Duteronoma 33

“HOSI Xikwembu xi tile xi huma entshaveni ya Sinayi,

xi hi voningile xi ri eSeyira,

xi vangama xi ri entshaveni ya Parani,

xi tile ni madzana-dzana ya vahlawuriwa va xona,

evokweni ra xinene xi khomile ndzilo lowu vuvumelaka.

₃Vanhu va xona, xa va rhandza hakunene,

hinkwavo lava xi nga tihlawulela vona va le vokweni ra xona,

va nkhinsama emilengeni ya xona,

va amukela swileriso swa xona.

₄Muxe ú hi nyikile Nawu,

lowu wu nga ta va ndzhaka ya va ka Yakobo loko va hlanganile.

₅HOSI Xikwembu xi hundzukile hosi ya va ka Yexuruni,

siku leri varhangeri va Vaisraele

a va hlengeletanile ni tinyimba hinkwato ta ka vona.”

“Va ka Rhuveni a va hanye, va nga fi,

hambileswi ntsengo wa vona wu nga wutsongo.”

“We HOSI Xikwembu, hlamula xikombelo xa va ka Yuda,

u va vuyisela exikarhi ka va ka vona,

va lwele hi voko ra wena,

u va lamulela eka lava lwaka na vona.”

“We HOSI Xikwembu, va ka Levhi va nyike Thumimi,

va nyike na Urimi, vona vanhu va wena lava va ku tirhelaka;

u va kamberile le Masa,

hi vona u kanetaneke na vona exihlobyeni xa Meriba.

₉Va ka Levhi va tshikile vatswari va vona,

va tihambanisile ni vamakwavo,

va tshika ni vana va vona;

va endlile leswi u va leriseke swona,

ni ntwanano wa wena va wu hlayisile.

₁₀Hi vona va nga ta dyondzisa va ka Yakobo swiletelo swa wena,

va dyondzisa Vaisraele Nawu wa wena;

va ta ku tisela mirhi ya risuna,

va humesa ni magandzelo lama hisiwaka ehenhla ka alitari ya wena.

₁₁We HOSI Xikwembu, katekisa leswi Valevhi va nga na swona,

u nkhensa ni nyuku wa vona;

lava va lwaka na vona, ni lava va va vengaka,

va wisele hansi, va nga ha pfuki!”

“Hi vona varhandziwa va HOSI Xikwembu, va tshamisekile,

hikuva Xikwembu lexi nge henhla-henhla xa va sirhelela minkarhi hinkwayo,

xi akile na vona emagangeni.”

“HOSI Xikwembu a xi katekise tiko ra vona,

xi va nyika mafurha ya tilo, yi nga mpfula,

ni mati lama pfelelaka ma huma ehansi;

₁₄a xi va nyike tinyiko letinene leti tisiwaka hi dyambu,

ni mihandzu leyi milaka hi tinguva ta yona,

₁₅ni ntshovelo lowunene wa tintshava ta khale,

ni ndzalo ya le magangeni lama nga heriki;

₁₆a xi va nyike misava yo nona ni swimila swa yona hinkwaswo,

ni minkateko ya Loyi-a-tshamaka-exihlahleni.

Minkateko leyi a yi tshame etinhlokweni ta va ka Yosefa,

emimombyeni ya lava rhangelaka vamakwavo.

₁₇Va ka Yosefa va chavisa ku fana ni nkuzi,

va ni matimba kukota nyarhi:

Va susumeta vamatiko,

va va tlherisela emakun'wini ya misava;

magidi-gidi ya va ka Efrayimi, hi walawo,

ni madzana-dzana ya va ka Manase!”

“We Zebuloni, tsaka hi bindzu ra wena ra le lwandle,

na wena Isakara, tsaka ebindzwini ra wena laha tikweni.

₁₉Va ta rhamba vanhu va ya entshaveni ya vona,

laha va nga ta humesela kona magandzelo lama nkhensekaka,

hikuva va ta va va kumile rifuwo elwandle,

ni xuma lexi tumbeleke esaveni.”

“A ku dzunisiwe loyi a kurisaka tiko ra Gadi!

Va ka Gadi va bvutama kukota nghala,

voko ni nhloko, va pfotlosela.

₂₁Va tihlawulerile ndhawu leyo saseka etikweni,

yi nga ndhawu leyi a yi hlayiseriwe mufambisi wa mavuthu,

loko varhangeri va Vaisraele va hlengeletanile;

va ka Gadi va endlile leswi HOSI Xikwembu xi swi nkhensaka,

va hlayisa ni swiletelo leswi xi swi nyikeke Vaisraele.”

“Dani ú fana ni n'wana wa nghala,

loyi a tlulaka a sukela eBaxani.”

“Va ka Neftali va tsakeriwa ngopfu,

minkateko ya HOSI Xikwembu va yi kume hi xitalo;

tiva ra Galeliya, ni tindhawu ta le dzongeni i swa vona.”

“Va ka Asere a va katekisiwe ku tlula van'wana,

a va ve vona va tsakeriwaka ku tlula vamakwavo

va dya mafurha, va tlhela va raha.

₂₅Tinyangwa ta vona ti ta pfariwa hi timbanti ta nsimbhi ni koporo,

matimba ya vona ma ta andza, ku fana ni masiku ya vona ya ku hanya.”

₂₆“N'wina va ka Yexuruni, ku hava Xikwembu xin'wana ehandle ka lexi,

xi tsemakanya matilo ni mapapa,

xi ta xi ta mi pfuna hi vukulu bya xona.

₂₇Vutshamo bya n'wina byi le ka Xikwembu lexi nga kona minkarhi hinkwayo,

mavoko ya xona layo tiya, hi wona ya mi seketelaka,

xi mi hlongorisela valala,

xi ku ka n'wina: ‘Va heriseni!’

₂₈Hikokwalaho, Vaisraele va tshamile hi ku hlayiseka,

vatukulu va Yakobo va tshamisekile,

etikweni ra mavele ni vhinya,

laha mberha ya le tilweni yi welaka kona.

₂₉Mi katekile n'wina Vaisraele! I mani la fanaka na n'wina xana?

Mi vanhu lava va lamuleriwaka hi HOSI Xikwembu,

xona xitlhangu lexi xi mi sirhelelaka,

ni fumu leri mi hlulaka ha rona.

Valala va n'wina va ta ta eka n'wina va ri karhi va tilondla;

switsunga swa vona swa vugandzeri bya hava, mi ta swi kandziyela ehansi.”