Eksoda 21

₁“Milawu leyi u nga ta vekela Vaisraele, hi leyi: ₂Loko u xava Muheveru ku va hlonga ra wena, ú ta tirha malembe ya 6, kutani hi lembe ra vu-7, n'wi ntshunxe a tifambela, a nga hakelanga nchumu. ₃Loko a tile ka wena a nga ri na nsati, a a fambe a ri yexe. Loko a tile a ri ni nsati, a a fambe na yena. ₄Loko n'wini wa hlonga a ri tekisa nsati, kutani nsati loyi a veleka vana va xinuna ni va xisati, siku hlonga ri fambaka, ri ta famba ri ri roxe, nsati wa rona ni vana va ta sala eka n'wini wa vona. ₅Kambe loko hlonga ri ku: ‘Ndzi tsakela n'wini wa mina, ndzi rhandza ni nsati wa mina ni vana va mina, a ndzi lavi ku ntshunxiwa ndzi suka ndzi famba’, ₆n'wini wa rona ú ta ya na rona eka Xikwembu, a ri yimisa ri khegetela rivanti kumbe rimba ra rona, a ri boxa ndleve kwalaho hi ntlhavo; kutani ri ta va hlonga vutomi hinkwabyo.

₇“Loko munhu a xavisa n'wana wa yena wa xisati ku va hlonga, n'wana loyi a nga ha ntshunxiwi ku fana ni mahlonga ya xinuna. ₈Loko muxavi a n'wi xavela ku va nsati wa yena, kutani muxavi loyi a nga ha tsakisiwi hi yena, a a n'wi pfumelele ku kutsuriwa, a nga tshuki a n'wi xavisela vanhu van'wana, hikuva ú hoxerile nsati loyi ngopfu. ₉Kambe loko a n'wi xavela ku va nsati wa n'wana wa yena wa xinuna, ú ta n'wi hlayisa ku fana ni vana va yena va xisati. ₁₀Loko wanuna loyi a teka nsati un'wana, ú ta ya emahlweni a hlayisa loyi wa hlonga a n'wi nyika swakudya ni swiambalo ni tifanelo hinkwato ta vukati. ₁₁Loko a n'wi tsona swilo leswinharhu leswi, wansati ú ta suka a famba, a nga kutsuriwanga hi mali.

₁₂“Munhu un'wana ni un'wana loyi a nga ta ba un'wana a n'wi dlaya, ú ta dlayiwa. ₁₃Kasi loko a nga n'wi jumanga, kambe a ri mina Xikwembu ndzi nga n'wi nyiketa leswaku a dlayiwa, ndzi ta komba mudlayi lomu a nga ta tumbela kona. ₁₄Kambe munhu loyi a yelaka un'wana a ri ni makungu ya ku n'wi dlaya hi tihanyi, hambiloko a tumberile alitarini ya mina, ú fanele ku susiwa kona leswaku a ya dlayiwa.

₁₅“Un'wana ni un'wana loyi a baka tata wa yena kumbe mana wa yena, ú ta dlayiwa.

₁₆“Un'wana ni un'wana loyi a yivaka munhu, a n'wi xavisa, kumbe a tshama na yena, ú ta dlayiwa.

₁₇“Un'wana ni un'wana loyi a rhuketelaka tata wa yena kumbe mana wa yena, ú ta dlayiwa.

₁₈“Loko vanhu va holova, kutani un'wana a ba loyi un'wana hi ribye kumbe hi xibakela, la biweke a kala a vabya kambe a nga fi, ₁₉a kota ku pfuka emasangwini a famba-famba ehandle a xongotela, loyi a nga n'wi ba ú ta va a humile enandzwini; ntsena ú ta riha, hikuva ú n'wi tsandzekisile ku tirha, kutani ú ta tlhela a humesa swa ku n'wi tshungurisa.

₂₀“Loko munhu a ba hlonga ra yena ra xinuna kumbe ra xisati hi nhonga, kutani hlonga ri fela kwalaho, munhu loyi ú fanele ku riha. ₂₁Kambe loko hlonga ri kota ku hanya siku rin'we kumbe mambirhi ri nga si fa, rifu ra rona a ri fanelanga ku rihiwa, hikuva n'wini wa rona ú lahlekeriwile hi xuma xa yena.

₂₂“Loko vanhu va lwa, kutani va ya tlumba wansati loyi a tikeke, va n'wi vangela ku onhakeriwa kambe a nga vavisekanga kun'wana, loyi a n'wi tlumbeke ú ta riha leswi n'wini wa nsati a nga ta lava swona hi ku landza mpimo lowu vekiweke hi vaavanyisi. ₂₃Kambe loko wansati a tshuka a vavisiwile, loyi a nga n'wi vavisa ú ta riha hi ndlela leyi: Vutomi hi vutomi, ₂₄tihlo hi tihlo, tino hi tino, voko hi voko, nenge hi nenge, ₂₅ku tshwa hi ku tshwa, mbanga hi mbanga, felangati hi felangati.

₂₆“Loko munhu a ba hlonga ra yena ra xinuna kumbe ra xisati a ri dlaya tihlo, ú fanele ku ntshunxa hlonga leri ri tifambela, hi mhaka ya tihlo leri. ₂₇Loko a ba hlonga ra yena ra xinuna kumbe ra xisati a ri gula tino, ú fanele ku ri ntshunxa ri tifambela, hi mhaka ya tino leri.

₂₈“Loko homu yi tlhava wanuna kumbe wansati yi n'wi dlaya, yi fanele ku khandliwa hi maribye yi fa, nyama ya yona yi nga dyiwi; kambe n'wini wa yona ú ta va a nga ri na nandzu. ₂₉Kambe homu leyi tshameke yi tlhava vanhu, kutani n'wini wa yona a tsundzuxiwa kambe a nga yi pfaleli etshangeni, loko yi dlaya wanuna kumbe wansati, yi fanele ku khandliwa hi maribye yi fa, n'wini wa yona na yena ú faneriwile hi rifu. ₃₀Kambe loko n'wini wa homu a tshuka a lerisiwile ku riha, ú fanele ku humesa hinkwaswo leswi a nga ta byeriwa ku kutsula vutomi bya yena ha swona. ₃₁Loko homu yi tlhava n'wana wa mufana kumbe wa nhwanyana wa munhu un'wana, ka ha ta tirha nawu wolowo eka n'wini wa yona. ₃₂Loko homu yi tlhava hlonga ra xinuna kumbe ra xisati, n'wini wa yona ú ta nyika n'wini wa hlonga mali ya tisilivhere ta 30, homu yona yi khandliwa hi maribye yi fa.

₃₃“Loko munhu a tshika khele ri nga funengetiwanga, kumbe loko a cela khele a nga ri funengeti, kutani ku wela homu kumbe mbhongolo endzeni ka rona, ₃₄n'wini wa khele leri ú fanele ku riha xifuwo lexi feke; ú ta nyika n'wini wa xona emali, kambe xona xi ta va xa yena.

₃₅“Loko homu ya munhu un'wana yi tlhava ya un'wana yi yi dlaya, vinyi va tona va ta xavisa homu leyi hanyaka kutani va avelana mali ya kona; hambi yi ri homu leyi nga fa, va fanele ku avanyiselana. ₃₆Kambe loko swi tiveka leswaku homu leyi a yi tolovele ku tlhavetela tin'wana, kutani n'wini wa yona a nga yi pfaleli etshangeni, ú fanele ku riha homu hi ku humesa yin'wana, yena a teka leyi yi nga fa.