Amosi 8

“Vanhu va mina va Israele va vupfile, va ta herisiwa,

ndzi nga ka ndzi nga va tsetseleli ni siku ni rin'we.

₃Hi siku ra kona, tinsimu ta le ntsindza ti ta hundzuka swirilo.

Ndzi vula sweswo, mina HOSI N'wini wa hinkwaswo.

Mintsumbu yi ta tala swinene.

Etindhawini hinkwato va ta yi cukumetela ehandle, va miyerile.”

₄Yingisani mhaka leyi, n'wina lava mi kandziyelaka swisiwana ehansi,

n'wina mi herisaka vapfumari etikweni:

₅Mi byelana mi ku: “Xana nkhuvo wa siku ra ku tshama ka n'weti wu ta hela rini,

hi ta kota ku xavisa mavele?

Siku ra Savata rona ri ta hundza rini xana,

hi ta kota ku xavisa mavele ya maxalana?

Hi ta hunguta xisakana, kutani hi tlakusa nxavo wa kona,

hi xisa vanhu hi mimpimo leyi nga riki yona;

₆hi ta xaviseriwa swisiwana leswi nga ni milandzu,

hi xava ni vapfumari hi nxavonyana wa tintanghu,

hi xavisa ni vuhumbu bya mavele!”

₇HOSI, yona leyi rixaka ra Yakobo ri tidzunisaka ha yona, ya hlambanya yi ri:

“Swiendlo swa vona hinkwaswo, ndzi nge swi rivali ni siku ni rin'we.

₈Hikokwalaho, tiko ri ta tsekatseka,

vaaki va rona hinkwavo va ta rila nkosi,

tiko hinkwaro ri ta ndlandlamuka, ku kota nambu wa Nilo,

ri ta tlatlalatiwa, ri tlhela ri vohla

ku fana ni nambu wa Nilo le Egipta.”

₉HOSI N'wini wa hinkwaswo ú vula sweswo ú ri:

“Siku ra ta, leri ndzi nga ta perisa dyambu ninhlekanhi,

ndzi hundzula ku vonakala ka siku ku va xinyami emisaveni.

₁₀Ndzi ta hundzula minkhuvo ya n'wina yi va minkosi,

ni tinsimu ta n'wina hinkwato ti va ta swirilo;

ndzi ta mi ambexa leswo khwaxa hinkwenu,

ndzi mi byewula ni tinhloko.

Siku ra kona, ndzi ta ri endla ri fana ni ra ku rila n'wana un'we wa xinuna;

eku heteleleni, ku ta sala mbitsi ntsena.”

₁₁HOSI N'wini wa hinkwaswo ú vula sweswo ú ri:

“Vonani, masiku ma ta,

lawa ndzi nga ta vanga ndlala etikweni;

a yi nga vi ndlala ya vuswa,

kumbe torha ra mati,

kambe ndlala ni torha ra ku lava

marito ya mina HOSI.

₁₂Va ta tsendzeleka, va suka emakumu ka tiko va ya fika emakumu,

va ya ni le matlhelweni hinkwawo ya timheho;

va ta tsutsuma va ya hala ni hala,

va ri karhi va lava rito ra mina HOSI,

kambe a va nga ri kumi.

₁₃“Hi siku ra kona, vanhwana lavo saseka ni majaha layo tiya,

va ta wa hi torha.

₁₄Vanhu lava hlambanyaka hi Axima, xikwembu xa xifaniso xa le Samariya, va ku:

‘Hi hlambanya hi xikwembu xa wena Dani’,

ni lava va nge: ‘Hi hlambanya hi ndlela yo ya eBerexeba’,

va ta wa va nga ha pfuki, ni siku ni rin'we.”