Ezekiele 35

₁HOSI Xikwembu xi vulavula na mina xi ku: ₂“Wena munhu, languta leswi humelelaka entshaveni ya Seyira, kutani u tshinya vaaki va kona. ₃Va byele leswaku mina HOSI N'wini wa hinkwaswo ndzi ni rito eka vona leri nge: ‘N'wina va le ntshaveni ya Seyira, ndzi lwa na n'wina! Ndzi ta tlakusa voko ra mina ndzi mi ba; tiko ra n'wina ndzi ta ri hundzula mananga layo chavisa. ₄Miti ya n'wina ndzi ta yi hundzula marhumbi, ni tiko ra n'wina ri ta va mananga, kutani mi ta tiva leswaku HOSI Xikwembu, hi mina! ₅N'wina va le Edomu, i khale mi ri karhi mi vengana ni Vaisraele. Esikwini leri va nga wela hi khombo, va biwa hi nkhavi lowukulu hikwalaho ka swidyoho swa vona, n'wina mi va tshikile va dlawa hi matlhari. ₆Hikokwalaho, mina HOSI N'wini wa hinkwaswo ndza tiyisa hi ku hlambanya ndzi ri: Ngati ya n'wina yi ta halatiwa, ni vugevenga lebyi mi byi endleke byi ta vuya hi n'wina; mi ta dlawa, hikuva mi pfumerile leswaku ngati yi halatiwa etikweni. ₇Ntshava ya Seyira ndzi ta yi hundzula mananga layo chavisa; a ku nga ha vi na munhu na un'we loyi a tsemakanyaka hi le ka yona. ₈Mintsumbu ya vanhu lava dlayiweke, ndzi ta yi hangalasa yi tata tintshava ta n'wina ni timbala ni minkova. ₉Tiko ra n'wina ri ta va mananga hilaha ku nga heriki, emitini ya kona a ku nga ha tshami munhu, kutani mi ta tiva leswaku HOSI Xikwembu, hi mina!’

₁₀“N'wina va le Edomu mi ri: ‘Vaisraele ni va ka Yuda, ku katsa ni matiko ya vona, i swa hina. Matiko ya kona, hi ta va tekela wona!’ Kasi ndzi kona mina HOSI! ₁₁Mina HOSI N'wini wa hinkwaswo ndza tiyisa hi ku hlambanya ndzi ri: Ndzi ta mi xanisa, hikuva mi vengile Vaisraele, mi va hlundzukela, mi navela ni swilo swa vona. Loko ndzi ta va ndzi mi bile, Vaisraele va ta swi tiva leswaku hi mina mani! ₁₂Na n'wina mi ta tiva leswaku hinkwaswo leswi mi swi vuleke loko mi hlekula tintshava ta tiko ra Israele, mina HOSI ndzi swi twile! Mi vurile leswaku tintshava ta kona ti hundzukile mananga, ni leswaku ti nyiketiwile emavokweni ya n'wina leswaku mi ti hlasela. ₁₃Mi lwile na mina hi ku tikurisa ngopfu, mi nga hlawuli marito loko mi vulavula, kambe mina ndzi mi twile! ₁₄Hikokwalaho mina HOSI N'wini wa hinkwaswo ndzi ri: Siku ndzi nga ta hundzula tiko ra n'wina ri va mananga, vanhu hinkwavo va misava va ta tsaka. ₁₅Ndzi ta mi ba, hikuva a mi tsakile loko Vaisraele va ri ekhombyeni; ntshava hinkwayo ya Seyira ni tiko hinkwaro ra Edomu swi ta hundzuka mananga, kutani vanhu va ta tiva leswaku HOSI Xikwembu, hi mina!”