Eksoda 9

₁Kutani HOSI Xikwembu xi ku ka Muxe: “Yana u ya nghena emutini wa Faro, u ya n'wi byela leswaku mina HOSI Xikwembu xa Vaheveru ndzi vurisa sweswo, ndzi ri: ‘Tshika vanhu va mina va famba va ya ndzi gandzela. ₂Loko u nga va tshiki va famba, u ala u va khomeleta, ₃mina HOSI Xikwembu ndzi ta ba swifuwo swa wena leswi nga madyelweni, hi xirha lexo chavisa swinene lexi nga ta wela tihanci, ni timbhongolo, ni tikamela, ni tihomu, ni tinyimpfu ni timbuti. ₄Kambe mina HOSI Xikwembu ndzi ta hlawula swifuwo swa Vaisraele eka swifuwo swa Vaegipta, leswaku ku nga tshuki ku fa ni xin'we xa leswi swi nga swa Vaisraele.’ ” ₅Kutani HOSI Xikwembu xi veka nkarhi xi ku: “Swilo leswi ndzi ta swi endla mundzuku laha tikweni, mina HOSI.” ₆Kunene hi siku leri tlhandlamaka, HOSI Xikwembu xi endla mhaka leyi: Swifuwo swa Vaegipta swi fa hinkwaswo, kambe eka swifuwo swa Vaisraele a ku fanga ni xin'we. ₇Loko Faro a vutisisa, a twa leswaku ni xin'we xa swifuwo swa Vaisraele a xi fanga; kambe hambiswiritano, a ya emahlweni a tinonon'hwisa, a nga tshiki vanhu leswaku va famba.

₈Kutani HOSI Xikwembu xi ku ka Muxe na Aroni: “Nusani nkuma exitikweni, kutani Muxe ú ta wu haxa ehenhla, emahlweni ka Faro. ₉Kutani wu ta hundzuka ritshuri etikweni hinkwaro ra Egipta, wu vanga matshumba lama nga ta baleka, ma endla swilondza eka vanhu ni swifuwo, ematlhelweni hinkwawo ya tiko.”

₁₀Kwalaho va nusa nkuma exitikweni, va ya yima emahlweni ka Faro, kutani Muxe a wu haxa ehenhla. Kavaloko nkuma wu vanga matshumba, ma endla swilondza eka vanhu ni swifuwo. ₁₁Vangoma a va swi kotanga ku ya humelela emahlweni ka Muxe na Aroni, hikuva a va tele matshumba, ku fana ni Vaegipta van'wana hinkwavo. ₁₂Kambe HOSI Xikwembu xi nonon'hwisa mbilu ya Faro, a nga yingisi Muxe na Aroni, tanihilaha a xi byerile Muxe hakona.

₁₃Kutani HOSI Xikwembu xi ku ka Muxe: “Pfuka nimpundzu swinene, u ya sivelela Faro, u n'wi byela leswaku mina HOSI Xikwembu xa Vaheveru ndzi vurisa sweswo ndzi ri: ‘Tshika vanhu va mina va famba va ya ndzi gandzela. ₁₄Makhombo hinkwawo lawa ndzi nga ta ma rhumela sweswi, ndzi ta ma rhumela eka wena, ni le ka malandza ya wena, ni le ka vanhu va wena, u ta tiva leswaku emisaveni hinkwayo a nga kona la fanaka na mina. ₁₅Loko a ndzi swi lavile, ingi ndzi tirhisile matimba ya mina khale ndzi ku ba hi ntungu, wena ni vanhu va wena, kutani sweswi a mi ta va mi herisiwile laha misaveni. ₁₆Kambe ndzi ku tshikile u hanya, xikongomelo xa kona ku ri ku ku komba matimba ya mina, leswaku vito ra mina ri ta twarisiwa emisaveni hinkwayo. ₁₇Na sweswi, wa ha ya emahlweni u tikurisa, hi ku ala ku tshika vanhu va mina va famba. ₁₈Hikokwalaho mundzuku kwalomu ka minkarhi yoleyi, ndzi ta vanga xihangu lexikulu, lexi ku sukela loko tiko ra Egipta ri tumbuluka ku fikela namuntlha xi nga si tshamaka xi va kona. ₁₉Kutani sweswi, lerisa leswaku swifuwo swa wena ni swilo swa wena hinkwaswo leswi nga enhoveni swi hlayisiwa endhawini leyi sirheleriweke, hikuva hinkwaswo leswi nga ta ka swi nga vuyisiwanga ekaya, hambi vanhu kumbe swifuwo, swi ta weriwa hi xihangu swi fa.’ ” ₂₀A ku ri ni van'wana exikarhi ka malandza ya Faro lava tshukisiweke hi rito ra HOSI Xikwembu, kutani va hatlisa va nghenisa mahlonga ya vona ni swifuwo swa vona etindlwini. ₂₁Kambe lava a va nga ri na mhaka ni rito ra HOSI Xikwembu, va tshika mahlonga ya vona ni swifuwo swa vona enhoveni.

₂₂Kutani HOSI Xikwembu xi ku ka Muxe: “Tlakusela voko ra wena ehenhla, leswaku ku ta wa xihangu etikweni hinkwaro ra Egipta; xi ta wela vanhu, ni swifuwo, ni swimilana emasin'wini, ematlhelweni hinkwawo ya tiko ra Egipta.” ₂₃Kutani Muxe a tlakusa nhonga ya yena a komba ehenhla, kutani HOSI Xikwembu xi pfumisa tilo, xi rhumela ni xihangu, rihati ri ba ri nghena ehansi. HOSI Xikwembu xi wisa xihangu etikweni ra Egipta, ₂₄kutani xi wa xi pfangene ni rihati. Xihangu xa kona a xi chavisa swinene; hi mpfhuka xa loko vanhu va akile etikweni ra Egipta, xihangu xo tano a xi nga si tshama xi va kona. ₂₅Hinkwaswo leswi a swi ri erivaleni etikweni ra Egipta, hambi vanhu kumbe swifuwo, swi biwa hi xihangu swi fa; xihangu xi dlayetela ni swimilana hinkwaswo emasin'wini, xi tshovelela ni mirhi hinkwayo enhoveni. ₂₆Muganga lowu xihangu xi nga wangiki eka wona, a wu ri wa le Goxeni ntsena, laha Vaisraele a va tshama kona.

₂₇Faro a rhuma vanhu, va ya vitana Muxe na Aroni, kutani a ku ka vona: “Sweswi ndza pfumela leswaku ndzi dyohile. HOSI Xikwembu a xi na nandzu, nandzu wu na mina ni vanhu va mina. ₂₈Hi khongeleleni eka HOSI Xikwembu, hikuva tilo leri ni xihangu lexi swi hi karhatile ku ringana; ndzi ta mi tshika mi famba, a mi nga ha kali mi tshama.” ₂₉Muxe a ku ka yena: “Sweswi ndzi nga ta huma laha ka wena, ndzi ta tlakusa mavoko ya mina ndzi khongela HOSI Xikwembu; tilo ri ta yima, naswona a ku nga ha vi na xihangu, kutani hi kona u nga ta tiva leswaku misava i ya HOSI Xikwembu. ₃₀Kambe ndza swi tiva leswaku wena ni malandza ya wena, ni sweswi a mi si va ni xichavo eka HOSI Xikwembu.” ₃₁(Swimila swa ntsembyani ni swa maxalana swi herisiwile hi xihangu, hikuva maxalana a ma ri karhi ma vupfa, ntsembyani wona a wa ha ku baleka swiluva. ₃₂Kambe swimilana swa tikoroni a swi herisiwanga, hikuva swona swa hlwela ku rhumbuka.)

₃₃Kutani Muxe a suka eka Faro, a huma emutini, a tlakusa mavoko ya yena a khongela HOSI Xikwembu; kutani tilo ni xihangu swi yima, na yona mpfula yi hangalaka. ₃₄Loko Faro a vona leswaku mpfula ni xihangu ni tilo swi yimile, a engeta a dyoha, a tinonon'hwisa, yena ni malandza ya yena. ₃₅Kutani Faro a tinonon'hwisisa sweswo, a nga tshiki vanhu va Israele leswaku va famba, tanihilaha HOSI Xikwembu a xi vurile hakona, hi nomo wa Muxe.