Vaavanyisi 14

₁Samsoni a rhelela a ya eTimina, kutani a fika a vona nhwanyana un'wana wa Mufilista. ₂Kutani a tlhelela ekaya, a fika a byela tata wa yena ni mana wa yena, a ku: “Ndzi vonile nhwanyana un'wana wa Mufilista eTimina, kutani ndzi kombela leswaku mi ya ndzi tekela yena, a va nsati wa mina.” ₃Kambe tata wa yena ni mana wa yena va ku ka yena: “Xana ko va hava vanhwanyana exikarhi ka maxaka ya ka hina kumbe etikweni ra ka hina hinkwaro, leswi u lavaka ku ya teka nsati exikarhi ka vahedeni lava va Vafilista, xana?” Kambe Samsoni a hlamula tata wakwe, a ku: “Ndzi tekeleni yena, hikuva mina ndzi tsakela yena!” ₄Tata wa yena ni mana wa yena a va swi tivanga leswaku a ma ri makungu ya HOSI Xikwembu, hikuva a xi lava ndlela yo ba Vafilista. Enkarhini lowu, Vafilista a va fuma Vaisraele.

₅Kutani Samsoni a rhelela ni tata wa yena ni mana wa yena, va ya emutini wa Timina. Kuteloko va fika emasin'wini ya vhinya ya le Timina, ku humelela nghala, yi mpfhumpfhela Samsoni yi ri karhi yi bonga. ₆Kutani Moya wa HOSI Xikwembu wu n'wi nghena hi matimba swinene. Hiloko a phatlulela nghala ya kona wonge hi loko a phatlulela ximbutana, a nga khomanga nchumu emavokweni, kambe tata wa yena ni mana wa yena, a nga va byelanga leswi nga humelela. ₇Kutani Samsoni a rhelela a ya vulavurisa nhwanyana wa kona, kutani va twanana.

₈Loko ku hundzile nkarhinyana, Samsoni a tlhelela eTimina ku ya hlomisa nsati. Kutani loko a ri endleleni, a hambuka a ya kamba nghala leyi a yi dlayeke, a kuma tinyoxi to tala eka yona, ti ri ni vulombe. ₉Kutani Samsoni a hakula vulombe bya kona, a famba a khomile a ri karhi a dya, a fika a pambulela tata wa yena ni mana wa yena, va dya. Kambe a nga va byelanga leswaku vulombe lebyi a byi hakuriwile eka nghala leyi a yi dlayeke.

₁₀Kutani tata wa Samsoni a rhelela a ya ekaya ka nhwanyana loyi; kutani Samsoni a endla nkhuvo kwale vukon'wanini bya yena, swi nga leswi majaha a ma tolovele ku swi endla. ₁₁Kuteloko Vafilista va vona Samsoni, va rhumela majaha ya 30 ku ya tshama na yena. ₁₂Kutani Samsoni a ku ka vona: “Ndzi pfumeleleni ndzi mi vutisa ntshayito, kutani loko mo kuma nhlamuselo ya kona mi ndzi byela yona ku nga si hela masiku lawa ya 7 ya nkhuvo, ndzi ta mi nyika minceka ya 30 ni swiambalo swo bomba ha swona swa 30. ₁₃Kambe loko mo tsandzeka ku kuma nhlamuselo ya kona, hi n'wina mi nga ta ndzi nyika minceka ya 30 ni swiambalo swo bomba ha swona swa 30.” Kutani vona va ku ka yena: “Tana ni ntshayito wa wena, hi wu twa.” ₁₄Kutani Samsoni a ku ka vona:

Kutani masiku manharhu ma hela, va nga si kuma nhlamuselo ya ntshayito lowu.

₁₅Hi siku ra vumune, va byela nkata Samsoni va ku: “Xavelela nuna wa wena a hi byela nhlamuselo ya ntshayito wa yena; loko swi nga ri tano, wena ni va ka n'wina hi ta mi hisa hi ndzilo. Loko mi hi rhamba, xana a mi lava ku hi vangela vusiwana xana?” ₁₆Kutani nkata Samsoni a ya rila eka nuna wa yena a ku: “Ndza swi vona leswaku a wu na mhaka na mina, a wu ndzi rhandzi. U vutisile majaha ya ka hina ntshayito, kambe a wu ndzi byelanga nhlamuselo ya wona!” Kutani Samsoni a n'wi hlamula a ku: “Vona, ndzi vula hambi tatana na manana, a ndzi va byelanga. Xana wena ndzi nga ku byelela yini nhlamuselo ya kona xana?” ₁₇Wansati loyi a rila eka Samsoni ku ringana masiku ya 7 ya nkhuvo; kutani hi siku ra vu-7, Samsoni a n'wi hlamusela ntshayito, hikuva a a n'wi sindzisile ngopfu. Hiloko wansati loyi a ya byela majaha ya ka vona.

₁₈Hi siku leri ra vu-7, loko dyambu ri nga si pela, majaha ya muti ma ku ka Samsoni:

Samsoni a ku ka vona:

₁₉Hiloko Moya wa HOSI Xikwembu wu nghena Samsoni hi matimba swinene, kutani a rhelela a ya emutini wa Exikaloni, a fika a dlaya vavanuna va muti lowu va 30, a phangha swiambalo swa vona swo bomba ha swona, a ya nyika lava kumeke nhlamuselo ya ntshayito wa yena. Kutani Samsoni a suka a muka a hlundzukile swinene. ₂₀Hiloko va sala va teka nsati wa Samsoni, va n'wi nyika munghana wa yena, loyi a a ri nxangwana ya yena.