Yohane 11

₁Siku rin'wana, munhu loyi va nge i Lazaro wa Betaniya, a khomiwa hi vuvabyi, a ri emutini wa vamakwavo Mariya na Marta. ₂(Mariya, hi yena loyi a tshamaka a tota Hosi hi mafurha layo nun'hwela, a tlhela a n'wi sula milenge hi misisi ya yena; kutani Lazaro loyi a a vabya loyi, a a ri makwavo wa yena.) ₃Vamakwavo lava va xisati va rhumela rito eka Yesu, va ku ka yena: “Hosi, loyi u n'wi rhandzaka wa vabya.” ₄Loko Yesu a twa sweswo, a ku: “Vuvabyi lebyi a byi nga yisi eku feni, kambe i bya ku dzunisa Xikwembu, ni leswaku N'wana wa Xikwembu a dzunisiwa hikwalaho ka byona.”

₅Yesu a a rhandza Marta ni makwavo Mariya, a rhandza na Lazaro. ₆Loko a twile leswaku Lazaro wa vabya, a yimanyana masiku mambirhi laha a a ri kona. ₇Kutani endzhaku ka sweswo a ku ka vadyondzisiwa: “A hi tlheleleni eYudiya.” ₈Vadyondzisiwa va ku ka yena: “Mufundhisi, ku nga ri khale, Vayuda a va lava ku ku khandla hi maribye. Xana wa ha lava ku tlhelela kona ke?” ₉Yesu a hlamula a ku: “Xana siku rin'we a ri na tiawara ta 12 xana? Loko munhu a famba ninhlekanhi, a nga khuguriwi, hikuva ú vona ku vonakala ka misava leyi; ₁₀kambe loko munhu a famba nivusiku, wa khuguriwa, hikuva ku vonakala a ku kona eka yena.”

₁₁Loko a vurile sweswo, a engeta a ku ka vona: “Lazaro murhandziwa wa hina, ú etlele, kambe ndzi ya ku ya n'wi pfuxa.” ₁₂Vadyondzisiwa va ku ka yena: “Hosi, loko a etlele, ú ta hanya.” ₁₃Yesu a a vulavula hi ta ku fa ka Lazaro, kambe vona a va anakanya leswaku ú vulavula hi ta ku etlela vurhongo byinene. ₁₄Kutani Yesu a va byela erivaleni, a ku: “Lazaro ú file, ₁₅kutani, hikwalaho ka n'wina, ndzi tsakile hileswi a ndzi nga ri kona kwale, leswaku mi ta pfumela. Kambe a hi yeni eka yena!” ₁₆Tomasi loyi a vuriwaka “Hahla”, a ku ka vadyondzisiwa-kulobye: “A hi yeni na hina, leswaku hi ya fa na yena.”

₁₇Kutani loko Yesu a fika, a kuma leswaku Lazaro ú hetile mune wa masiku a ri sirheni. ₁₈Muti wa Betaniya a wu ri kusuhi na Yerusalema; mpfhuka wa kona a wu ri kwalomu ka 3 km. ₁₉Kutani Vayuda lavo tala a va tile ka Marta na Mariya ku ta va chavelela hikwalaho ka rifu ra makwavo wa vona.

₂₀Loko Marta a twa leswaku Yesu wa ta, a ya n'wi hlanganisa; Mariya yena a a tshamile ndlwini. ₂₁Kutani Marta a ku ka Yesu: “Hosi, loko onge u vile kona, ingi makwerhu a nga fanga. ₂₂Kambe nisweswi ndza swi tiva leswaku hinkwaswo leswi u swi kombelaka eka Xikwembu, xona xi ta ku nyika swona.” ₂₃Yesu a ku ka yena: “Makwenu ú ta tlhela a pfuka.” ₂₄Marta a ku ka yena: “Ndza swi tiva leswaku ú ta pfuka hi siku ra makumu, eku pfukeni ka vafi.” ₂₅Yesu a ku ka yena: “Hi mina ku pfuka ni vutomi; la pfumelaka ka mina, hambi a nga fa, ú ta hanya, ₂₆kutani un'wana ni un'wana la hanyaka, a va a pfumela ka mina, a nga ka a nga fi ni siku ni rin'we. Xana wa swi pfumela sweswo xana?” ₂₇A ku ka yena: “Ina Hosi, ndza pfumela leswaku hi wena Mesiya, N'wana wa Xikwembu, loyi a taka laha misaveni.”

₂₈Loko Marta a vurile sweswo, a ya, a ya vitana Mariya makwavo, a n'wi byela hi ku hlevetela a ku: “Mudyondzisi ú kwala, wa ku vitana.” ₂₉Loko Mariya a twa sweswo, a pfuka hi ku hatlisa, a ya eka Yesu. ₃₀(Yesu a a nga si nghena emutini, kambe a a ha ri kwala Marta a nga n'wi hlanganisa kona.) ₃₁Vayuda lava a va ri ndlwini na Mariya va ri karhi va n'wi chavelela, loko va n'wi vona a suka a yima a huma hi ku hatlisa, va n'wi landza hi ku anakanya leswaku ú ya le sirheni ku ya rila kona. ₃₂Loko Mariya a fika laha Yesu a nga kona ni loko a n'wi vona, a nkhinsama emilengeni ya yena, a ku ka yena: “We Hosi, loko onge a wu vile kona, ingi makwerhu a nga fanga.” ₃₃Loko Yesu a n'wi vona a ri karhi a ba nkosi a rila, ni loko a vona Vayuda lava n'wi heleketaka na vona va ri karhi va ba nkosi va rila, a tlhaveka swinene emoyeni ni ku twa ku vaviseka lokukulu; ₃₄kutani a ku: “Mi n'wi vekile kwihi xana?” Va ku ka yena: “Hosi, tana u ta vona.” ₃₅Yesu a rila. ₃₆Kutani Vayuda va ku: “Vonani hilaha a a n'wi rhandza hakona!” ₃₇Van'wana va vona va ku: “Yena loyi a nga pfula mahlo ya lavo-fe-mahlo, hikwalaho ka yini a nga kotanga ku endla leswaku munhu loyi a nga fi xana?”

₃₈Yesu a engeta a tlhaveka emoyeni, a ta kusuhi ni sirha. Sirha a ri ri bako, kutani bako ra kona a ri pfariwile hi ribye. ₃₉Yesu a ku: “Susani ribye!” Marta makwa wa mufi a ku ka yena: “Kambe Hosi, sweswi ku fanele ku va na ku nun'hwa, hikuva ku hundzile mune wa masiku a file.” ₄₀Yesu a ku ka yena: “Xana a ndzi ku byelanga leswaku loko u pfumela, u ta vona ku kwetsima ka Xikwembu xana?” ₄₁Kavaloko va susa ribye, kutani Yesu a languta henhla, a ku: “Tatana, ndza ku nkhensa, hikuva u ndzi yingisile. ₄₂Mina ndzi swi tivile leswaku masiku hinkwawo wa ndzi yingisa, kambe ndzi vurile swilo leswi hikwalaho ka ntshungu lowu yimeke kwala, wu ta kala wu pfumela leswaku hi wena la ndzi rhumeke.” ₄₃Kuteloko a vurile sweswo, a huwelela hi rito leri tlakukeke, a ku: “Lazaro, humela handle!” ₄₄Kutani mufi a huma, a tsondzeleriwile milenge ni mavoko hi malapi, mombo wa yena wu bohiwile hi duku. Yesu a ku ka vona: “N'wi ntshunxeni, leswaku a kota ku muka.”

₄₅Lavo tala exikarhi ka Vayuda lava a va tile ka Mariya, loko va vonile leswi Yesu a swi endleke, va pfumela eka yena. ₄₆Kambe van'wana va vona va ya eka Vafarisi, va ya va byela leswi Yesu a swi endleke.

₄₇Kavaloko vaprista lavakulu ni Vafarisi va vitana Huvo ya Sanedri, va ku: “Hi ta endla yini xana, leswi munhu loyi a endlaka mahlori layo tala? ₄₈Loko hi n'wi tshikisa sweswo, hinkwavo va ta pfumela ka yena, kutani Varhoma va ta ta va ta lovisa ndhawu leyi ya hina, ni ku hi heta hi rixaka.” ₄₉Un'wana wa vona loyi va nge i Kayafasi, a a ri Muprista lonkulu lembe rero, kutani a ku ka vona: “A mi tivi nchumu n'wina; ₅₀xana a mi voni leswaku hi leswi pfunaka hina loko munhu un'we a fela van'wana, ku ri ni leswaku rixaka hinkwaro ri lova xana?” ₅₁Marito lawa a ma nga humi emiehleketweni ya yena; ú ma vurile hileswi a a ri Muprista lonkulu lembe rero, kutani a vhumbha leswaku Yesu ú ta fanela ku fela rixaka; ₅₂naswona ku nga ri ntsena ku fela rixaka, kambe ku ri ku hlengeleta vanhu va Xikwembu lava hangalakeke, a va endla van'we. ₅₃Kutani ku sukela siku rero, Vayuda va boha makungu ya ku dlaya Yesu.

₅₄Hikokwalaho Yesu a nga ha famba-fambanga erivaleni exikarhi ka Vayuda, kambe a suka kwalaho, a ya etikweni leri nge kusuhi ni mananga, emutini lowu vuriwaka Efrayimi, a ya tshama kona ni vadyondzisiwa va yena.

₅₅Nkhuvo wa Paseka ya Vayuda a wu ri kusuhi. Lavo tala lava humaka ematikweni, a va tlhandlukele eYerusalema, va ya tibasisa, nkhuvo wu nga si va kona. ₅₆A va lava Yesu, va vutisana va yimile eTempeleni, va ku: “Xana mi ehleketa yini? A a nga ti enkhubyeni! Xana ú ta ta xana?” ₅₇Vaprista lavakulu ni Vafarisi a va lerisile leswaku, loko un'wana a tiva laha a nga kona, a a va tivise, leswaku va ta kota ku n'wi khoma.