Mintirho 16

₁Pawulo a fika eDerbe ni le Listra. Kona, a ku ri ni mudyondzisiwa loyi a va ku i Timotiya; mana wa yena a a ri Muyuda, naswona a a ri mupfumeri; kambe tata wa yena a a ri Mugriki; ₂Timotiya a a nkhenseka eka vamakwavo va le Listra ni va le Ikoniya. ₃Pawulo a a lava ku famba na yena, kutani a n'wi teka, a n'wi yimbisa, hikwalaho ka Vayuda lava akeke ematikweni walawo, hikuva hinkwavo a va tiva leswaku tata wa Timotiya i Mugriki. ₄Kutani loko vaapostola va ri karhi va hundza emitini leyi, va nyiketa vamakwavo milawu leyi nga vekiwa hi vaapostola ni vakulukumba va le Yerusalema, ni ku kombela leswaku yi hlayisiwa. ₅Hi mukhuva lowu, tikereke ti tiyisiwa eku pfumeleni, ti andza siku rin'wana ni rin'wana.

₆Vaapostola va tsemakanya matiko ya Firigiya ni ya Galatiya, kutani Moya lowo Kwetsima wu va sivela ku ya vula Rito etikweni ra Asiya. ₇Kuteloko va fikile endzilekaneni wa tiko ra Misiya, va ringeta ku nghena etikweni ra Bitiniya, kambe Moya wa Yesu a wu va pfumelelanga. ₈Hikokwalaho va tsemakanya Misiya, kutani va rhelela va ya eTrowasi.

₉Xivono xi humelela eka Pawulo nivusiku: Wanuna wa Makedoniya a yima emahlweni ka yena, a n'wi khongela, a ku: “Pelela eMakedoniya, u ta hi pfuna!” ₁₀Loko Pawulo a vonile xivono lexi, hi hatla hi tilunghisela ku ya eMakedoniya, hi ku twisisa leswaku i Xikwembu lexi xi hi vitaneke ku ya twarisa Evhangeli eka vanhu va kona.

₁₁Kuteloko hi sukile eTrowasi hi ngalava, hi tsemakanya lwandle ku ya fika exihlaleni xa Samotraka, kutani hi siku leri tlhandlamaka, hi ya eNeyapoli; ₁₂loko hi suka kona, hi kongoma Filipiya, wu nga muti wa xitikwana xo sungula xa Makedoniya, ni ndhawu ya Varhoma. Kutani hi tshama masiku ma nga ri mangani emutini wolowo.

₁₃Hi siku ra Savata hi huma emutini, hi ya nambyeni, laha hi anakanyeke leswaku ku nga va ni ndhawu yo khongela eka yona; kuteloko hi tshamile, hi vulavula ni vavasati lava hlengeletaneke kona. ₁₄Kutani un'wana wa vona loyi a va ku i Lidiya, muxavisi wa tinguvu to vangama ta xivunguvungu, wa muti wa Tiyatira, wansati wo chava Xikwembu, a a ri eku yingiseni; kutani Hosi yi pfula mbilu ya yena leswaku a twisisa leswi vuriwaka hi Pawulo. ₁₅Kuteloko a khuvuriwile swin'we ni va ndyangu wa yena, a hi khongela, a ku: “Loko mi vona leswaku ndzi munhu la pfumeleke ka Hosi hakunene, mi nga nghena ekaya ka mina, mi tshama kona.” Kutani a hi sindzisa ku ya kona.

₁₆Siku rin'wana loko hi ya endhawini yo khongela ka yona, hi hlangana ni wanhwana loyi a a ri hlonga, loyi a a ri ni moya wa vungoma, a fumisa vini va yena hi ku vhumbha. ₁₇Kutani a hi landza, hina na Pawulo, a ri karhi a huwelela, a ku: “Vavanuna lava i malandza ya Xikwembu xa le henhla-henhla, lava va mi tivisaka ta ndlela ya ku ponisiwa.” ₁₈A hamba a endlisa sweswo hi masiku layo tala ku kondza Pawulo a karhateka swinene, kutani a hundzuluka, a ku ka moya: “Hi vito ra Yesu Kriste ndza ku lerisa ndzi ri: Huma eka wanhwana loyi!” Kutani hi nomu lo moya wu huma.

₁₉Loko vini va wanhwana va vona leswaku va lahlekeriwe hi bindzu leri a va ri languterile, va khoma Pawulo na Silasi, va va kokela ehubyeni, emahlweni ka tindhuna; ₂₀va va yisa eka letikulu ta kona va ku: “Vanhu lava i Vayuda, kutani va pfilunganya muti wa ka hina; ₂₁va dyondzisa mikhuva leyi hi nga faneriki ku yi amukela ni ku yi endla, hina hi nga Varhoma.” ₂₂Na wona ntshungu wu va pfukela hi matimba; tindhuna ti handzula swiambalo swa Pawulo na Silasi, ti lerisa leswaku va biwa hi minkhavi. ₂₃Kuteloko va va humesile mimpfembeti hi ku va ba, va va hoxa ekhotsweni, va lerisa mulanguteri wa khotso ku va rindza swinene. ₂₄Loko yena a kumile xileriso xexo, a va nghenisa ekhotsweni ra le xikarhi, kutani a manya milenge ya vona hi mintsandza.

₂₅Exikarhi ka vusiku, Pawulo na Silasi a va khongela, va dzunisa Xikwembu hi ku yimbelela tinsimu, kutani vabohiwa lavan'wana va va yingisa. ₂₆Kambe hi nomu lo, ku tsekatseka lokukulu ka misava ku va kona; kutani masungulo ya khotso ma tsekatsekisiwa; kan'we-kan'we tinyangwa hinkwato ti pfuleka, kutani tinketani ta vabohiwa hinkwavo ti ntshunxeka. ₂₇Mulanguteri wa khotso a pfuka evurhongweni; kakuloko a vona tinyangwa ta khotso ti pfulekile, a hlomula fumu ra yena, a lava ku tidlaya, hikuva a a anakanya leswaku vabohiwa va balekile. ₂₈Kambe Pawulo a huwelela hi rito ro tlakuka, a ku: “U nga tshuki u tivavisa, hikuva ha ha ri kona hinkwerhu.” ₂₉Mulanguteri a kombela timboni, a nghena hi ku tsutsuma, a tiwisela emilengeni ya Pawulo na Silasi, a ri karhi a rhurhumela hi ku chava. ₃₀Kutani loko a va humeserile ehandle, a ku: “Tihosi, xana ndzi fanele ku endla yini leswaku ndzi ponisiwa?” ₃₁Vona va ku: “Pfumela eka Hosi Yesu, kutani u ta ponisiwa, wena ni va ndyangu wa wena.” ₃₂Kutani va n'wi byela rito ra Hosi, a ri ni va le kaya ka yena hinkwavo. ₃₃Kutani, enkarhini wolowo wa vusiku, mulanguteri a va teka a hlantswa mimpfembeti ya vona; kutani kan'we-kan'we a khuvuriwa, yena ni vanhu va yena hinkwavo. ₃₄Endzhaku ka sweswo, a yisa Pawulo na Silasi ekaya ka yena, a va phamela swakudya, kutani a tsaka swin'we ni va ndyangu wa yena hinkwavo, hileswi a a pfumerile ka Xikwembu.

₃₅Loko ri xa, tindhuna ti rhuma maphorisa ku ya lerisa leswaku vanhu lava va ntshunxiwa. ₃₆Mulanguteri wa khotso a tivisa Pawulo mhaka leyi, a ku: “Tindhuna ti rhumele rito leswaku mi ntshunxiwa; kutani sweswi, humani, mi famba hi ku rhula.” ₃₇Kambe Pawulo a ku ka maphorisa: “Va hi bile erivaleni hi nga si avanyisiwa, hina hi nga Varhoma, kutani va hi hoxa ekhotsweni! Xana sweswi va nga hi ntshunxa exihundleni xana? Nikutsongo! A va te vona vini, va ta hi humesela ehandle.” ₃₈Maphorisa ma yisa marito walawo eka tindhuna; loko tona ti twa leswaku Pawulo na Silasi i Varhoma, ti chava. ₃₉Kavaloko ti ta, ti kombela ku rivaleriwa, ti va humesela ehandle, ti kombela leswaku va huma emutini, va famba. ₄₀Kuteloko va humile ekhotsweni, va ya ekaya ka Lidiya; kona, va vonana ni vamakwavo, va va khongotela, kutani va tifambela.