II Vamakabiya 6

₁Loko ku hundzile masiku ma nga ri mangani, hosi yi rhumela wanuna wo dyuhala wa Atena, a ya sindzisa Vayuda ku fularhela mikhuva ya vatata wa vona ni ku tshika nawu wa Xikwembu. ₂A a lerisiwile ni ku nyamisa Tempele ya Yerusalema ni hi ku yi nyiketa eka Zewusi, xikwembu xa le ntshaveni ya Olimpo; naswona a byeriwa ku thya tempele ya le Gerizimi vito ra “Zewusi Munghana wa valuveri”, hilaha a yi vuriwa hakona hi vanhu lava a va tshama endhawini yoleyo.

₃Ku xaniseka ku va kukulu, ku nga tiyiseleki. ₄Vamatiko va tata Tempele hi vudakwa ni makampfu ni ku etlela ni tinghwavava kona, va tlhela va yisa swilo swo yila egandzelweni. ₅Alitari a yi funengetiwa hi timhamba leti nga tengangiki, leti yilaka enawini wa Xikwembu. ₆Vanhu a va nga swi koti ku hlayisa Savata, hambi ku ri ku xixima minkhuvo ya vatata wa vona, kumbe ku tivula Vayuda. ₇N'hweti yin'wana ni yin'wana loko ku tlangeriwa siku ra ku velekiwa ka hosi Antiyoko Epifani, Vayuda a va sindzisiwa hi nkanu ku dya marhumbu ya swifuwo swa magandzelo. Loko ku tlangeriwa nkhuvo wa Diyonisiyo, a va sindzisiwa ku xaxamela ni ku ya fundzha Diyonisiyo va ambele tihari ta swiluva swa rihlaza. ₈Hi xiletelo xa Pitolemi, vanhu va miti ya Vagriki leyi nge kusuhi na Yudiya, a va lerisiwa ku sindzisa Vayuda leswaku va dya swa magandzelo, ₉va byeriwa ni ku dlaya Vayuda lava nga tiyimiselangiki ku hanya Xigriki. Hikokwalaho ke, a swi ri erivaleni leswaku makhombo a ma ri kusuhi. ₁₀Leswi landzelaka i swikombiso swin'wana swa kona: vavasati vambirhi va khomiwa, hileswi a va yimbisile vana va vona. Va fambisiwa emitsendzeleni ya muti ni vana va vona lava boheleriweke emaveleni ya vona, kutani va cukumetiwa hi le henhla ka rirhangu. ₁₁Vayuda van'wana lava a va hlengeletanile emabakwini ya le kusuhi leswaku va kota ku hlayisa Sabata exihundleni, va xengiwa eka Filipi ndhuna yin'wana ya hosi, kutani va hisiwa hinkwavo. Vukhongeri bya vona byi va siverile ku tilwela, hikuva a va xixima ngopfu siku ra Savata.

₁₂Sweswi ndzi khongotela lava hlayaka buku leyi leswaku va nga heli mbilu hi makhombo layo tano, kambe va fanele ku twisisa leswaku ha wona Xikwembu a xi nga lavi ku herisa vanhu va ka hina, kambe a xi navela ku va tshinya ntsena. ₁₃Hakunene, xikombiso xa musa lowukulu a hi ku tshika vahomboloki eswidyohweni swa vona nkarhi wo leha, kambe i ku va ba xikan'we-kan'we. ₁₄Xikwembu a xi hi endli hilaha xi endleka vanhu vambe hakona. Vanhu lava xi va lehiselaka mbilu, xi va ba ntsena loko va fikile emakumu ya vubihi bya vona. ₁₅Kambe hina xi hatla xi hi ba hi nga si dyoha ngopfu. ₁₆Kutani ke, Xikwembu xi hi twela vusiwana minkarhi hinkwayo. Hambiloko xi hi ba hi makhombo, a xi hi tshiki ni siku ni rin'we. ₁₇Leswi ndzi swi vuleke a xi ve xitsundzuxo eka hina. Kutani sweswi ndzi ta yisa emahlweni timhaka ta matimu.

₁₈A ku ri ni mukhalabye un'wana wo xixemeka loyi a va ku i Eliyazara; a a ri un'wana wa vadyondzisi va nawu wa Xikwembu loyi a va n'wi sindzisa ku pfula nomu wa yena ku dya nyama ya nguluve. ₁₉Kambe a hlawula ku fa hi xichavo ematshan'wini ya ku hanya hi swa manyala. Hikokwalaho, a tshwutela nyama leyi, kutani a tihlawulela ku vaviseka ₂₀ku komba varikwavo leswaku va fanele va tiyimisela ku ala ku dya swakudya swo nyamisiwa, hambiloko hi ku endla sweswo va ta dlayiwa. _21-22Lava a va humesa magandzelo lama yilaka enawini wa Xikwembu, va vitanela Eliyazara etlhelo, hikuva a va tivana na yena ku sukela khale. Va n'wi khongotela exihundleni ku ta egandzelweni ni nyama leyi tengeke leyi lunghisiweke hi yena n'wini, a dya yona, kutani a xisetela wonge hiloko a dya nyama ya nguluve. Hi ndlela leyi a a nga ta dlayiwa.

₂₃Kambe Eliyazara a tsema mhaka hi ndlela leyi fambelanaka ni vukulukumba bya yena ni ndzhuti wa ku dyuhala ka yena. Vutomi bya yena hinkwabyo a a landza ni ku hlayisa milawu ya Xikwembu, hikokwalaho a va hlamula a ku: “Hatlisani, mi ndzi dlaya sweswi! ₂₄Vuxisi lebyo tano a byi ndzi fanelanga eku dyuhaleni ka mina. Lavantshwa vo tala va nga ta ehleketa leswaku ndzi fularherile ripfumelo ra mina loko ndzi ri ni malembe ya 90. ₂₅Hi vuxisi lebyi, ndzi ta engetela nkarhinyana eka vutomi bya mina, kambe ndzi ta tikhomisa tingana letikulu ni ku kucetela lavantshwa vo tala ku endla leswo biha. ₂₆Hambiloko sweswi ndzi nga papalata ku biwa hi n'wina, ndzi nga ka ndzi nga balekeli Xikwembu xa matimba hinkwawo, hambi ndzi hanya, hambi ndzi fa. ₂₇Kutani ke, loko sweswi ndzi fa hi vunhenha, ndzi ta tikomba leswaku ndzi faneriwa hi vukulu bya ku dyuhala ka mina. ₂₈Ndzi ta kombisa lavantshwa ndlela leyi amukelekaka ya ku tinyiketa hi ku tsaka, ndzi ri karhi ndzi fela milawu ya hina leyo hlawuleka ni yo xiximeka.”

Loko a heta ku vula marito lawa, Eliziyara a kongoma laha a va vavisela vanhu kona. ₂₉Lava ku nga ri khale a va n'wi twela vusiwana, sweswi va n'wi komba tihanyi, hikuva va ehleketa leswaku ú vulavurile tanihi nhlanyi. ₃₀Loko a biwile ngopfu, kutani a ri kusuhi ni ku fa, a konya, a ku: “Hi vutivi lebyo hlawuleka bya xona, HOSI Xikwembu xi tiva leswaku, hambi loko ndzi nga tshuka ndzi pona eku dlaweni, ndzi twa ku vava lokukulu emirini ndzi ri karhi ndzi biwa hi nkhavi, kambe emoyeni wa mina ndzi tsakela ku vaviseka loku, hikuva ndzi chava Xikwembu.”

₃₁Kutani Eliyazara a fa hi ndlela leyi. Hi ku fa ka yena a siya xikombiso ni xitsundzuxo xa vunhenha lebyikulu, ku nga ri ntsena eka lavantshwa, kambe eka varikwavo hinkwavo.