I Vatesalonika 3

₁Hi ku vona leswaku a hi nga ha koti ku tiyisela, hi tihlawulele ku sala hi ri hexe le Atena. ₂Kutani hi mi rhumele Timotiya makwerhu, la tirhelaka Xikwembu ku fana na mina entirhweni wa Evhangeli ya Kriste; hi n'wi rhumele leswaku a ta mi tiyisa ni ku mi khongotela eku pfumeleni ka n'wina, ₃ni leswaku ku nga vi na un'we la tsekatsekisiwaka hi mahlomulo lawa; hikuva mi tiva na n'wina leswaku hi swona leswi hi averiweke swona. ₄Hikuva loko ha ha ri le ka n'wina, hi mi tivisile swi nga si humelela leswaku hi ta vona maxangu. Kutani swi fambise sweswo, hilaha mi tivaka hakona. ₅Hikokwalaho, hi ku vona leswaku a ndzi nga ha koti ku tiyisela, ndzi rhumerile rito, leswaku ndzi ta twa ta ku pfumela ka n'wina; a ndzi chava leswaku kumbexana muringi a nga va a mi ringile, ni leswaku ku tikarhata ka hina ku nga va ku hundzukile swa hava.

₆Kambe sweswi Timotiya wa ha ku vuya hi le ka n'wina, kutani ú hi tisele mahungu lamanene ya ku pfumela ka n'wina, ni ya rirhandzu ra n'wina; ú hi tivisile leswaku ma ha hi anakanya hi moya lowunene masiku hinkwawo, mi navela ku hi vona tanihi leswi na hina hi navelaka ku mi vona. ₇Hikokwalaho, vamakwerhu, emaxangwini ni le mahlomulweni hinkwawo ya hina, hi kumile ku chaveleriwa hi ku pfumela ka n'wina, ₈hikuva sweswi ha hanya hi leswi mi yimeke mi tiyile eHosini. ₉Xana ku nkhensa ka hina eka Xikwembu hikwalaho ka n'wina ku nga va loku ko yini xana? Eku tsakeni hinkwako loku hi ku twaka emahlweni ka Xikwembu xa hina hikwalaho ka n'wina, ₁₀hi khongela eka xona hi matimba vusiku ni nhlekanhi, hi ri karhi hi kombela ku vonana na n'wina hi mahlo, ni ku tatisa leswi kayivelaka eku pfumeleni ka n'wina.

₁₁Mawaku loko hi nga pfuleriwa ndlela yo ta kwaleyo ka n'wina, hi Xikwembu Tata wa hina hi xiviri xa xona, swin'we ni Hosi ya hina Yesu. ₁₂Ingi Hosi yi nga kurisa ni ku andzisa rirhandzu leri mi rhandzanaka ha rona ni ku rhandza van'wana ha rona, ku fana ni leswi na hina hi mi rhandzisaka xiswona; ₁₃hi mukhuva wolowo, yi ta tiyisa timbilu ta n'wina, kutani mi ta pfumala nandzu, mi va lava hlawulekeke emahlweni ka Xikwembu Tata wa hina, siku Hosi ya hina Yesu a nga ta vuya ha rona, swin'we ni vahlawuriwa va yena hinkwavo.