Ku ponisiwa lokukulu
1Hikokwalaho, hi fanele ku hlayisa swinene timhaka leti hi ti tweke, leswaku hi ta ka hi nga hambuki endleleni ya tona. 2Hikuva loko mhaka leyi vuriweke hi tintsumi yi tiyisiwile, ni loko ku tlula ka milawu ni ku tiarisa hinkwako ku kumile ku biwa loku fanekelaka, 3xana hina hi nga pona hi ndlela yihi, loko hi nyenya ku ponisiwa lokukulu ko tano xana? Hosi yi vurile ta ku ponisiwa loku, ka ha ri eku sunguleni, kutani ku tlhela ku tiyisiwa eka hina hi lava va tweke timhaka ta kona. 4Xikwembu na xona a xi ri karhi xi tiyisa vumbhoni bya kona hi ku endla swikombiso ni swihlamariso ni mahlori ya tinxaka-xaka, ni ku avela tinyiko ta Moya lowo Kwetsima hi ku rhandza ka xona.
Murhangeri eku poniseni
5Misava leyi yi taka, yona leyi hi vulavulaka hi yona, Xikwembu a xi yi vekanga emavokweni ya tintsumi. 6Kun'wana ku vuriwile vumbhoni lebyi nge:
“Munhu i ncini leswaku u va ni mhaka na yena,
kumbe n'wana wa munhu leswaku u tikarhatela yena xana?
7U n'wi vekile a va hansi ka tintsumi nkarhinyana,
u n'wi tlhandlekile harhi ya ku kwetsima ni ku twala enhlokweni;
8u vekile hinkwaswo swi va hansi ka minkondzo ya yena.”
Kutani ke, loko Xikwembu xi vekile hinkwaswo ehansi ka minkondzo ya yena, swi vula leswaku a xi siyanga xilo ni xin'we xi nga ri hansi ka yena. Kambe, hilaha timhaka ti yimeke hakona, hina a hi si kota ku vona swilo hinkwaswo swi ri hansi ka yena. 9Kambe hi vona Yesu, loyi a nga endliwa ku va hansi ka tintsumi nkarhinyana, sweswi a nga nyikiwa ku kwetsima ni ku twala swi va harhi ya vuhosi enhlokweni ya yena, hi mhaka ya ku twisiwa ku vaviseka ka rifu; a swi ri leswaku, hi tintswalo ta Xikwembu, a twa nhlomulo wa rifu hikwalaho ka munhu un'wana ni un'wana.
10Hikuva a swi fanela leswaku Xikwembu, lexi swilo hinkwaswo swi hanyelaka xona ni ku hlayisiwa hi xona, loko xi fikisa vana va xona lavo tala eku kwetsimeni, xi endla leswaku murhangeri wa ku ponisiwa ka vona a va loyi a hetisekeke, hi mhaka ya ku vaviseka ka yena. 11Hambi a ri Yesu loyi a basisaka vanhu eswidyohweni, hambi va ri lava basisiwaka, hinkwavo va huma eka Tatana un'we. Hi yona mhaka leyi endlaka leswaku Yesu a nga khomiwi hi tingana ku va vula vamakwavo, 12a ku ka Xikwembu:
“Ndzi ta twarisa vito ra wena eka vamakwerhu,
ndzi ta ku dzunisa hi tinsimu exikarhi ka nhlengeletano.”
13A engeta a ku:
“Ndzi ta veka ku tshemba ka mina eka xona.”
Nakambe a ku:
“Hi mina loyi, kun'we ni vana lava Xikwembu xi ndzi nyikeke vona.”
14Hikokwalaho, leswi vana va nga va nyama ni ngati yin'we hinkwavo, swi tano na yena: I wa ntumbuluko wun'we na vona leswaku, hi rifu ra yena, a ta kota ku herisa loyi a nga ni matimba ya rifu, a nga yena Diyavulosi, 15kutani a ntshunxa hinkwavo lava a va ri evuhlongeni vutomi bya vona hinkwabyo, hi mhaka ya ku chava rifu. 16Hikuva, hakunene, a hi tintsumi leti a tikarhatelaka tona, kambe ú tikarhatela vatukulu va Abrahama. 17Hikokwalaho swi nga fanela leswaku a endliwa la fanaka ni vamakwavo hi matlhelo hinkwawo, a ta va Muprista Lonkulu wa tintswalo ni loyi a tshembekeke entirhweni wa Xikwembu, leswaku a susa swidyoho swa vanhu. 18Hikuva leswi na yena a nga twa ku vaviseka ni ku ringiwa, wa swi kota ku pfuna lava ringiwaka.
