Duteronoma 21

₁“Etikweni leri HOSI Xikwembu xa n'wina xi mi nyikaka rona leswaku ri va ra n'wina, swi nga endleka leswaku ku tshuka ku kumiwa munhu enhoveni a file, kambe swi nga tiveki leswaku i mani a n'wi dlayeke. ₂Loko swi va tano, vakulukumba va ka n'wina ni vaavanyisi va ka n'wina va fanele ku huma va ya va ya pima mpfhuka wo sukela laha munhu wa kona a feleke kona, ku ya fika emitini leyi rhendzeleke xivandla xa kona. ₃Kutani vakulukumba va muti lowu nga kusuhi ni laha munhu loyi a dlayeriweke kona, va ta lava thokazi leri nga si tshamaka ri tirhisiwa kumbe ku paniwa, ₄va rhelela na rona enhoveni, laha ku nga ni mati lama tshamaka ma ri karhi ma khuluka, naswona laha ku nga si tshamaka ku rimiwa kumbe ku byariwa nchumu. Kutani thokazi leri va ta fika va ri tshova nhamu kwale nhoveni. ₅Vaprista hinkwavo, va nga vanhu va ka Levhi, va ta huma va ya endhawini leyi, hikuva hi vona va hlawuriweke hi HOSI Xikwembu xa n'wina leswaku va xi tirhela ni ku katekisa vanhu hi vito ra xona, naswona hi vona va fanelaka ku tsema mhaka yihi na yihi ya lava holoveke kumbe lava bananeke. ₆Kutani vakulukumba hinkwavo lava tshamaka emutini lowu nga kusuhi ni laha munhu a dlayeriweke kona, va ta hlambela mavoko ya vona ehenhla ka thokazi leri tshoviweke nhamu, kwale nhoveni, ₇va ri karhi va vulavulela va ku: ‘A hi hina hi dlayeke munhu loyi, naswona a hi swi vonanga loko swi humelela. ₈We HOSI Xikwembu, rivalela Vaisraele, va nga vanhu lava u va kutsuleke, u nga tshuki u va veka nandzu wa ku dlayiwa ka munhu loyi a nga dyohangiki, va rivalele!’ ₉Loko mi endla sweswo, hilaha HOSI Xikwembu xi swi lavaka hakona, mi ta tiponisa enandzwini wa ku dlayiwa ka munhu wa kona.

₁₀“Mi nga tshuka mi huma nyimpi mi ya lwa ni valala va n'wina, kutani HOSI Xikwembu xa n'wina xi mi nyiketa vona mi va hlula, mi va khoma mi muka na vona. ₁₁Loko un'wana wa n'wina a vona wansati wo saseka exikarhi ka vona, kutani a lava ku n'wi teka a va nsati wa yena, ₁₂a nga ya na yena ekaya. Wansati loyi ú fanele ku fika a byewula nhloko, a tsema ni min'wala, ₁₃a ncinca ni xiambalo lexi ambariwaka hi lava khomiweke enyimpini, kutani n'hweti yoleyo hinkwayo ú ta va a ri kwala mutini wa wanuna loyi, a ri karhi a titshandza vusiwana bya leswi a siyeke tata wa yena ni mana wa yena; endzhaku ka sweswo, wanuna a nga ha ya a ya tivana na yena, kutani va va nuna ni nsati. ₁₄Kambe loko wanuna a nga ha n'wi tsakeli, a a n'wi tshike a famba a tiyela lomu a ku lavaka; a nga tshuki a n'wi xavisa, naswona a nga n'wi khomi wonge o va hlonga, hikuva ú ta va a tlangile hi yena.

₁₅“Munhu a nga va a ri ni vasati vambirhi, kambe a tsakela un'wana wa vona, loyi un'wana a nga n'wi tsakeli. Vavasati lava, va nga va va ri ni vana va xinuna hi vumbirhi bya vona. Swi nga endleka leswaku n'wana wa wansati loyi a nga tsakeriwiki a va a ri yena mativula ya wanuna loyi; ₁₆kutani siku wanuna loyi a avanyiselaka vana va yena endzhaka, a nga fanelanga ku teka n'wana wa wansati lowo tsakeriwa wonge o va yena mativula, kasi mativula i n'wana wa wansati loyi a nga tsakeriwiki; ₁₇kambe ú fanele ku komba leswaku n'wana wa wansati loyi a nga tsakeriwiki, hi yena mativula, hi ku n'wi nyika swilo leswi tlulaka swa loyi un'wana kambirhi, eka hinkwaswo leswi a nga na swona, hikuva ú sungurile hi yena ku veleka, kutani hi yena a kumaka leswi fanelaka n'wana wa mativula.

₁₈“Loko munhu a ri ni n'wana loyi a tinonon'hwisaka, loyi a alaka ku yingisa leswi a byeriwaka swona hi tata wa yena ni mana wa yena, hambiloko va n'wi ba a nga va yingisiki, ₁₉vatswari va fanele ku n'wi yisa eka vakulukumba ehubyeni ya muti lowu a tshamaka eka wona; ₂₀va fika va byela vakulukumba va muti va ku: ‘N'wana loyi wa hina ú tinonon'hwisa ngopfu, a nga hi yingisi; ú ni makolo, naswona i xidakwa!’ ₂₁Kutani vanhu hinkwavo va muti va ta n'wi khandla hi maribye a fa. Hi ndlela leyi, mi ta susa vubihi exikarhi ka n'wina, kutani loko Vaisraele hinkwavo va swi twa, va ta hamba va chava.

₂₂“Loko munhu a endlile nandzu lowu faneleke hi rifu, kutani a hayekiwa emhandzeni, ₂₃ntsumbu wa yena wu nga tshuki wu tshama vusiku hinkwabyo emhandzeni. Mi fanele ku n'wi lahla siku rero, hikuva ntsumbu lowu hayekiweke emhandzeni i ndzhukano eka HOSI Xikwembu. Mi nga tshuki mi nyamisa tiko leri HOSI Xikwembu xa n'wina xi mi nyikaka rona leswaku ri va ndzhaka ya n'wina.