II Tihosi 24

₁Enkarhini wa Yoyakimi, Nebukadnetsara hosi ya le Babilona a hloma nyimpi, kutani Yoyakimi a va ehansi ka yena; kambe loko malembe manharhu ma hundzile, Yoyakimi a hundzukela Nebukadnetsara, a n'wi pfukela. ₂HOSI Xikwembu xi rhumela mavuthu ya Vakalediya, ni ya Vasiriya, ni ya va le Mowabu, ni ya Vaamoni, ma ya lwa na Yoyakimi; xi ma rhumela leswaku ma ya lwa na tiko ra Yuda, ma ri herisa, hilaha xi vuleke hakona hi milomo ya vaprofeta malandza ya xona. ₃Hakunene vanhu va Yuda va humeleriwile hi makhombo lawa hi ku lerisa ka HOSI Xikwembu, leswaku va yisiwa kule na xona hikwalaho ka swidyoho swa Manase ni hinkwaswo leswi a swi endleke; ₄Manase a a dlayile vanhu lava a va nga ri na nandzu, a tata Yerusalema hi ngati ya vona, kutani HOSI Xikwembu a xa ha swi lavanga ku n'wi rivalela. ₅Kutani ke, mintirho leyin'wana ya Yoyakimi, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. ₆Yoyakimi a tietlelela, kutani n'wana wa yena Yoyakini a sala a fuma.

₇Hosi ya le Egipta a ya ha engetanga yi huma-huma etikweni ra yona, hikuva matiko hinkwawo lawa khale a ma ri ehansi ka yona a ma tekiwile hi hosi ya le Babilona, ku sukela endzilekaneni wa Egipta, ku ya fika enambyeni wa Yufrata.

₈Yoyakini a a ri ni malembe ya 18 loko a sungula ku fuma, kutani a fuma tin'hweti tinharhu a ri eYerusalema. Mana wa yena a a ri Nehuxita N'wa-Elnatani wa Yerusalema. ₉A endla leswo biha emahlweni ka HOSI Xikwembu, ku fana ni hinkwaswo leswi tata wa yena a swi endleke.

₁₀Enkarhini wolowo, mavuthu ya Nebukadnetsara hosi ya le Babilona ma tlhandlukela emutini wa Yerusalema ku ya wu hlasela, ma wu rhendzela. ₁₁Nebukadnetsara hosi ya le Babilona a ta hi yexe loko mavuthu ya yena ma ri karhi ma rhendzela muti, a ta fika kusuhi na wona. ₁₂Kutani Yoyakini hosi ya Yuda a huma emutini, a ya tinyiketa eka hosi ya le Babilona, a ri ni mana wa yena, ni malandza ya yena, ni tindhuna ta yena, ni valanguteri va le ntsindza wa yena. Hosi ya le Babilona, loko yi khoma Yoyakini, a yi ri elembeni ra vu-8 ra ku fuma ka yona. ₁₃Hilaha HOSI Xikwembu xi vuleke hakona khale, Nebukadnetsara a phangha xuma hinkwaxo xa yindlu ya HOSI Xikwembu, ni xuma xa le ntsindza; a fayetela swigotso swa nsuku hinkwaswo swa le Tempeleni ya HOSI Xikwembu, leswi a swi endliwile hi Solomoni hosi ya Vaisraele. ₁₄Nebukadnetsara a yisa vaaki hinkwavo va Yerusalema evukhumbini, ni tindhuna hinkwato, ni vafumi hinkwavo; ntsengo wa vakhomiwa va kona a wu ringana 10 000, ehandle ka nhlayo ya vavatli ni vafuri va tinsimbhi. A nga siyanga ni munhu ni un'we etikweni, handle ka swisiwana. ₁₅A yisa Yoyakini evukhumbini eBabilona, swin'we ni nkosikazi mana wa yena, ni vasati va yena, ni valanguteri va muti wa yena, ni tinganakana ta tiko; a va susa eYerusalema, a va yisa eBabilona va ri mahlonga. ₁₆Nebukadnetsara a teka vafumi hinkwavo vo ringana 7 000, ni vavatli swin'we ni vafuri vo ringana 1 000, a va yisa evukhumbini eBabilona; hinkwavo a va ri lava tiyeke, lava kotaka ku lwa nyimpi. ₁₇Kutani hosi ya le Babilona yi veka Mataniya ndzisana ya tata wa Yoyakini, leswaku a va hosi; a hundzuluxa vito ra yena, a n'wi thya ra Sedekiyasi.

₁₈Sedekiyasi a a ri ni malembe ya 21 loko a sungula ku fuma, kutani a fuma malembe ya 11 a ri eYerusalema. Mana wa yena a a ri Hamutala, N'wa-Yeremiya wa le Libina. ₁₉A endla leswo biha emahlweni ka HOSI Xikwembu, ku fana ni hinkwaswo leswi Yoyakimi a swi endleke. ₂₀Leswi humeleleke eYerusalema ni le tikweni ra Yuda, swi vangiwile hi vukari bya HOSI Xikwembu, kutani swi fika laha xi va cukumetaka kule na xona.

Kavaloko Sedekiyasi a pfukela hosi ya le Babilona.