II Tikronika 4

₁Solomoni a endla alitari hi koporo; alitari leyi a yi anamile 10 m matlhelo hinkwawo, yi lehile 5 m ku ya henhla. ₂Kutani a n'okisa koporo, a vumba ha yona nhlambeto leyikulu ya xirhendzevutana leyi a va ku i “Lwandle”. Mpandzo wa yona a wu ri 5 m, yi lehile 2,50 m ku ya henhla; ndzhendzeleko wa yona a wu ri mpimo wa ngoti ya 15 m. ₃Nhlambeto leyi a yi rhendzeriwile hi swifaniso swa marhanga hansi ka nomo wa yona, ma rhendzela nhlambeto hi tinxaxa timbirhi, hi mpfhuka wa ndzhendzeleko wa 15 m, ma n'okisiwile swin'we ni nhlambeto. ₄Nhlambeto a yi tlhandlekiwile ehenhla ka swifaniso swa tihavi ta 12; tinharhu a ti languta en'walungwini, tinharhu evupeladyambu, tinharhu edzongeni ni tinharhu evuxeni, ti hlangana hi tinyonga ehansi ka nhlambeto. ₅Nhlambeto a yi tsindziyerile 8 cm, nomo wa yona wu vumbekile tanihi xibya xa nomo wo voyamela ehandle, kumbe tanihi makamba ya swiluva swa makhon'wa. Nhlambeto leyi a yi hlayisa mati yo ringana tinkho ta 120. ₆Solomoni a vumba ni masambelo ya khume. Kutani a teka ntlhanu a ma veka hi tlhelo ra le dzongeni, laman'wana ya ntlhanu a ma veka hi tlhelo ra le n'walungwini. Nyama ya swifuwo swa magandzelo a yi hlantsweriwa kona. Kasi vaprista vona a va hlamba hi mati ya nhlambeto leyikulu.

₇Kutani Solomoni a vumba switlhoma-timboni swa khume swa nsuku hilaha swi lerisiweke hakona, a swi veka eTempeleni, ntlhanu hi tlhelo ra le dzongeni, ntlhanu hi tlhelo ra le n'walungwini. ₈A vatla matafula ya khume, a ma nghenisa eTempeleni, a veka ntlhanu hi tlhelo ra le dzongeni, ni ntlhanu hi tlhelo ra le n'walungwini, a vumba ni minkambana ya dzana ya nsuku. ₉Kutani a aka xivava xa vaprista ni xivava lexikulu xa vanhu, ni tinyangwa ta swona, a nameka koporo etimbantini ta kona. ₁₀Nhlambeto leyikulu leyi vuriwaka “Lwandle”, Solomoni a yi tikirheta kusuhi ni yinhla ya le dzonga-vuxa bya Tempele.

₁₁Huramu-Abi a endla ni timbita, ni minkombe, ni minkambana. Hi ndlela leyi, a dlayiseta ntirho hinkwawo wa Tempele lowu a a lerisiwile hi hosi Solomoni, swi nga leswi: ₁₂Tiphuphu timbirhi ni swidlodlo swo fana ni nhlambeto etinhlokweni ta tiphuphu letimbirhi; ni swikhaviso swimbirhi swa matavala leswi sasekisaka swidlodlo swimbirhi etinhlokweni ta tiphuphu; ₁₃ni swifaniso swa 400 swa swihenge leswi yimisiweke hi tinxaxa timbirhi, swi khomanisiwile ni matavala mambirhi, swi sasekisa swidlodlo leswimbirhi etinhlokweni ta tiphuphu. ₁₄A endla ni swigolonyana, ni swihlambelo leswi nga henhla ka swigolonyana, ₁₅ni nhlambeto leyikulu leyi vuriwaka “Lwandle”, ni tihavi ta 12 leti rhwalaka nhlambeto. ₁₆Timbita, ni minkombe, ni tiforoko, ni swingolongondzwana hinkwaswo swa Tempele, leswi Huramu-Abi a swi vumbeke hi ku lerisiwa hi hosi Solomoni, a swi ri swa koporo leyi vangamisiweke. ₁₇Ú n'okisile koporo ya swona hi ku tirhisa misava ya vumba leyi kumekaka exikarhi ka Sukoti na Sereda enkoveni wa Yordani. ₁₈Swingolongondzwana hinkwaswo leswi Solomoni a swi endleke a swi tele ngopfu, ni ku tika ka koporo ya kona a ku tiviwi hi munhu.

₁₉Kutani Solomoni a lavela Tempele swingolongondzwana hinkwaswo swa yona, swi nga leswi: Alitari ya nsuku; ni matafula ya xinkwa xa magandzelo; ₂₀ni switlhoma-timboni; ni timboni ta kona ta nsuku lowo tenga leti pfurhaka emahlweni ka xivandla lexo hlawuleka xa le mpfungwe, hilaha swi lerisiweke hakona; ₂₁ni swiluva, ni timboni; ni tintlama ta nsuku lowo tenga swinene; ₂₂ni swikero swo tsema tingoti ta timboni; ni minkambana; ni swimbitana swo hisela mirhi ya risuna eka swona; ni timbita to oka ndzilo ha tona, ta nsuku lowo tenga; ni swihayeko swa timbanti ta Tempele, ti nga timbanti ta xivandla lexo hlawuleka ngopfu xa le mpfungwe, ni timbanti ta xivandla lexo hlawuleka; swihayeko leswi hinkwaswo a swi ri swa nsuku.