II Vamakabiya 11

₁Endzhaku ka nkarhinyana, Lisiya muhlayisi ni xaka ra hosi Antiyoko Yupatoro, loyi a a ri mulanguteri wa hinkwaswo swa mfumo, hi ku hlundzukisiwa hi leswi humeleleke, ₂a hlengeleta masocha ya milenge ya kwalomu ka 80 000 ni vagadi hinkwavo va tihanci ta yena, va ya hlasela Vayuda. A a tiyimiserile ku hundzula Yerusalema wu va muti wa vamatiko, ₃ni ku sindzisa vahlayisi va Tempele ku humesela hosi ndzuvo, hikuva a a endlile sweswo eka swivandla leswo hlawuleka swa vanhu van'wana; na wona ntirho wa vupristankulu a wu ta xaviwa lembe rin'wana ni rin'wana hi lava va wu lavaka. ₄Lisiya a a tsakisiwa ku tlula mpimo hi masocha ya yena ya milenge ya magidi-gidi ni vagadi va yena va tihanci va magidi ni tindlopfu ta yena ta 80, kutani a a nga ri na mhaka ni matimba ya Xikwembu. ₅A nghena eYudiya, a ya hlasela Beta-Suru, lowu a wu ri khokholo leri mpfhuka wa rona a wu ri kwalomu ka 30 km ku fika eYerusalema.

₆Loko Yudasi ni masocha ya yena va twa leswaku Lisiya a a ri eku rhendzeleni ka makhokholo ya vona, vona ni varikwavo hinkwavo va kombela Xikwembu hi swirilo ni mihloti leswaku xi va rhumela ntsumi leyinene ku va ponisa. ₇Yudasi a rhanga a hloma matlhari, kutani a khongotela lavan'wana ku famba na yena va ya nyiketa vutomi bya vona ku pfuna varikwavo. Kwalaho hinkwavo va hatlisa ku huma nyimpi. ₈Loko va ha ri ekusuhi na Yerusalema, ku humelela wanuna wo gada hanci, a va rhangela a ambele swo basa ni ku hloma matlhari ya nsuku. ₉Kavaloko hinkwavo va dzunisa Xikwembu xa tintswalo, va kuma matimba yo lwa ku nga ri ni vanhu ntsena kambe ni swiharhi, hambi ku ri ku ya hlasela rirhangu ra nsimbhi. ₁₀Kutani va ya emahlweni ni nyimpi va xaxamerile, va ri ni museketeri loyi a humaka etilweni, hikuva Xikwembu a xi va twele vusiwana. ₁₁Va tsutsuma va ya hlasela valala tanihi tinghala, va dlaya masocha ya milenge ya vona ya 11 000 ni vagadi va tihanci va 1 600. Valala van'wana hinkwavo va va hlongorisa. ₁₂Vunyingi bya lava va balekeke va vavisiwile ni ku tekeriwa matlhari ya vona. Lisiya na yena a ponisiwa hi ku baleka tanihi toya.

₁₃Lisiya a a tlharihile, a xiyaxiya ta ku hluriwa ka yena, kutani a lemuka leswaku Vayuda a va nga hluleki, hikuva Xikwembu a xi va lwela. Kavaloko a va rhumela rito, ₁₄a ringeta ku va khorwisa ku phahlelana mariyeta na yena, a va tshembisa leswaku ú ta ringeta hi matimba ya yena hinkwawo ku khorwisa na yona hosi leswaku yi hundzuka munghana wa vona. ₁₅Yudasi, hi ku ehleketa leswaku swi nga tsakisa Vayuda hinkwavo, a nkhensa hinkwaswo leswi a swi komberiwa hi Lisiya; mhaka hi leswaku hosi a yi amukerile swikombelo hinkwaswo leswi Yudasi a a swi komberile eka Lisiya hi ku tsala.

₁₆Kavaloko Lisiya a tsalela Vayuda papila leri nge: “Eka n'wina Vayuda, mina Lisiya ndzi ri: ‘Xewani!’ ₁₇Yohane na Abixalomu, varhumiwa va n'wina, va ndzi tiserile papila ra n'wina ni ku hi vutisisa hi tlhelo ra timhaka leti ti nga eka rona. ₁₈Ndzi tivisile hosi timhaka hinkwato leti yi faneleke ku ti tiva, kutani yi pfumerile ku mi pfuna hilaha yi swi kotaka hakona. ₁₉Loko n'wina mi ya emahlweni hi ku tsakisa mfumo wa mina, ndzi ta ringeta ku mi endlela leswinene eminkarhini leyi taka. ₂₀Kutani ndzi lerisile varhumiwa va n'wina ni va mina ku ta ta burisana na n'wina mayelana ni timhaka leti ni vuxokoxoko bya tona. ₂₁Salani! Papila leri ri tsariwa hi siku ra vu-24 ra n'hweti ya Diyokorinto ya lembe ra 148.”

₂₂Kavaloko hosi Antiyoko Yupatoro a tsalela Lisiya papila leri nge: “Eka wena makwerhu Lisiya, mina hosi Antiyoko ndzi ri: ‘Xewani!’ ₂₃Leswi tata wa mina a hundzukeke xikwembu, ndzi lava leswaku vanhu va mfumo wa mina va titirhela hinkwaswo swa vona hi ku rhula. ₂₄Ndzi twile leswaku Vayuda va ala ku landza xileriso xa tata wa mina xa leswaku va fanele ku hanya Xigriki. Ndzi twile leswaku va lava ku hanya Xiyuda xa ka vona, kutani va kombela ku hlayisa mikhuva ya vona. ₂₅Ndzi lava leswaku na vona va hanya hi ku rhula tanihi vanhu van'wana hikwavo wa mfumo wa mina. Hikokwalaho ndzi lerisa leswaku va tlheriseriwa Tempele ya vona ni leswaku va pfumeleriwa ku hanya hi ku landza mikhuva ya vatata wa vona. ₂₆Ndzi kombela leswaku wena Lisiya u va tivisa xileriso xa mina ni ku va tshembisa xinakulobye xa mina, leswaku va ta tiva maendlele ya mina, kutani va ta hanya hi ku tsaka, va tlhela va fambisa swa vona hinkwaswo hi ndlela leyi yi va tsakisaka.”

₂₇Hosi Antiyoko Epifani na yena a tsalela Vayuda papila leri nge: “Eka n'wina vakulukumba va huvo ya Vayuda ni le ka Vayuda van'wana, mina hosi Antiyoko ndzi ri: ‘Xewani!’ ₂₈Ndzi nkhensa loko mi tsakile. Na mina ndzi tsakile. ₂₉Menela ú ndzi tivisile leswaku mi lava ku muka mi ya rindza hinkwaswo swa n'wina. ₃₀Hikokwalaho ke, ndzi ta endla xinakulobye ni van'wana va n'wina lava mukaka siku ra vu-30 ra n'hweti ya Santiko ri nga si fika, ndzi va pfumelela ₃₁ku dya swakudya swa n'wina ni ku landza milawu ya n'wina hilaha a mi tolovele ku endla hakona khale. Ku hava Muyuda na un'we loyi a nga ta xanisiwa nikutsongo hikwalaho ka leswo biha leswi a swi endleke a nga swi tivi leswaku i xidyoho. ₃₂Ndzi mi rhumela Menela leswaku a ta a ta mi tiyisa. ₃₃Salani! Papila leri ri tsariwa hi siku ra vu-15 ra n'hweti ya Santiko ya lembe ra 148.”

₃₄Varhoma na vona va tsalela Vayuda papila leri nge: “Eka n'wina Vayuda, hina Kwinto Memniyo na Tito Maniyo varhumiwa va Varhoma hi ri: ‘Xewani!’ ₃₅Na hina hi nkhensa hinkwaswo leswi Lisiya xaka ra hosi Antiyoko, a mi pfumeleleke ku swi endla. ₃₆Sweswi hi karhi hi kongoma Antiyoka, kutani hi kombela leswaku mi xiyaxiya timhaka leti Lisiya a ti tiviseke hosi. Loko mi hetile ku endla sweswo, hi rhumeleni xikan'we nhlamulo, leswaku hi ta kota ku mi yimela hi ndlela leyi yi mi tsakisaka emahlweni ka hosi. ₃₇Kutani ke, hatlisani mi hi rhumela vavanuna van'wana va ta va hi byela leswi mi swi boheke. ₃₈Salani! Papila leri ri tsariwa hi siku ra vu-15 ra n'hweti ya Santiko ya lembe ra 148.”