Yeremiya 36

₁Hi lembe ra vumune ra ku fuma ka Yoyakimi n'wana Yosiyasi hosi ya Yuda, HOSI Xikwembu xi vulavula na Yeremiya xi ku ka yena: ₂“Teka buku, kutani u tsala eka yona marito hinkwawo lawa ndzi ku byeleke wona ehenhla ka Vaisraele ni va ka Yuda ni vanhu va tinxaka tin'wana hinkwato, ku sukela enkarhini wa ku fuma ka Yosiyasi ku ta fika namuntlha. ₃Kumbexana va ka Yuda va nga hundzuka loko va twa makhombo lawa ndzi lavaka ku va vangela wona, kutani mina ndzi ta va rivalela swidyoho swa vona ni ku homboloka ka vona.”

₄Hiloko Yeremiya a vitana Baruku n'wana Neriya, kutani Baruku a tsala ebukwini marito lama humaka enon'weni wa Yeremiya, ma nga marito hinkwawo lawa HOSI Xikwembu xi n'wi byeleke wona. ₅Kutani Yeremiya a ku ka Baruku: “Mina a ndza ha pfumeleriwi ku ya eTempeleni. ₆Hikokwalaho wena u ta ya kona hi siku ra ku titsona swakudya. Marito ya HOSI Xikwembu lawa ndzi ku byeleke wona, lawa u ma tsaleke ebukwini, u ta ma hlayela vanhu hinkwavo, kutani na vona va ka Yuda hinkwavo lava humeke emitini ya vona ku ta eTempeleni, va ta twa marito ya kona. ₇Kumbexana vanhu lava va ta hundzuka etindleleni ta vona leto homboloka, kutani va ya rila eka HOSI Xikwembu, hikuva xona xi vurile leswaku xi lava ku va ba hi vukari bya xona lebyikulu byo chavisa.” ₈Hiloko Baruku n'wana Neriya a endla hinkwaswo leswi muprofeta Yeremiya a n'wi leriseke swona, a ya eTempeleni ku ya hlaya marito ya HOSI Xikwembu lawa a ma tsaleke ebukwini.

₉Hi n'hweti ya vu-9 ya lembe ra vuntlhanu ra ku fuma ka Yoyakimi n'wana Yosiyasi hosi ya Yuda, vaaki hinkwavo va Yerusalema ni vanhu hinkwavo lava humeke emitini ya Yuda va ya eYerusalema, va vekeriwa siku ra ku titsona swakudya emahlweni ka HOSI Xikwembu. ₁₀Kutani Baruku a yima eTempeleni emahlweni ka yindlu ya Gemariya n'wana Xafani lowa matsalani; yindlu ya kona a yi ri exivaveni xa le henhla xa Tempele, kusuhi ni nyangwa leyi vuriwaka “Nyangwa Leyintshwa”, kutani Baruku a hlayela vanhu hinkwavo marito ya Yeremiya lama tsariweke ebukwini, va ma twa hinkwawo.

₁₁Loko Mikaya n'wana Gemariya wa Xafani a twile marito hinkwawo ya HOSI Xikwembu lama hlayiweke ebukwini, ₁₂a rhelela a ya entsindza, a kongoma endlwini ya matsalani, kutani a kuma tindhuna hinkwato ti tshamile ehubyeni. A ku ri na matsalani Elixama, na Delaya n'wana Xemaya, na Elnatani n'wana Akibora, na Gemariya n'wana Xafani, na Sedekiya n'wana Hananiya, ni tindhuna letin'wana hinkwato. ₁₃Kutani Mikaya a va byela marito hinkwawo lawa a ma tweke, loko Baruku a ma hlayela vanhu hinkwavo. ₁₄Hiloko tindhuna hinkwato ti lerisa Yehudi n'wana Netaniya wa Xelemiya wa Kuxi ku ya byela Baruku leswaku a ta entsindza, a ri ni buku leyi a yi hlayeleke vanhu. Kutani Baruku n'wana Neriya a teka buku, a ya na yona eka tindhuna. ₁₅Tona ti ku ka yena: “Tshamisa hansi, u hi hlayela buku leyi!” Kutani Baruku a va hlayela yona. ₁₆Loko va twile timhaka ta kona hinkwato, va tshuka ngopfu, va langutana, kutani va ku ka Baruku: “Mahungu lawa hinkwawo, hi fanele ku ya ma vikela hosi!” ₁₇Kutani va vutisa Baruku va ku: “Hi byele, xana marito lawa hinkwawo u ma tsarise ku yini xana? Xana hi lawa ya humeke enon'weni wa Yeremiya xana?” ₁₈Baruku a va hlamula a ku: “Ina, hi yena loyi a ndzi leriseke wona, kutani mina ndzi ma tsarile ebukwini hi inki.” ₁₉Kavaloko tindhuna ti ku ka Baruku: “Famba u ya tumbela wena na Yeremiya, ku nga vi na loyi a tivaka lomu mi nga kona.”

₂₀Kutani vakulukumba va ya veka buku endlwini ya matsalani Elixama, kutani va vikela hosi timhaka ta kona hinkwato. ₂₁Kavaloko hosi yi rhuma Yehudi ku landza buku ya kona, kutani Yehudi a ya yi teka endlwini ya matsalani Elixama, a vuya na yona a fika a yi hlayela hosi ni tindhuna ta yona hinkwato leti a ti ri kwala ntsindza. ₂₂A wu ri nkarhi wa vuxika hi n'hweti ya vu-9. Hosi Yoyakimi a a tshamile endlwini ya yena a ri karhi a orha ndzilo. ₂₃Loko Yehudi a hetile ku hlaya mapapila manharhu kumbe mune, hosi Yoyakimi a tsema mapapila ya kona hi mukwana, a ma hoxa endzilweni, a endlisa sweswo ku kondza buku hinkwayo yi tshwa yi hela. ₂₄Marito lawa hosi Yoyakimi ni malandza ya yena va ma tweke a ma va tshukisanga, hikokwalaho a va handzulanga swiambalo swa vona. ₂₅Hambileswi Elnatani na Delaya na Gemariya va kombeleke hi matimba leswaku hosi yi nga tshuki yi hisa buku, yona a yi va yingisanga. ₂₆Kutani hosi Yoyakimi a lerisa Yerahamiele n'wana wa yena, na Seraya n'wana Aziriele, na Xelemiya n'wana Abideli, leswaku va ya khoma matsalani Baruku, va khoma na yena muprofeta Yeremiya; kambe HOSI Xikwembu a xi va tumbetile.

₂₇Kuteloko hosi Yoyakimi a hisile buku leyi tsariweke hi Baruku, marito ya yona ma ri lama humaka enon'weni wa Yeremiya, HOSI Xikwembu xi vulavula na Yeremiya xi ku: ₂₈“Teka yin'wana buku, u tsala eka yona marito hinkwawo lawa a ma ri ebukwini leyo sungula, leyi nga hisiwa hi Yoyakimi hosi ya Yuda. ₂₉Kutani u byela yena Yoyakimi leswaku mina HOSI ndzi ni rito eka yena, hikuva ú hisile buku leyo sungula a ri karhi a vilela a ku: ‘Hikwalaho ka yini va tsarile eka yona leswaku hosi ya Babilona yi ta ta yi ta hlasela tiko leri, yi yisa vanhu ni swifuwo swa vona evukhumbini, xana?’ ₃₀Mina HOSI ndzi vula leswi ehenhla ka Yoyakimi hosi ya Yuda, ndzi ri: A ku nga vi na un'we wa ka vona loyi a nga ta tshama exiluvelweni xa Davhida. Ntsumbu wa Yoyakimi wu ta cukumetiwa ehandle, wu tshwa hi dyambu ninhlekanhi, nivusiku wu wela hi xirhami. ₃₁Ndzi ta ba Yoyakimi ni vana va yena ni malandza ya yena, hikwalaho ka swidyoho swa vona. Makhombo hinkwawo lawa ndzi ma vuleke ehenhla ka vona, ni le henhla ka vaaki va Yerusalema ni vanhu va ka Yuda, ndzi ta va vangela wona hikuva a va ndzi yingisanga.”

₃₂Hiloko Yeremiya a teka buku yin'wana, a yi nyika Baruku n'wana Neriya matsalani wa yena. Kutani Baruku a tsala eka yona leswi Yeremiya a n'wi byeleke swona, ma nga marito hinkwawo lawa a ma ri ebukwini leyi hisiweke hi Yoyakimi hosi ya Yuda; kutani ku engeteleriwa marito man'wana layo tala, lama fambelanaka ni layo sungula.