I Tikronika 9

₁Hi mukhuva lowu, Vaisraele hinkwavo va tsariwa ebukwini ya “Matimu ya tihosi ta Israele”, hi ku ya hi tinyimba ta ka vona.

Va ka Yuda a va yisiwile evukhumbini le Babilona, hikuva a va nga tshembekanga eka Xikwembu. ₂Loko va huma eBabilona, lava nga rhanga va tlhelela etindhawini ta vona ni le mitini ya vona i vanhu ntsena, va landziwa hi vaprista, ni Valevhi, ni vatirhi va le Tempeleni.

₃Van'wana va tinyimba ta Yuda, na Benjamini, na Efrayimi, na Manase va yile va ya tshama eYerusalema.

₄Eka nyimba ya Yuda, a ku ri na Utayi n'wana Amihudi, wa Omri, wa Imri, wa Bani, munhu wa ndyangu wa ka Perese. ₅Va ndyangu wa ka Xiloni, a ku ri na Asaya hosi ya vona, swin'we ni vana va yena. ₆Naswona a ku ri na Yuwele wa ndyangu wa ka Zera. Kutani va ka Yuda hinkwavo lava a va ri eYerusalema, a va ringana 690.

₇Eka nyimba ya Benjamini, a ku ri na lava: Salu n'wana Mexulama, wa Hodavhiya, wa Hasenuwa; ₈na Yibineya n'wana Yerobama; na Ela n'wana Uzi, wa Mikri; na Mexulama n'wana Xefatiya, wa Ruwele, wa Yibiniya. ₉Vanhu lava hinkwavo a va ri varhangeri emindyangwini ya ka vona. Kutani va ka Benjamini hinkwavo lava a va ri eYerusalema, a va ringana 956.

₁₀Eka ntlawa wa vaprista, a ku ri na lava: Yedaya, na Yoyaribi, na Yakini. ₁₁A ku ri na Azariya n'wana Hilkiya, wa Mexulama, wa Sadoki, na Merayoto, wa Ahituba; a a ri yena mufambisi wa mintirho ya le Tempeleni. ₁₂Naswona a ku ri na Adaya n'wana Yerohama, wa Paxahuru, wa Malikiya; na Maasayi n'wana Adiele, wa Yahazera, wa Mexulama, wa Mexilemi, wa Imere. ₁₃Vaprista lava a va rhangela mindyangu ya ka vona; a va ri vanhu va ndzhuti, va fambisa mintirho hinkwayo ya le Tempeleni. Loko va katsiwa ni vaprista lavan'wana, ntlawa wa vona a wu ri vanhu va 1 760.

₁₄Eka ntlawa wa Valevhi, a ku ri na Xemaya n'wana Haxuba, wa Azirikama, wa Haxabiya, un'wana wa va ka Merari. ₁₅Naswona a ku ri na Bakabakara, na Herexe, na Galali, na Mataniya n'wana Mika, wa Zikri, wa Asafa; ₁₆a ku ri na Obadiya n'wana Xemaya, wa Galali, wa Yedutuni; na Berekiya n'wana Asa, wa Elkana. Berekiya ni va ka vona a va tshama eswimitaneni swa le Netofa.

₁₇Eka ntlawa wa varindzi va le nyangweni, a ku ri na lava: Xalumi, na Akubu, na Talimoni, na Ahimani, ni va ka vona hinkwavo, Xalumi a ri yena murhangeri; ₁₈ni namuntlha va ha ri vona lava rindzaka Nyangwa-ya-Hosi, yi nga nyangwa ya Tempele leyi langutaka evuxeni; naswona khale loko Valevhi va ha ri emixaxeni ya vona, vanhu lava va mune a va ri varindzi va nyangwa ya kona. ₁₉Xalumi n'wana Kore, wa Ebiyasafa, wa Kora, swin'we ni va ka Kora hinkwavo, a va ri ni ntirho wa ku rindza etinyangweni ta Tempele, hilaha vatata wa vona va rindzeke hakona enyangweni ya Ntsonga lowo Hlawuleka, loko vanhu va HOSI Xikwembu va ha tshama emixaxeni. ₂₀Eminkarhini ya khale, Finiyasi n'wana Eliyazara a a ri mufambisi wa vona, hikuva HOSI Xikwembu a xi ri na yena. ₂₁Un'wana wa varindzi enyangweni ya Ntsonga lowo Hlawuleka, a a ri Zakariya n'wana Mexelemiya.

₂₂Vanhu lava hinkwavo lava vekiweke ku rindza etinyangweni ta Ntsonga lowo Hlawuleka, a va ringana 212, va tsariwile eswimitaneni swa vona hi ku ya hi mindyangu ya ka vona; a va ri entirhweni wa masiku hinkwawo lowu wu sunguriweke hi Davhida na Samiele mavonakule. ₂₃Vona ni varikwavo a va ri entirhweni wa ku rindza tinyangwa ta Ntsonga lowo Hlawuleka, yi nga yona yindlu ya HOSI Xikwembu. ₂₄A ku ri ni varindzi va tinyangwa ematlhelweni ya mune ya Tempele, van'wana a va ri evuxeni, van'wana evupeladyambu, van'wana en'walungwini, van'wana edzongeni. ₂₅Va ka vona lava a va tshama eswimitaneni, a va hamba va ta ku ta va pfuna entirhweni, va heta masiku ya 7 va ri na vona. ₂₆Varindzi va mune lavakulu va nga va ka Levhi, a va rindza ni makamari ya Tempele ni yindlu ya yona ya vuhlayiselo. ₂₇A va boheka ku etlela exivaveni xa Tempele, hikuva a va rhwexiwile ntirho wa ku yi rindza, ni wa ku pfula tinyangwa ta yona mixo wun'wana ni wun'wana.

₂₈Van'wana va ka Levhi a va hlayisa swibya swa magandzelo, va swi hlaya loko swi humesiwa ni loko swi vuyisiwa. ₂₉Van'wana a va rhwexiwile ntirho wa ku hlayisa swingolongondzwana leswo hlawuleka hinkwaswo, va hlayisa ni swa magandzelo ku nga vhinyo, ni mafurha, ni mirhi ya risuna, ni swinun'hweriso. ₃₀Van'wana exikarhi ka vaprista a va tirha ku hlanganisela swinun'hweriso sweswo. ₃₁Mulevhi un'wana loyi va nge i Matitiya mativula ya Xalumi wa ka Kora, a a rhwexiwile ntirho wa ku sweka swimbhundzwa swa magandzelo. ₃₂Van'wana varikwavo, va ndyangu wa ka Kohata, a va fanele ku vona leswaku xinkwa xa magandzelo xi va kona vhiki rin'wana ni rin'wana hi siku ra Savata.

₃₃Van'wana va ka Levhi lava a va ri varhangeri emindyangwini ya ka vona, a va vona swa vuyimbeleri, va nga tirhi swin'wana, va tshama emakamarini ya vona eTempeleni, hikuva ntirho wa vona a wu tirhiwa vusiku ni nhlekanhi. ₃₄Hinkwavo lava a va ri vakulukumba; a va rhangela mindyangu ya ka Levhi, va tshama eYerusalema.

₃₅Emutini wa Gibiyoni, a ku tshama Yehiele tata wa va le Gibiyoni; nsati wa yena a a ri Maaka. ₃₆Vana va yena hi ku tlhandlamana ka vona hi lava: Abidoni, na Suru, na Kixi, na Baali, na Neri, na Nadabu, _37-38na Gedori, na Ahiyo, na Zakariya, na Mikiloto tata wa Ximeya; Mikiloto ni n'wana wa yena a va tshama eYerusalema kun'we ni van'wana va ka vona. ₃₉Neri hi yena tata wa Kixi; n'wana Kixi i Sawulo; vana va Sawulo i Yonatani, na Maliki-Xuwaka, na Abinadaba, na Exi-Baali. ₄₀N'wana Yonatani i Meriba-Baali; n'wana Meriba-Baali i Mika; ₄₁vana va Mika i Pitoni, na Meleki, na Tareya, na Ahazi. ₄₂Ahazi i tata wa Yara, Yara i tata wa Alemete na Azimavhete na Zimri; Zimri i tata wa Mosa. ₄₃Mosa i tata wa Bineya; n'wana Bineya i Refaya; n'wana Refaya i Eliyasa; n'wana Eliyasa i Asele. ₄₄Asele a a ri ni vana va 6 va xinuna; mavito ya vona hi lawa: Azirikama, na Bokeru, na Iximaele, na Xeyariya, na Obadiya, na Hanana. Hinkwavo lava hi vona va ka Asele.