₂Kutani miti yin'wana ya va ka Simiyoni hi leyi: Etamu, na Ayini, na Rimoni, na Tokene, na Axani; hinkwayo i ntlhanu. ₃₃Kusuhi ni miti leyi, a ku ri ni swimitana leswo tala, ku ya fika emutini wa Baali. Hi kona laha va ka Simiyoni a va tshama kona; naswona a va hlayisa matsalwa ya xivongo xa ka vona.

_34-38Lawa i mavito ya varhangeri va tindlu ta nyimba ya va ka Simiyoni: Mexobaba, na Yamileke, na Yoxa n'wana Amasiya, na Yuwele, na Yehu n'wana Yoxibiya, wa Seraya, wa Asiele; na Eli-Howenayi, na Yaakoba, na Yexohaya, na Asaya, na Adiele, na Yesimiele, na Benaya; na Ziza n'wana Xifi, wa Aloni, wa Yedaya, wa Ximri, wa Xemaya. Miti ya varhangeri lava yi kula, ₃₉yi nava ku ya fika ni le kusuhi ni xiphandze xa Gedori hi tlhelo ra nkova leri langutaka evuxeni, vaaki va yona va ri karhi va lava madyelo ya swifuwo swa vona, ₄₀kutani va ya kuma kona madyelo layo saseka lama noneke, etikweni leri anameke ra ku rhula, leri khale a ri tshama va ka Hamu. ₄₁Kambe enkarhini wa ku fuma ka Hezekiya etikweni ra Yuda, va ka Simiyoni lava mavito ya vona ma ha ku vuriwaka, va ya hlasela mintsonga ya va ka Hamu, va herisa ni swivala swa vona hinkwaswo, va dlaya ni vaaki va kona ku nga sali na un'we, kutani va teka tiko ra vona, hikuva madyelo ya rona ya swifuwo a ma sasekile swinene.

₄₂A ku ri ni ntlawa wa masocha ya 500 ya va ka Simiyoni, lowu a wu fambisiwa hi va ka Yixi, va nga lava: Peletiya, na Neyariya, na Refaya, na Uziele; masocha lawa ma kongomile entshaveni ya Seyira, ₄₃ma fika ma herisa masalela ya Vaamaleke, ma va tekela tiko ri va ra wona; kutani ni namuntlha ra ha ri ra wona.