Ta vamba ra ntsembyani
1HOSI Xikwembu xi vulavurile na mina xi ku: “Famba u ya xava vamba ra ntsembyani, kutani u tiboha ha rona; u nga tshuki u ri peta ematini!” 2Hiloko ndzi ya xava vamba hilaha HOSI Xikwembu xi ndzi leriseke hakona, kutani ndzi tiboha ha rona. 3Kutani HOSI Xikwembu xi engeta xi vulavula na mina xi ku: 4“Teka vamba leri u ri xaveke, rona leri u tiboheke ha rona, kutani u ya enambyeni wa Yufrata, u fika u ri tumbeta kona ebakweni.” 5Kutani ndzi ya enambyeni wa Yufrata ndzi ya fihla vamba leri kusuhi ni nambu hilaha HOSI Xikwembu xi ndzi leriseke hakona. 6Loko ku hundzile masiku layo tala, HOSI Xikwembu xi vulavula na mina xi ku: “Suka u ya eYufrata, u ya teka vamba leri ndzi nga ku lerisa leswaku u ya ri tumbeta kona.” 7Hiloko ndzi suka ndzi ya handza le Yufrata, laha a ndzi fihlile vamba kona, kutani ndzi kuma leswaku a ri onhakile, ri nga ha pfuni nchumu.
8Kutani HOSI Xikwembu xi vulavula na mina xi ku: 9“Mina HOSI ndzi vurisa sweswo ndzi ri: Manyunyu ya va ka Yuda ni ku tikurisa lokukulu ka va le Yerusalema, ndzi ta swi onha hi mukhuva wolowo. 10Vanhu lava vo homboloka va ala ku yingisa marito ya mina; va tiomisa tinhloko, kutani va endla leswi timbilu ta vona ti va byelaka swona: Va tinyiketa eka swikwembu swin'wana, va swi khongela ni ku swi tirhela. Hikokwalaho, va ta fana ni vamba leri, leri ri nga ha pfuniki nchumu. 11Tanihi leswi munhu a tibohaka hi vamba ri n'wi namarhela, hi mukhuva wolowo ndzi lavile leswaku Vaisraele hinkwavo ni va ka Yuda hinkwavo va ndzi namarhela, leswaku va va vanhu va mina lava vito ra mina ri dzunisiwaka ni ku twarisiwa hi vona. Kambe va arile ku ndzi yingisa. Ndzi vula sweswo mina HOSI.”
Ta jomela ra vhinyo
12HOSI Xikwembu xi ndzi lerisile ku ya byela Vaisraele marito ya xona lama nge: “Jomela rin'wana ni rin'wana ri cheriwa vhinyo ri tala!” Xi engeta xi ku ka mina: “Vona va ta ku hlamula va ku: ‘Hina ha swi tiva leswaku jomela rin'wana ni rin'wana ri endleriwe ku cheriwa vhinyo ri tala!’ 13Kutani wena u ta va byela leswaku mina HOSI ndzi ri: ‘Yingisani, ndzi ta pyopyisa vanhu hinkwavo lava akeke etikweni leri, ti nga tihosi leti tshamaka exiluvelweni xa Davhida, ni vaprista, ni vaprofeta, ni vaaki hinkwavo va Yerusalema. 14Ndzi ta va fayetela ku fana ni majomela loko ma bananisiwa, tatana ni n'wana va ta fa enkarhini wun'we. A ndzi nga va tsetseleli; ndzi ta va herisa ndzi nga va tweli vusiwana. Ndzi vula sweswo mina HOSI!’ ”
Yeremiya ú laya lava tikurisaka
15Rhiyani ndleve mi yingisa, mi nga tikurisi,
hikuva la vulavulaka i HOSI Xikwembu.
16Kombani xichavo eka HOSI Xikwembu xa n'wina
xi nga si vanga munyama,
mi nga si khuguriwa mi wa etintshaveni
loko dyambu ri ya eku peleni.
A mi languterile ku vonakala,
kambe HOSI Xikwembu xi tisile vusiku,
ni xinyami xa byona xo chavisa.
17Loko mi ala ku yingisa,
ndzi ta ya rila exihundleni hikwalaho ka ku tikurisa ka n'wina;
ndzi ta rila hi xiviti ndzi halata mihloti,
hikuva vanhu va HOSI Xikwembu va yisiwile evukhumbini.
Rito ra Xikwembu eka hosi ya tiko
18HOSI Xikwembu xi ku ka mina:
“Byela hosi ya tiko ni mana wa yona
leswaku va suka exiluvelweni va tshama ehansi,
hikuva harhi ya vona yo saseka ya vuhosi
yi susiwile etinhlokweni ta vona.
19Miti ya le dzongeni yi rhendzeriwile hi valala,
a ka ha ngheni munhu eka yona;
va ka Yuda va yisiwa evukhumbini,
va famba hinkwavo, ku nga sali na un'we.”
Va le Yerusalema va ta biwa
20We Yerusalema, languta,
u vona valala lava taka hi le n'walungwini.
Vanhu lava Xikwembu a xi ku nyikile
leswaku u va risa kukota ntlhambi wo saseka, va kwihi xana?
21Xana u ta ku yini, siku leri vamatiko lava u va endleke vanghana va wena,
va nga ta ku hundzukela va ku fuma, xana?
U ta khomiwa hi switlhavi
ku fana ni wansati loyi a nga kusuhi ni ku tintshunxa.
22Loko u tivutisa u ku:
“Xana makhombo lawa ndzi vangeriwa hi yini xana?”
tiva leswaku valala va ku hluvula swiambalo va ku pfinya
hikwalaho ka ku tala ka swidyoho swa wena!
23HOSI Xikwembu xi ri:
“Xana munhu wa le Etiyopiya a nga ncinca nhlonge ya yena ke,
kumbe yingwe yi nga hundzula mavala ya yona xana?
E-e! Na wena u toloveleke ku endla leswo biha,
u nge pfuki u endlile leswinene.
24Ndzi ta ku hahisa ku fana ni mungu
loko ku hunga moya wa le mananga.
25Lexi hi xona xiphemu xa wena,
we Yerusalema, lexi mina HOSI ndzi nga ku avela xona,
hikuva u ndzi rivarile,
u tshemba swikwembu swa mavunwa.
26Hikokwalaho na mina ndzi ta ku hluvula swiambalo,
vanhu va ku vonela.
27Vuoswi lebyi u byi endlaka le handle eswitsungeni,
ni ku navela ka wena ka manyala, ni vunghwavava bya wena,
ndzi swi vonile hinkwaswo.
We Yerusalema, u le khombyeni,
hikuva u tsandzeka ku susa thyaka leri!
Xana u ta tsandzeka ku fikela rini ke?”
