Ta ku fuma ka Yowasi eYuda
1Hi lembe ra vu-7 ra ku fuma ka Yehu, Yowasi a sungula ku fuma, kutani a fuma malembe ya 40 a ri eYerusalema. Mana wa yena a a ri Sibiya, wa le Berexeba. 2Yowasi ú endlile leswi lulameke emahlweni ka HOSI Xikwembu emasikwini hinkwawo lawa muprista Yoyada a n'wi kombeke tindlela ha wona. 3Hambiswiritano, swa le switsungeni leswo hlawuleka a nga swi tshikanga, hikuva vanhu va yile emahlweni va humesa magandzelo ni ku hisa mirhi ya risuna eswitsungeni leswi.
4Siku rin'wana, Yowasi a lerisa vaprista, a ku: “Tekani mali hinkwayo yo tirha leswo hlawuleka leyi tisiwaka endlwini ya HOSI Xikwembu, yi nga mali ya nhlengo lowu bohaka munhu un'wana ni un'wana hi ku ya hi xiyimo xa yena, mi teka ni mali ya tinyiko hinkwato leti vanhu va ti humesaka endlwini ya HOSI Xikwembu hi ku titwa ka vona. 5Muprista un'wana ni un'wana a a teke mali leyi emavokweni ya lava a pfunanaka na vona kutani mi yi tirhisa ku pfala timfa ta Tempele, hinkwako lomu khumbi ri kumekaka ri handzukile.”
6Hambiswiritano, hi lembe ra 23 ra ku fuma ka hosi Yowasi, vaprista a va nga si pfala timfa ta khumbi ra Tempele. 7Hiloko hosi Yowasi a vitana muprista Yoyada ni vaprista van'wana, a va vutisa a ku: “Hikwalaho ka yini mi nga pfalanga timfa ta Tempele xana? Ku sukela sweswi, mi nga ha tshami na mali leyi humaka emavokweni ya vapfuni va n'wina, kambe mi yi nyiketa eka lava pfuxaka Tempele.” 8Kutani vaprista va twanana leswaku a va nga ha teki mali emavokweni ya vanhu, ni leswaku ntirho wo pfuxa Tempele a wu nga ha vi emavokweni ya vona.
9Kutani muprista Yoyada a teka bokisi, a boxa xipfalo xa rona, a ri veka etlhelo ka alitari, evokweni ra xinene loko munhu a nghena endlwini ya HOSI Xikwembu; kutani vaprista hinkwavo lava rindzaka tinyangwa, a va hoxa eka rona mali hinkwayo leyi tisiwaka endlwini ya HOSI Xikwembu. 10Loko va vona leswaku bokisi ri tele, matsalani wa hosi ni mupristankulu a va ta, va ta hlaya mali leyi amukeriweke endlwini ya HOSI Xikwembu, va yi boha eswinkwamaneni. 11Loko va yi tsarisile, a va yi tamerisa vafambisi va ntirho lava vonaka swo pfuxa yindlu ya HOSI Xikwembu, kutani vona a va hakela vatirhi lava pfuxaka Tempele, va nga vavatli va timhandze, 12ni lava vatlaka maribye, ni lava akaka hi maribye; naswona, a va xava ha yona timhandze ni maribye lama vatliweke yo pfala timfa ta yindlu ya HOSI Xikwembu, ni swin'wana hinkwaswo leswi lavekaka ku pfuxa Tempele. 13Kutani mali leyi tisiwaka endlwini ya HOSI Xikwembu, a va ha yi tirhisanga ku endla swinwelo swa silivhere, ni swikero swo tsemeta tingoti ta timboni, ni minkambana, ni swibya swin'wana hinkwaswo swa yindlu ya HOSI Xikwembu, swa nsuku kumbe swa silivhere, 14hikuva mali leyi, a yi tamerisiwa vafambisi va ntirho, kutani ha yona a va pfuxa yindlu ya HOSI Xikwembu. 15Naswona, vavanuna lava khomisiweke mali leswaku va ya yi nyika vafambisi va ntirho, a va nga vutisiwi nchumu hi tlhelo ra yona, hikuva a va tirha hi ku tshembeka. 16Loko yi ri mali ya magandzelo yo riha milandzu ni ya timhamba to susa swidyoho, yona a yi nga tisiwi endlwini ya HOSI Xikwembu, kambe a yi ri ya vaprista.
Ta ku hela ka mfumo wa Yowasi
17Enkarhini wolowo, Hazaele hosi ya le Siriya a hloma matlhari, a ya lwa ni muti wa Gati, kutani a wu hlula. Kambe loko Hazaele a tilulamisela ku ya hlasela Yerusalema, 18Yowasi hosi ya Yuda a humesa swilo hinkwaswo leswi vakokwa wa yena Yoxafati na Yehoramu na Ahaziya, tihosi ta Yuda, va swi nyiketeke eka Xikwembu, a teka ni swilo leswi yena n'wini a swi nyiketeke eka xona, swin'we ni nsuku hinkwawo lowu a wu ri evuhlayiselweni bya xuma xa Tempele, ni le ntsindza; kutani a swi rhumela Hazaele hosi ya le Siriya. Kavaloko Hazaele a tshika makungu yo ya hlasela Yerusalema.
19Kutani ke, mintirho leyin'wana ya Yowasi, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. 20Siku rin'wana malandza ya yena ma n'wi tshama xikungu, kutani ma n'wi dlaya kusuhi ni khokholo leri vuriwaka Milo, endleleni leyi rhelelaka yi ya eSila. 21Lava nga n'wi ba va n'wi dlaya, a va ri malandza ya yena Yozakari n'wana Ximeyata na Yozabadi n'wana Xomere. Kutani Yowasi a lahliwa ni vakokwa wa yena emutini wa Davhida, Amasiya n'wana wa yena a sala a funa.
