Yuditi 9

₁Yuditi a nkhinsama, a tichela nkuma enhlokweni, a funungula xiambalo xa yena xa le handle, ku sala xo rhanga lexo khwaxa. Hi nkarhi lowu ku humeseriwaka Xikwembu emirhi ya risuna ya madyambu eTempeleni ya Yerusalema, Yuditi a khongela hi rito leri tlakukeke a ku: ₂“Wena HOSI, Xikwembu xa tatana Simiyoni, tsundzuka hilaha u nyikeke Simiyoni banga leswaku a tirihisela eka vanhu va le handle lava khomeke Dina, loyi a a nga si tiva wanuna, va handzula swiambalo swa yena, va n'wi pfinya va etlela na yena, va n'wi nyamisa ni ku n'wi khomisa tingana. Hikuva wena u vurile u ku: ‘Mi nga tshuki mi endla sweswo.’ Kambe vona va swi endlile. ₃Hikokwalaho u nyiketile vafumi va vona leswaku va herisiwa, va dlawa esangwini leri va nga pfinya ni ku etlela na Dina eka rona. U va dlayeterile hinkwavo, swin'we ni mahlonga ya vona ni tindhuna ta vona; vafumi van'wana va vona va dlayiwile eswiluvelweni swa vona. ₄U pfumerile leswaku vasati va vona va khomiwa, ni vana va vona va xisati va tshumbiwa, ni hinkwaswo swa vona swi phangiwa hi Vaisraele vanhu va wena lava rhandzekaka. Vona a va gandzela wena ntsena, va nyenya ku nyamisiwa hi ngati ya valala va vona, va kombela ku pfuniwa eka wena.

“Hikokwalaho we Xikwembu xanga, hambileswi ndzi nga noni, ndzi yingise. ₅Hinkwaswo leswi humeleleke nkarhini wa Simiyoni, ni leswi humeleleke a nga si va kona kumbe loko a nga ha ri kona, i ntirho wa wena. U kungela leswi swi humelelaka sweswi ni leswi swi nga ta humelela enkarhini lowu taka; ina, hinkwaswo leswi u nga swi ehleketa, swi endlekile. ₆Hinkwaswo leswi u swi naveleke, swi tikombisile erivaleni swi ku: ‘Vonani, hi hina lava!’ Tindlela ta wena hinkwato ti tshama ti lulamisiwile, ni ku avanyisa ka wena ku tshama ku tiveka. ₇Sweswi Vaasiriya va ni matimba ku tlurisa, va tinyungubyisa hi tihanci ta vona ni vagadi va tona; va tikurisa hi matimba ya masocha ya vona yo famba hi milenge; va tshemba switlhangu, ni matlhari, ni mavurha, ni swipelupelu swa vona. A va tivi leswaku wena u HOSI leyi herisaka tinyimpi. Vito ra wena u HOSI Xikwembu. ₈Va hlule hi matimba ya wena, u herisa ntamu wa vona eku hlundzukeni ka wena, hikuva va ni makungu yo nyamisa Xivandla lexo hlawuleka xa wena ni ku thyakisa Ntsonga lowo Hlawuleka laha vito ra wena ro dzuneka ri nga kona ni ku tshova timhondzo leti nga etinhleni ta alitari ya wena hi mabanga. ₉Languta ku tikurisa ka vona, u va ba hi vukari bya wena. Ndzi nyike, hambileswi ndzi nga noni, matimba yo endla leswi ndzi kungelaka ku swi endla. ₁₀Hi vukanganyisi bya nomu wa mina u va dlayetela hinkwavo, mahlonga ni tindhuna, vafumi ni malandza ya vona. Herisa ku tikurisa ka vona hi voko ra wansati.

₁₁“Matimba ya wena a ma lawuriwi hi ku tala ka mavuthu, kumbe hi vunhenha bya vanhu; hikuva wena u Xikwembu xa lava titsongahataka, u mupfuni wa lava tshikileriweke, u museketeri wa lava tsaneke, u musirheleli wa lava tshikiweke ni muponisi wa lava va nga riki na ku tshemba. ₁₂Ndza ku khongela, ndzi yingise, we Xikwembu xa kokwana Simiyoni. We Xikwembu xa ndzhaka ya Israele, HOSI ya tilo ni misava, mutumbuluxi wa mati hinkwawo, N'wini wa ntumbuluko wa wena hinkwawo, yingisa xikhongelo xa mina! ₁₃Hundzula marito ya mina ya vukanganyisi ya va swilondza ni mindzhati ya nkhavi eka Vaasiriya, hikuva va kungela swiendlo swa tihanyi eka ntwanano wa wena, ni le ka Tempele ya wena leyo hlawuleka, ni le ka ntshava ya Siyoni, ni le ka tiko ra vanhu va wena. ₁₄Endla leswaku vanhu va wena hinkwavo ni tinyimba hinkwato ta vona, va tiva ni ku twisisa leswaku wena u Xikwembu, Xikwembu xa matimba hinkwawo, ni leswaku ku hava xikwembu xin'wana lexi sirhelelaka Vaisraele handle ka wena!”