Yeremiya 26

₁Loko Yoyakimi n'wana Yosiyasi hosi ya Yuda a ha ku vekiwa ku va hosi, Yeremiya a kuma marito ya HOSI Xikwembu lama nge: ₂“Yima exivaveni xa Tempele laha vanhu hinkwavo va ka Yuda va taka ku ta khongela, u va tivisa timhaka hinkwato leti ndzi ku lerisaka tona; u nga va fihleli nchumu! ₃Kumbexana va ta yingisa va hundzuka, hinkwavo va tshika mintirho ya vona leyo homboloka, kutani na mina ndzi ta tshika makungu ya mina ya ku va herisa, lama vangiweke hi mintirho ya vona leyo biha. ₄Va byele leswaku mina HOSI ndzi ri: ‘Loko mi ala ku ndzi yingisa, mi nga pfumeli ku famba hi milawu leyi ndzi mi nyikeke yona, ₅ni loko mi nga yingisi leswi vaprofeta malandza ya mina va mi byelaka swona — va nga lava ndzi mi rhumelaka vona minkarhi hinkwayo, kambe mi nga va yingisi —, ₆yindlu leyi ndzi ta yi wisa ku fana ni ya le Xilo, na wona muti lowu ndzi ta wu hundzula ndzhukano eka vanhu va matiko hinkwawo.’ ”

₇Vaprista ni vaprofeta ni vanhu hinkwavo va twa Yeremiya loko a karhi a vulavula marito lawa eTempeleni. ₈Kutani loko a hetile ku vula hinkwaswo leswi HOSI Xikwembu xi n'wi leriseke ku ya tivisa vanhu hinkwavo, vaprista ni vaprofeta ni ntshungu hinkwawo va n'wi khoma va ku: “U fanele ku fa! ₉Hikwalaho ka yini u tiendla muprofeta la vulavulaka hi vito ra HOSI Xikwembu, kutani u vula leswaku yindlu leyi yi ta wa ku fana ni ya le Xilo, ni leswaku muti lowu wu ta hundzuka rhumbi, ku nga ha tshami munhu eka wona, xana?” Kutani ntshungu lowu a wu ri kona eTempeleni wu rhendzela Yeremiya.

₁₀Loko varhangeri va tiko ra Yuda va twa leswi humelelaka, va hatla va suka entsindza, va tlhandlukela eTempeleni, va fika va tshama eswitshan'wini swa vona ehubyeni, kusuhi ni nyangwa ya Tempele leyi vuriwaka “Nyangwa Leyintshwa”. ₁₁Hiloko vaprista ni vaprofeta va mangalela Yeremiya emahlweni ka varhangeri ni ntshungu hinkwawo, va ku: “Munhu loyi ú fanele ku fa, hikuva ú tiendlile muprofeta a vulavula swo biha ehenhla ka muti lowu, hilaha mi swi tweke hakona.”

₁₂Kutani Yeremiya a hlamula varhangeri hinkwavo ni ntshungu, a ku: “I HOSI Xikwembu lexi xi ndzi rhumeke ku vula marito hinkwawo lawa mi ma tweke, lama kongomaka Tempele leyi ni muti lowu. ₁₃Hikokwalaho, hundzukani mi lulamisa mahanyelo ya n'wina ni swiendlo swa n'wina, mi yingisa leswi HOSI Xikwembu xa n'wina xi mi byelaka swona, kutani xona xi ta tshika makungu ya xona ya ku mi ba, lawa xi mi tiviseke wona. ₁₄Loko a ri mina, ndzi le mavokweni ya n'wina, ndzi endleni leswi mi vonaka leswaku hi swona swi ndzi faneleke. ₁₅Kambe tivani leswaku loko mi ndzi dlaya, mi ta va mi halatile ngati leyi nga riki na nandzu, kutani hi n'wina ni vaaki va muti lowu lava mi nga ta va ni nandzu, hikuva loyi a ndzi rhumeke ku mi byela marito hinkwawo lawa mi ma tweke, i HOSI Xikwembu hi xiviri xa xona.”

₁₆Kutani varhangeri va tiko ni ntshungu hinkwawo va vulavula ni vaprista ni vaprofeta, va ku: “A ku na nandzu lowu munhu loyi a fanelaka ku dlayiwa hikwalaho ka wona, hikuva leswi a nga hi byela swona swi huma eka HOSI Xikwembu xa hina.” ₁₇Ku tlhela ku yima van'wana exikarhi ka vakulukumba va tiko, va vulavula ni ntshungu lowu a wu ri kona, va ku: ₁₈“Loko hosi Hezekiya a ha fuma etikweni leri ra Yuda, a ku ri ni muprofeta Mikiya wa le Morexeta; hina hinkwerhu va ka Yuda hi n'wi twile loko a hi tivisa marito ya HOSI ya matimba hinkwawo, lawa ya nge:

₁₉“Xana Hezekiya hosi ya hina va ka Yuda, ni va ka hina hinkwavo, va dlayile muprofeta loyi xana? E-e! Va chavile ku dyohela HOSI Xikwembu; va komberile hi matimba leswaku xi va tsetselela, kutani xona xi tshikile makungu ya xona lawa xi ma vuleke, xi nga ha va bi; hikokwalaho hi nga tshuki hi tivangela khombo hi ku dlaya munhu loyi.”

₂₀Ku vile ni muprofeta un'wana, loyi a va ku i Uriya n'wana Xemaya wa muti wa Kiriyata-Yeyarimi; ú vulavurile hi vito ra HOSI Xikwembu, a tshinya Yerusalema ni tiko ra Yuda hi marito lama fanaka swinene ni ya Yeremiya. ₂₁Hosi Yoyakimi a twa marito ya Uriya a ri ni tinhenha ta yena ni varhangeri va tiko, kutani a ringeta ku n'wi dlaya, kambe Uriya a swi twa, kutani a chava, a tsutsuma a ya tumbela le Egipta. ₂₂Kutani hosi Yoyakimi a rhuma Elnatani n'wana Akibona le Egipta, a ri ni vavanuna va nga ri vangani, ₂₃va ya khoma Uriya le Egipta, va vuya na yena va fika va n'wi nyiketa eka hosi Yoyakimi, kutani yena a n'wi dlaya hi tlhari, ntsumbu wu cukumetiwa emasirheni ya swikamba.

₂₄Ahikama n'wana Xafani a sirhelela muprofeta Yeremiya leswaku a nga nyiketiwi emavokweni ya ntshungu, kutani hi ndlela leyi muprofeta a pona ku dlawa.