Eksoda 39

₁Kutani va rhunga swiambalo leswo saseka swa ntirho wa le xivandleni lexo hlawuleka, hi voya bya muhlovo wa rihlaza ra tilo, ni wa xivunguvungu, ni lowo tshwuka; va rhunga swiambalo leswi swo hlawuleka swa Aroni, hilaha HOSI Xikwembu xi leriseke Muxe hakona.

₂Va rhunga efodi hi tingoti ta nsuku, ni voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke. ₃Nsuku va lo wu fula wu va xiphepherhele, kutani va wu pandzelela wu huma tingoti, va rhungelela swifaniso hi tona va ti phasanisa ni voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka lowu lukiweke. ₄Kutani va endlela efodi etingoti ta le makatleni, va ti rhungelela etinhleni ta yona letimbirhi. ₅Vamba ro tiyisa ni ku boha efodi va ri rhunga ku fana na yona, hi voya bya muhlovo wa nsuku, ni wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke; va ri endla hilaha HOSI Xikwembu xi leriseke Muxe hakona.

₆Kutani va lunghisa maribye ya “onikisi” ya nkoka, va ma vekela eka swiangarhelo swa nsuku; maribye lawa a ma tsariwile mavito ya vana va Yakobo, ma kevetliwile wonge hi loko ku kevetliwa mimfungho. ₇Va bohelela maribye lawa etingotini ta efodi ta le makatleni, leswaku ma ta va xikombiso xa tinyimba ta Israele, hilaha HOSI Xikwembu xi leriseke Muxe hakona.

₈Kutani va endla xincekana xa le xifuveni, va xi rhungelela swifaniso, va xi endla ku fana ni efodi, hi voya bya muhlovo wa nsuku, ni wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke. ₉Xincekana lexi a xi ringanana, xi ri 25 cm ku leha ni 25 cm ku anama, loko xi petsiwile. ₁₀Kutani exincekaneni lexi va vekela maribye ya nkoka hi tinxaxa ta mune; rixaxa ro sungula a ri ri ni maribye ya nkoka lawa: “Sardiyo”, na “topazi”, na “garnete”; ₁₁rixaxa ra vumbirhi a ri ri ni maribye lawa: “emeralda”, na “safiri”, na “dayimani”; ₁₂rixaxa ra vunharhu a ri ri ni lawa: “yakinta” na “agata”, na “ametisita”; ₁₃rixaxa ra vumune a ri ri ni lawa: “berila”, na “onikisi”, na “yaspere”. Maribye lawa a ma vekeriwile eka swiangarhelo swa nsuku. ₁₄A ku ri ni maribye ya 12 lawa a ma ri ni mavito ya vana va Yakobo eka wona. Ribye rin'wana ni rin'wana a ri yimela yin'wana ya tinyimba ta 12 ta Israele, ri kevetliwile ku fana ni mfungho. ₁₅Kutani va endlela xincekana xa le xifuveni swinketanana leswi swuriweke ku fana ni tingoti, hi nsuku lowo tenga; ₁₆va endla ni swikhomiso swa xona swimbirhi swa nsuku, ni swingwavila swimbirhi swa nsuku; kutani va vekela swingwavila leswimbirhi etinhleni ta xona letimbirhi. ₁₇Va nghenisa swinketanana leswi swimbirhi swa nsuku eswingwavileni leswimbirhi leswi nga etinhleni ta xincekana. ₁₈Va bohelela makumu ya swinketanana leswimbirhi eswikhomisweni leswimbirhi swa nsuku, kutani va swi khomisa etingotini ta efodi ta le makatleni, hi tlhelo ra le mahlweni. ₁₉Kutani va endla swingwavila swimbirhi hi nsuku, va vekela eka makumu mambirhi ya xincekana xa le xifuveni, enson'weni wa xona wa le ndzeni, kusuhi ni efodi. ₂₀Va endla swingwavila swin'wana swimbirhi hi nsuku; swona va swi vekela hi le mahlweni, hansi ka tingoti ta efodi ta le makatleni, laha tingoti leti ti hlanganaka kona, ehenhla ka vamba ra efodi. ₂₁Kutani va khomisa xincekana xa le xifuveni eswingwavileni swa efodi hi swingwavila leswi, va swi bohelela hi ngoti ya rihlaza ra tilo, leswaku xincekana xi tshama ehenhla ka vamba ra efodi, xi ta kala xi nga suki eka yona, hilaha HOSI Xikwembu xi leriseke Muxe hakona.

₂₂Kutani va endla nguvu leyo leha leyi ambariwaka ni efodi, va yi luka hi voya bya muhlovo wa rihlaza ra tilo ntsena. ₂₃Mbhovo leyi a yi ri engubyini leyi, a yi fana ni ya swiambalo swa madzovo, yi somiwile leswaku yi ta ka yi nga handzuki. ₂₄Emakumu ka nguvu leyi ehansi, va rhungelela swifaniso swa swihenge hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke. ₂₅Va endla ni swingelengele swa nsuku, va swi vekela exikarhi ka swifaniso swa swihenge leswi a swi ri emakumu ka nguvu hi le hansi, ku rhendzeleka na yona. ₂₆Loko va vekela xingelengele xa nsuku, a va landzisa hi xifaniso xa xihenge, sweswo-sweswo ku rhendzeleka ni nguvu leyi ya ntirho wa vuprista, hilaha HOSI Xikwembu xi leriseke Muxe hakona.

₂₇Va rhunga ni tihembe leti lukiweke hi ntsembyani wo saseka, va rhungela Aroni ni vana va yena; ₂₈va rhunga xihuku lexikulu ni swihuku leswitsongo hi ntsembyani lowo saseka, ni swiburukwana hi ntsembyani wo saseka lowu lukiweke; ₂₉va rhunga ni vamba hi ntsembyani wo saseka lowu lukiweke, ni voya bya muhlovo wa rihlaza ra tilo, ni wa xivunguvungu, ni lowo tshwuka, va ri rhungelela mavalavala, hilaha HOSI Xikwembu xi leriseke Muxe hakona.

₃₀Kutani va fula nsuku lowo tenga wo vekela eharhini leyo hlawuleka wu va xiphepherhele, va tsala eka wona marito lama nge: “La hlawuleriweke HOSI”, ku fana ni loko ku kevetliwa mfungho. ₃₁Va bohelela ngoti ya rihlaza ra tilo eka nsuku lowu wa xiphepherhele, leswaku va ta wu khomisa ha yona exihukwini, hilaha HOSI Xikwembu xi leriseke Muxe hakona.

₃₂Kutani ntirho hinkwawo wa Ntsonga lowo Hlawuleka wa HOSI wu fika emakumu. Vaisraele va endlile hinkwaswo hilaha HOSI Xikwembu xi leriseke Muxe hakona. ₃₃Kutani va tisa Ntsonga lowo Hlawuleka eka Muxe, hi leswaku swisirhelelo swa wona, ni swingolongondzwana hinkwaswo swa wona, ni swikhweketo swa wona, ni mapulangi ya wona, ni timhandze ta wona to hingakanya ha tona, ni tiphuphu ta wona, ni minkotloto ya wona; ₃₄va tisa ni xo funengeta Ntsonga ha xona, xa madzovo ya tinyimpfu lama tlhuvutsiweke, ni ya timbuti, ni xisirhelelo xo siva Areka; ₃₅va tisa Areka ya Ntwanano, ni timhandze ta yona, ni xitshamu xa ndzivalelo; ₃₆tafula ni swibya swa rona hinkwaswo, ni xinkwa lexo hlawuleka xa magandzelo; ₃₇xitlhoma-timboni xa nsuku lowo tenga ni timboni ta xona leti xaxametiweke, ni swingolongondzwana hinkwaswo swa xitlhoma-timboni, ni mafurha yo voninga; ₃₈alitari ya nsuku, ni mafurha yo tola, ni mirhi ya risuna leyi hisiwaka engandzelweni, ni xisirhelelo xo pfala nyangwa ya Ntsonga; ₃₉alitari ya koporo, ni ritavala ra yona ra koporo, ni timhandze ta yona, ni swingolongondzwana swa yona hinkwaswo, ni sambelo ni xikhatelo xa rona: ₄₀swisirhelelo swa xivava, ni tiphuphu ta xona ni minkotloto ya kona, ni xisirhelelo xo pfala nyangwa ya xivava, ni tingoti ta kona, ni swikhomiso swa xivava, ni swingolongondzwana hinkwaswo swa ntirho wa Ntsonga lowo Hlawuleka wa HOSI; ₄₁swiambalo leswi sasekisiweke swa lava tirhaka exivandleni lexo hlawuleka, swi nga swiambalo leswo hlawuleka swa muprista Aroni, ni swiambalo swa vana va yena leswi va nga ta ambala loko va tirha ntirho wa vuprista. ₄₂Vaisraele va endlile ntirho hinkwawo hilaha HOSI Xikwembu xi leriseke Muxe hakona, va nga siyi nchumu. ₄₃Loko Muxe a xiyaxiya ntirho, a vona leswaku va wu endlile hi ku landza hinkwaswo leswi HOSI Xikwembu xi leriseke swona, va nga siyanga nchumu. Kutani Muxe a va katekisa.