Genesa 28

₁Kutani Isaka a vitana Yakobo a n'wi katekisa, a tlhela a n'wi laya a ku ka yena: “U nga tshuki u teka nsati exikarhi ka vanhwanyana va Vakanana: ₂Yana emutini wa Betuwele tata wa mana wa wena ePadani-Aramu, u ya teka un'wana wa vana va Labani makwavo wa mana wa wena, a va nsati wa wena. ₃Xikwembu-xa-matimba-hinkwawo a xi ku katekise, xi ku nyika vatukulu lavo tala swinene leswaku u va tata wa vanhu va ntsandza-vahlayi. ₄Xikwembu a xi ku nyike minkateko ya Abrahama, wena ni vatukulu va wena, leswaku u teka tiko leri u luveleke eka rona ri va ra wena, ri nga tiko leri Xikwembu xi ri nyikeke Abrahama!” ₅Kavaloko Isaka a lelana na Yakobo, kutani Yakobo a ya ePadani-Aramu le ka Labani n'wana Betuwele lowa Muaramu. Labani a a ri makwavo wa Rhaveka mana wa Yakobo na Esawu.

₆Esawu a swi vona loko Isaka a katekisa Yakobo, a twa ni loko a n'wi lerisa ku ya ePadani-Aramu a ya teka nsati kona; naswona Esawu a twa Isaka loko a laya Yakobo a ku: “U nga tshuki u teka nsati exikarhi ka vanhwanyana va Vakanana.” ₇Nakambe loko Yakobo a yingisa tata wa yena ni mana wa yena a suka a ya ePadani-Aramu, Esawu a swi vona, ₈a twisisa ni leswaku tata wa yena a nga tsakeri vanhwanyana va Vakanana. ₉Hiloko a ya eka Iximaele a ya teka Mahalata N'wa-Iximaele wa Abrahama leswaku a va nsati wa yena, ehandle ka lava a a ri na vona. Mahalata a a ri makwavo wa Nebayoto.

₁₀Kutani Yakobo a suka eBerexeba a kongoma eHarani. ₁₁Kutani a ya fika endhawini yin'wana a xwa kona hikuva dyambu a ri perile. Loko a etlela, a teka ribye rin'wana kwala ndhawini leyi a ri khegela. ₁₂Kutani a lorha ku ri na phandze leri dzimiweke emisaveni, makumu ya rona ma dliva tilo. Kutani a vona tintsumi ta Xikwembu, tin'wana ti ri karhi ti xika tin'wana ti ri karhi ti khandziya! ₁₃HOSI Xikwembu a xi yimile etlhelo ka yena, kutani xi ku: “Hi mina HOSI, Xikwembu xa Abrahama na Isaka. Tiko leri u etleleke eka rona ndzi ta ku nyika rona, wena ni vatukulu va wena. ₁₄Vatukulu va wena va ta tala ku fana ni ntshuri wa misava; mi ta hangalaka na tiko mi ya evupeladyambu, ni le vuxeni, ni le n'walungwini, ni le dzongeni. Vanhu hinkwavo laha misaveni va ta katekisiwa hikwalaho ka wena ni vatukulu va wena. ₁₅Vona, ndzi na wena; ndzi ta ku hlayisa hinkwako lomu u nga ta ya kona, ndzi tlhela ndzi ku vuyisa etikweni leri, hikuva ndzi nga ka ndzi nga ku tshiki ku kondza ndzi endla hinkwaswo leswi ndzi ku byeleke swona.” ₁₆Kutani Yakobo a phaphama evurhongweni, a ku: “Hakunene HOSI Xikwembu xi kona endhawini leyi! Mina a ndzi nga swi tivi!” ₁₇Kutani a sungula ku chava a ku: “Ndhawu leyi ya hlamarisa swinene! Leyi yo va yona yindlu ya Xikwembu, naswona yo va yona nyangwa ya tilo!”

₁₈Kutani Yakobo a pfuka nimpundzu swinene, a teka ribye leri a a ri khegerile, a ri yimisa leswaku ri ta va xitsundzuxo, a chela mafurha ehenhla ka rona. ₁₉Kutani ndhawu leyi a yi thya vito ra Betele (hileswaku: “Yindlu-ya-Xikwembu”). Khale ndhawu leyi a yi tiviwa hi vito ra Luzi. ₂₀Kutani Yakobo a hlambanya a ku: “Loko wena Xikwembu wo va na mina, u ndzi hlayisa eriendzweni leri ndzi nga ka rona, u ndzi nyika swakudya ni swiambalo, ₂₁ndzi kondza ndzi tlhelela emutini wa tatana hi ku rhula, wena HOSI u ta va Xikwembu xa mina. ₂₂Ribye leri ra xitsundzuxo leri ndzi ri yimiseke, ri ta va yona yindlu ya wena Xikwembu. Eka hinkwaswo leswi u nga ta ndzi nyika swona, ndzi ta ku humesela vukhume bya swona.”