Ezekiele 9

₁Kutani ndzi twa HOSI Xikwembu loko xi ri karhi xi huwelela xi ku: “Tanani, n'wina mi nga ta ba muti wa Yerusalema. Un'wana ni un'wana a a te ni tlhari ra yena!” ₂Hiloko ndzi vona vavanuna va 6 lava humaka en'walungwini, va ta hi nyangwa ya le henhla ya Tempele, hinkwavo va tamele matlhari ya vona. Exikarhi ka vona, a ku ri na un'wana la ambaleke swiambalo swa ntsembyani, a khweketile ebantini ra yena swo tsala ha swona; kutani va fika va yima kusuhi ni alitari ya koporo.

₃Kavaloko ku dzuneka ka Xikwembu xa Israele ku suka endhawini ya kona ehenhla ka tikerubu, ku ya ungamela xihukuva xa Tempele. Kutani munhu loyi a ambaleke swa ntsembyani ni ku khweketa ebantini swo tsala ha swona, a vitaniwa. ₄HOSI Xikwembu xi ku ka yena: “Emutini wa Yerusalema, ku ni vanhu lava twaka ku vava, lava rilaka loko va vona manyala hinkwawo lama endliwaka emutini; kutani wena, rhendzeleka ni muti, u va fungha emimombyeni.” ₅Kutani ndzi twa Xikwembu loko xi ri karhi xi lerisa vavanuna lavan'wana, xi ku: “Landzani munhu loyi loko a rhendzeleka ni muti, mi herisa vaaki va wona; mi nga va tsetseleli kumbe ku va twela vusiwana; ₆dlayani vakulukumba swin'we ni majaha ni vanhwana ni vavasati ni swihlangi, mi va heta; kambe lava funghiweke emimombyeni, mi nga tshuki mi va khumba! Sungulani hi va le Tempeleni.” Hiloko va sungula hi ku dlaya vakulukumba lava a va yimile emahlweni ka Tempele. ₇Kutani Xikwembu xi engeta xi ku ka vona: “Tatani Tempele hi mintsumbu mi yi nyamisa, kutani mi huma mi ya dlaya vanhu emutini.” Hiloko va suka va ya endla tano. ₈Loko va ri karhi va dlaya vanhu, mina a ndzi sele ndzi ri ndzexe, kutani ndzi wa hansi hi mombo, ndzi rila ndzi ku: “Yo, we HOSI N'wini wa hinkwaswo, xana u lava ku chululela vukari bya wena ehenhla ka Yerusalema, u herisa masalela ya Vaisraele, xana?”

₉Xikwembu xi ndzi hlamula xi ku: “Vaisraele ni va ka Yuda va dyohile ngopfu; tiko ra vona ri tele vadlayi, ni kwala Yerusalema va le ku xanisaneni. Va vula leswaku mina HOSI ndzi tshikile tiko ra vona, ni leswaku a ndzi voni leswi va swi endlaka. ₁₀Kambe mina ndzi ta va endla leswi va swi endleke eka van'wana; ndzi nga ka ndzi nga va rivaleli, a ndzi nga va tweli vusiwana.”

₁₁Kavaloko wanuna la ambaleke swiambalo swa ntsembyani ni ku khweketa ebantini swo tsala ha swona, a vuya na mahungu lama nge: “Ndzi hetile hinkwaswo leswi u ndzi leriseke swona.”