Genesa 42

₁Kuteloko Yakobo a twa leswaku koroni yi kona le Egipta, a ku ka vana va yena: “Mi tshamela yini mi langutana hi mahlo xana?” ₂A engeta a ku: “Yingisani, ndzi twe leswaku koroni yi kona le Egipta; kutani n'wina rhelelani mi ya hi xavela, hi ta ka hi nga fi hi ndlala.” ₃Hiloko vamakwavo wa Yosefa va khume va rhelela va ya etikweni ra Egipta va ya xava koroni, ₄kambe Yakobo a nga pfumelanga leswaku Benjamini ndzisana ya Yosefa a famba na vona, hikuva Yakobo a a chava leswaku a nga tshuka a humelele hi khombo. ₅Hi ndlela leyi, vana va Yakobo va longoloka ni van'wana va ya eku singileni hikwalaho ka ndlala leyi a yi ri kona etikweni ra Kanana.

₆Enkarhini wolowo, Yosefa a a ri murhangeri wa tiko ra Egipta; hi yena loyi a a xavisela vanhu hinkwavo koroni. Kutani vamakwavo wa yena va ta, va fika va nkhinsama emahlweni ka yena, va languta hansi. ₇Loko Yosefa a vona vamakwavo, a hatla a va tiva, kambe a tiendla loyi a nga va tiviki, a vulavula na vona hi ku va karihela, a ku: “Mi huma kwihi xana?” Vona va ku: “Hi huma etikweni ra Kanana; hi tile ku ta xava swakudya.” ₈Hi mukhuva lowu, Yosefa a tiva vamakwavo, kambe vona va nga n'wi tivi. ₉Hiloko Yosefa a tsundzuka milorho leyi a tshamaka a yi lorha hi tlhelo ra vona, kutani a ku ka vona: “N'wina mi tinhlori, mi tile ku ta valanga tiko ra hina mi vona laha ri pfulekeke kona.” ₁₀Vona va ku ka yena: “E-e, we n'wini wa hina. Hina malandza ya wena hi tile ku ta xava swakudya. ₁₁Hinkwerhu hi vana va munhu un'we, hi vanhu vo tshembeka; hina malandza ya wena, a hi tinhlori.” ₁₂Yosefa a ku ka vona: “Ma hemba, n'wina mi lo tela ku ta valanga tiko, ku vona laha ri pfulekeke kona.” ₁₃Vona va ku: “Hina malandza ya wena, hi tswariwile hi ri 12, hi vana va munhu un'we kwale tikweni ra Kanana. Lontsongo ú sale na tatana, kasi makwerhu loyi un'wana a nga ha ri kona.” ₁₄Kambe Yosefa a ku ka vona: “A ndzi hembi loko ndzi ku mi tinhlori. ₁₅Mi ta kamberiwa hi ndlela leyi: Ndzi hlambanya hi vito ra Faro ndzi ri, loko mi nga tisi ndzisana ya n'wina, a mi nga suki endhawini leyi. ₁₆Rhumani un'wana wa n'wina a ya vitana makwenu. Kambe n'wina van'wana mi ta tshama ekhotsweni, mi kamberiwa ku vona loko leswi mi swi vulaka swi ri ntiyiso; loko swi nga ri tano, ndzi hlambanya hi vito ra Faro ndzi ri, mi tinhlori!” ₁₇Kutani Yosefa a va pfalela hinkwavo ekhotsweni, va tshama kona masiku manharhu.

₁₈Hi siku lera vunharhu, Yosefa a ku ka vona: “Mina ndzi munhu loyi a chavaka Xikwembu; loko mo endla leswi ndzi nga ta mi byela swona, ndzi ta mi tsetselela: ₁₉Ku komba leswaku mi vanhu vo tshembeka, un'wana wa n'wina a a sale a ri mubohiwa endlwini leyi mi pfaleriweke eka yona. Kutani n'wina van'wana rhwalani koroni mi yisela mindyangu ya n'wina leyi karhatiwaka hi ndlala. ₂₀Kutani mi vuya haleno ni ndzisana ya n'wina. Hi ndlela leyi, ntiyiso wa leswi mi swi vulaka wu ta tikomba, kutani a mi nga dlawi!” Hiloko va pfumela ku endla sweswo. ₂₁Kutani va byelana va ku: “Hi le khombyeni! Hi tivangele nandzu hi tlhelo ra makwerhu Yosefa, hikuva hi vonile ku karhateka ka yena emoyeni loko a kombela ku tsetseleriwa, kambe hi arile ku n'wi yingisa. Hi swona leswi swi hi vangelaka maxangu lawa!” ₂₂Kutani Rhuveni a ku ka vona: “A ndzi mi byelanga leswaku hi nga tshuki hi dyohela mufana luya, xana? Kambe n'wina a mi lavanga ku ndzi yingisa. Kutani sweswi, hi le ku biweni hikwalaho ka rifu ra yena.” ₂₃A va nga swi tivi leswaku Yosefa wa va twa, hikuva loko a vulavula na vona a a tirhisa mutoloki. ₂₄Hiloko Yosefa a hambananyana na vona a ya rila. Loko a vuya, a vulavula na vona, kutani a hlawula Simiyoni exikarhi ka vona, a n'wi boha va ri karhi va swi vona.

₂₅Kutani Yosefa a lerisa leswaku minkwama ya vamakwavo yi cheriwa koroni yi tala, ni leswaku mali ya un'wana ni un'wana yi tlherisiwa yi vekiwa esakeni ra yena, ni leswaku va longeriwa timbuva. Kutani swi endlisiwa sweswo. ₂₆Hiloko va teka masaka ya vona ya koroni va rhwexa timbhongolo ta vona, va suka va famba. ₂₇Loko va fika laha va nga etlela kona vusiku byebyo, un'wana wa vona a pfula saka, a nusela mbhongolo ya yena eswakudya, kutani a kuma mali ya yena enon'weni wa saka. ₂₈Hiloko a ku ka vamakwavo: “Mali ya mina yi tlherisiwile, hi yaleyi kwala non'weni wa saka!” Loko va twa sweswo, va langutana va ri karhi va rhurhumela hi ku chava, va ku: “I mhaka muni leyi Xikwembu xi nga hi endla yona xana?”

₂₉Loko va fika etikweni ra Kanana, va rungulela Yakobo tata wa vona swilo hinkwaswo leswi swi va humeleleke, va ku: ₃₀“Wanuna loyi a nga murhangeri wa tiko ra Egipta, a a vulavula na hina hi ku hi karihela, a ku hi tinhlori etikweni ra yena. ₃₁Kambe hina hi kaneta, hi ku: ‘E-e, hina a hi tinhlori, hi vanhu vo tshembeka. ₃₂Hinkwerhu ka hina a hi ri majaha ya 12, vana va tatana un'we; makwerhu loyi un'wana a nga ha ri kona, kasi lontsongo ú sele na tatana etikweni ra Kanana.’ ₃₃Kutani wanuna lowa murhangeri wa tiko ra Egipta a ku ka hina: ‘Ndlela leyi ndzi nga ta tiva ha yona leswaku mi vanhu vo tshembeka, hi leyi: Un'wana wa n'wina a a sale kwala, kutani n'wina van'wana rhwalani koroni mi khoma ndlela mi famba, mi yisela mindyangu ya n'wina leyi karhatiwaka hi ndlala. ₃₄Kutani mi vuya ni ndzisana ya n'wina; hi kona ndzi nga ta pfumela leswaku a mi tinhlori, kambe mi vanhu vo tshembeka, kutani ndzi ta mi ntshunxela makwenu, mi xava ni leswi mi swi lavaka laha tikweni.’ ”

₃₅Loko va pfula masaka ya vona va chulula koroni, un'wana ni un'wana o kuma xiputsa xa mali ya yena endzeni ka saka. Hiloko vona ni tata wa vona va tshuka ngopfu. ₃₆Kutani Yakobo tata va vona a ku: “Mi ndzi hetela vana: Yosefa a nga ha ri kona, na Simiyoni a nga ha ri kona. Namuntlha mi lava ku teka na Benjamini! Swilo leswi hinkwaswo swi ndzi heta matimba.” ₃₇Kambe Rhuveni a ku ka tata wa yena: “Benjamini, n'wi veke emavokweni ya mina, ndzi ta vuya na yena. Loko ndzo ka ndzi nga vuyi na yena, teka vana va mina va vafana u va dlaya.” ₃₈Kambe Yakobo a ku: “N'wananga Benjamini, mi nge fambi na yena, hikuva hosi ya yena Yosefa ú file. Benjamini ú lo sala a ri yexe. Loko a nga tshuka a humelela hi khombo eriendzweni leri mi nga ta va na rona, mi ta va mi ndzi vangele ku fa hi mbitsi eku dyuhaleni ka mina.”