Yuditi 3

₁Matiko lawa hinkwawo ma rhumela varhumiwa ku ya kombela ku rhula eka Nebukadnetsara, va ku: ₂“We Nebukadnetsara hosi ya tihosi, hina malandza ya wena hi nkhinsama emahlweni ka wena. Hi endle ku rhandza ka wena. ₃Vona, tindlu ta hina ni tiko ra hina hinkwaro, masimu ya hina hinkwawo ya koroni ni mintlhambi ya swifuwo swa hina, matshanga hinkwawo ya tinyimpfu ta hina ni mintsonga ya kona, swi le mavokweni ya wena. Endla ha swona hilaha u swi rhandzaka. ₄Miti ya hina ni hinkwavo lava akeke eka yona, hi mahlonga ya wena. Tana u hi endla hi ku rhandza ka wena.”

₅Varhumiwa lava va ta eka Holofani, va n'wi byela leswi hinkwaswo. ₆Kutani Holofani a ngirimelela eribuweni ra lwandle ni mavuthu ya yena, a veka mavuthu man'wana eka miti leyi nga henhla ka swintshabyana, a hlawula tinhenha exikarhi ka vavanuna va miti leyi, ti va vaseketeri va yena. ₇Vanhu va miti leyi ni hinkwavo va le tindhawini leti ti yi rhendzeleke, va amukela Holofani, va tikhavise hi tiharhi ta swiluva, va ri karhi va ba swingomana ni ku cina. ₈Kutani Holofani a mbundzumuxa swivandla hinkwaswo leswo hlawuleka swa swikwembu swa vona, a tshetsha ni swihlahla leswo hlawuleka swa vona, hikuva a a lerisiwe ku herisa swikwembu hinkwaswo swa matiko wolawo, leswaku tinxaka hinkwato ti ta gandzela Nebukadnetsara ntsena, vanhu va tindzimi hinkwato ni va tinyimba hinkwato va n'wi gandzela tanihi loko a ri xikwembu.

₉Kutani Holofani a fika endzilekaneni wa tiko ra Esdreloni, kusuhi na Dotani, ku langutana ni xitsunga lexikulu xa Yudiya. ₁₀Laha a dzima mixaxa ya yena exikarhi ka Geba na Sikitapoli, a tshama kona n'hweti hinkwayo, leswaku a hlengeleta hinkwaswo leswi lavekaka swa mavuthu ya yena.