II Samiele 2

₁Endzhaku ka sweswo, Davhida a vutisa timhaka eka HOSI Xikwembu, a ku: “Xana ndzi nga tlhandluka ndzi ya eka wun'wana wa miti ya Yuda xana?” HOSI Xikwembu xi hlamula xi ku: “Ina, tlhandluka!” Davhida a engeta a vutisa, a ku: “Xana ndzi nga ya eka wihi muti xana?” Xikwembu xi hlamula xi ku: “Yana eHebroni.” ₂Kutani Davhida a rhurhela eHebroni, a famba ni vasati va yena havambirhi, Ahinowama la humaka eYizriele, na Abigayele loyi khale a a ri nkata sirha Nabala wa le Karmele. ₃Davhida a rhurha ni vavanuna lava a a ri na vona, un'wana ni un'wana a ta ni ndyangu wa yena; va fika va tshama emigangeni ya Hebroni. ₄Kutani vavanuna va Yuda va hlengeletana eHebroni, va veka Davhida ku va hosi ya tiko ra Yuda, hi ku n'wi chela mafurha enhlokweni.

Kutani va tivisa Davhida, va ku: “Lava nga lahla Sawulo i vanhu va le Yabexe-Giliyadi.” ₅Hiloko Davhida a rhuma vanhu va ya eka va le Yabexe-Giliyadi ni marungulo lama nge: “Ingi HOSI Xikwembu xi nga mi katekisa, hikuva ku tshembeka ka n'wina eka Sawulo n'wini wa n'wina ku tikombile hi leswi mi nga n'wi lahla. ₆HOSI Xikwembu a xi mi kombise tintswalo ta xona leto tshembeka, leto tiya; kutani na mina ndzi ta khomana na n'wina hi moya lowunene, hikwalaho ka mhaka leyi mi yi endleke. ₇Kutani sweswi, leswi Sawulo n'wini wa n'wina a feke, tiyani, mi va tinhenha; loko a ri mina, tiko ra Yuda ri ndzi hlawurile ku va hosi ya rona.”

₈Enkarhini wolowo, Abinere n'wana Nere, loyi a a ri ndhunankulu ya mavuthu ya Sawulo, a a sukile na Ixi-Boxete n'wana Sawulo, a pela nambu wa Yordani a ya na yena emutini wa Mahanayimi, ₉a n'wi veka ku va hosi ya va ka Giliyadi, ni Vaaxuri, ni va le Yizriele, ni va ka Efrayimi, ni va ka Benjamini, a fuma tiko hinkwaro ra Israele. ₁₀Ixi-Boxete n'wana Sawulo a a ri ni malembe ya 40 loko a sungula ku fuma tiko ra Israele, kutani a fuma malembe mambirhi. Nyimba ya va ka Yuda yona a yi fuma hi Davhida. ₁₁Davhida ú vile hosi ya nyimba ya va ka Yuda ku ringana malembe ya 7 ni tin'hweti ta 6, a ri karhi a tshama eHebroni.

₁₂Abinere n'wana Nere, ni malandza ya Ixi-Boxete n'wana Sawulo, va huma nyimpi, va suka eMahanayimi va kongoma eGibiyoni. ₁₃Kutani Yowabu n'wana Seruya, ni malandza ya Davhida, va huma na vona va ya hlangana na Abinere ni vuthu ra yena etiveni ra le Gibiyoni. Va fika va tshama hansi, va ka Abinere etlhelo rin'wana ra tiva, va ka Davhida eka lerin'wana. ₁₄Kutani Abinere a ku ka Yowabu: “A hi humese majaha, ma lwa hi mambirhi-mbirhi emahlweni ka hina.” Yowabu a hlamula a ku: “Hiswona, a va suke va yima.” ₁₅Kutani va huma ha un'we-un'we: Lava a va yimela va ka Benjamini ni ntlawa wa ka Ixi-Boxete n'wana Sawulo, a va ri 12, lava a va yimela malandza ya Davhida na vona a va ri 12. ₁₆Kutani va khomana hi misisi hi vambirhi-mbirhi, va tlhavana matsheve hi mabanga, va wa swin'we va fa. Hikwalaho ka leswi, ndhawu leyi yi vuriwa “Nsimu-ya-Mabanga”; ni sweswi ya ha ri kona eGibiyoni. ₁₇Siku rero, ku pfuka nyimpi leyikulu swinene, kutani Abinere ni vavanuna va Israele va hluriwa hi masocha ya Davhida.

₁₈Vana vanharhu va Seruya, Yowabu na Abixayi na Asahele, na vona a va ri kona. Leswi Asahele a a kota ku tsutsuma ku fana ni mhala, ₁₉a hlongorisa Abinere, a kongoma yena ntsena a nga tlheli. ₂₀Kutani Abinere a hundzuluka a languta endzhaku, a vutisa Asahele, a ku: “Xana hi wena Asahele xana?” Yena a hlamula a ku: “Ina, hi mina!” ₂₁Abinere a ku ka yena: “Tshika ku hlongorisa mina, u hlongorisa un'wana wa majaha, u n'wi khoma, kutani u n'wi tekela leswi a nga na swona.” Kambe Asahele a ala, a ya emahlweni ni ku hlongorisa Abinere. ₂₂Abinere a engeta a ku ka Asahele: “Tshika ku ndzi hlongorisa, hikuva ndzi ta kala ndzi ku dlaya; kutani loko u file, mina ni makwenu Yowabu hi ta sala hi langutana hi mahlo wahi xana?” ₂₃Kambe Asahele a ala ku tlhela; kutani Abinere a n'wi dlivela ndzhaku hi mphiselo wa tlhari ra yena; mphiselo wu n'wi tlhava khwiri wu ya huma hi le nhlaneni, kutani Asahele a wela kwalaho, a fa. Hinkwavo lava fikeke laha Asahele a feleke kona, va yima va nga ha hundzeli emahlweni.

₂₄Loko a ri Yowabu na Abixayi, va ya emahlweni ni ku hlongorisa Abinere. Loko dyambu ri lava ku pela, va fika exintshabyaneni xa Ama lexi nga kusuhi ni muti wa Giya, endleleni leyi kongomaka emananga ya Gibiyoni. ₂₅Vavanuna va ka Benjamini va hlengeletana ku ta seketela Abinere, va vumba ntlawa wun'we, va ya yima enhlohlorhini ya xintshabyana. ₂₆Kavaloko Abinere a huwelela Yowabu, a ku: “Xana hi ta tshika rini ku tlhavana hi mafumu xana? Wa swi tiva swinene leswaku swilo leswi swi ta helela emahlomulweni. Hikwalaho ka yini u nga lerisi masocha ya wena sweswi leswaku va tshika ku hi hlongorisa, hina hi nga vamakwenu, xana?” ₂₇Yowabu a hlamula a ku: “Ndza hlambanya emahlweni ka Xikwembu lexi hanyaka, ndzi ri: Loko onge a wu nga pfukanga vavanuna lava hinkwavo hi marito ya wena, ingi mixo lowu va nga mi hlongorisanga n'wina vamakwerhu.” ₂₈Kutani Yowabu a ba mhalamhala, vavanuna va yena hinkwavo va tshika ku hlongorisa Vaisraele, nyimpi ya kona yi herisa sweswo.

₂₉Kutani Abinere ni masocha ya yena va famba vusiku hinkwabyo va lulama ni nkova wa Yordani; kutani va pela nambu wa Yordani, va ya emahlweni va famba mixo hinkwawo, va kondza va fika eMahanayimi. ₃₀Loko a ri Yowabu, a vuya hi le ku hlongoriseni ka Abinere, kutani a hlengeleta mavuthu hinkwawo, a kuma leswaku, eka malandza ya Davhida, ku wile 19 ntsena enyimpini, loko ku nga hlayiwi Asahele. ₃₁Kasi malandza ya Davhida a ma dlayile vavanuna va Abinere va 360 va nyimba ya ka Benjamini.

₃₂Kutani Yowabu ni masocha ya yena va rhwala ntsumbu wa Asahele, va ya n'wi lahla emasirheni ya vatata wa yena eBetlehema; kutani va ya emahlweni na riendzo ra vona vusiku hinkwabyo, dyambu ri ya va xela va ri eHebroni.