Duteronoma 24

₁“Wanuna a nga tshuka a teka nsati a tshama na yena, kambe endzhaku ka nkarhi a nga ha n'wi tsakeli, hikuva a kumile swin'wana eka yena leswi khomisaka tingana; kutani a tsala papila ro n'wi ntshunxa, a n'wi tamerisa rona, a n'wi hlongola emutini wa yena. ₂Kutani wansati loyi a famba a ya kumana ni wanuna un'wana, a tekana na yena; ₃nuna loyi wa vumbirhi a nga tshuka na yena a n'wi nyenya, a tsala papila ro n'wi ntshunxa, a n'wi tamerisa rona, a n'wi hlongola emutini wa yena; kumbe wanuna loyi a nga tshuka a fa. ₄Loko timhaka ti fambile hi ndlela yoleyo, nuna wo sungula loyi a hlongoleke wansati loyi, a nga ka a nga pfumeleriwi ku tlhela a n'wi teka a va nsati wa yena, hikuva wansati loyi ú nyamisiwile; ku endla sweswo i manyala eka HOSI Xikwembu. Mi nga tshuki mi tisa xidyoho etikweni leri HOSI Xikwembu xi mi nyikaka rona leswaku ri va ndzhaka ya n'wina.

₅“Loko wanuna a ha ku teka nsati, a nga fanelanga ku ya enyimpini kumbe ku rhwexiwa mintirho yin'wana etikweni; ú fanele ku ntshunxiwa, a tshama ekaya lembe hinkwaro, a ta kota ku tsaka ni nsati loyi a n'wi hlomiseke.

₆“Ku nga vi na loyi a tekelaka munhu-kulobye maribye ya yena ya ku sila, ma ri yo khomela ha wona, hikuva sweswo i ku n'wi tekela swo tihanyisa ha swona.

₇“Loko Muisraele a kumeka a ri karhi a yiva Muisraele-kulobye, a n'wi endla hlonga ra yena, kumbe a ya n'wi xavisa, muyivi loyi ú fanele ku dlayiwa. Vubihi lebyo tano, mi fanele ku byi susa exikarhi ka n'wina.

₈“Loko mi tshuka mi humeleriwa hi vuvabyi bya nhlokonho, tivoneleni swinene, mi endla hinkwaswo leswi vaprista va yindlu ya ka Levhi va nga ta mi lerisa swona, mi yingisa swileriso leswi ndzi va nyikeke swona. ₉Tsundzukani leswi HOSI Xikwembu xi swi endleke Meriyamu, loko mi ri endleleni mi huma etikweni ra Egipta.

₁₀“Loko mi lomba Muisraele wa ka n'wina xilo xihi na xihi, mi nga tshuki mi nghena endlwini ya yena mi ya teka xo khomela ha xona, ₁₁kambe yimani ehandle, kutani loyi mi n'wi lombaka ú ta huma a mi tisela xo khomela ha xona. ₁₂Loko munhu wa kona a ri xisiwana, nkumba lowu a nga ta mi khomisa wona, mi nga tshuki mi wu funengela loko mi etlela, ₁₃kambe mi fanele ku n'wi tlherisela wona namadyambu, leswaku a ta wu funengela loko a etlela, kutani ú ta mi navelela minkateko, naswona mi ta va mi endlile leswi nga swona emahlweni ka HOSI Xikwembu.

₁₄“Munhu wo thoriwa loyi a nga xisiwana, a pfumala swa le mandleni, mi nga tshuki mi n'wi xanisa; a nga va a ri un'wana wa Vaisraele va ka n'wina, kumbe un'wana wa valuveri lava tshamaka na n'wina etikweni. ₁₅Siku rin'wana ni rin'wana mi fanele ku n'wi nyika muholo wa siku rero; naswona n'wi nyikeni dyambu ri nga si pela, hikuva i xisiwana, ú tshembe wona ntsena; loko mi nga endli sweswo, ú ta yisa xirilo xa yena eka HOSI Xikwembu, kutani mi ta tikuma mi ri enandzwini.

₁₆“Vatswari a va fanelanga ku fela swidyoho swa vana va vona, na vona vana va nga ka va nga feli swidyoho swa vatswari va vona; un'wana ni un'wana ú ta fela swidyoho swa yena.

₁₇“Loko mi avanyisa timhaka ta valuveri ni ta lava pfumalaka vatswari, mi nga ti gombonyokisi, naswona mi nga tekeli noni nkumba wa yona wu va wo khomela ha wona. ₁₈Tsundzukani leswaku mi vile mahlonga etikweni ra Egipta, kutani HOSI Xikwembu xa n'wina xi mi kutsurile kona; hi swona swi endlaka leswaku ndzi mi nyika swileriso leswi.

₁₉“Loko mi tshovela mavele emasin'wini, kutani mi tshuka mi siya man'wana endzhaku, mi nga tlheli mi ya ma teka, ma siyeleni valuveri ni lava pfumalaka vatswari, ni tinoni. Loko mi endla sweswo, HOSI Xikwembu xa n'wina xi ta mi katekisa emintirhweni ya n'wina hinkwayo. ₂₀Loko mi khile mihandzu ya mirhi ya mitlhwari, mi nga ha tlheli mi tlhuva leyi saleke; siyelani valuveri, ni lava pfumalaka vatswari, ni tinoni. ₂₁Loko mi tshoverile masimu ya n'wina ya vhinya, mi nga tlheli mi ya khwaja, siyelani valuveri, ni lava pfumalaka vatswari, ni tinoni. ₂₂Tsundzukani leswaku mi vile mahlonga etikweni ra Egipta; hi swona swi endlaka leswaku ndzi mi nyika swileriso leswi.