Yohane 21

₁Endzhaku ka sweswo Yesu a tlhela a tikomba eka vadyondzisiwa va yena kusuhi ni lwandle ra Tiberiyasi; ú tikombile hi ndlela leyi: ₂Simoni Petro, na Tomasi loyi va nge i “Hahla”, na Nataniele wa Kana etikweni ra Galeliya, ni vana va Zebediya, ni vadyondzisiwa vambirhi van'wana va Yesu, a va ri swin'we. ₃Simoni Petro a ku ka vona: “Ndzi ya rhiya tinhlampfi.” Va ku ka yena: “Na hina hi famba na wena.” Kutani va suka, va ya nghena ebyatsweni bya vona, kambe a va phasanga nchumu vusiku byebyo.

₄Loko ri sungula ku xa, Yesu a a yimile eribuwini, kambe vadyondzisiwa a va tivanga leswaku i Yesu. ₅Kutani Yesu a ku ka vona: “Vana vanga, mi phasile xana?” Va n'wi hlamula, va ku: “E-e.” ₆A ku ka vona: “Hoxelani rikoka hi tlhelo ra xinene ra byatso, mi ta phasa.” Hiloko va ri hoxa, kutani va tsandzeka ni ku ri koka hikwalaho ka ku tala ka tinhlampfi. ₇Kutani mudyondzisiwa loyi Yesu a a n'wi rhandza a ku ka Petro: “I Hosi!” Loko Simoni a twile leswaku i Hosi, a ambala nguvu ya yena, hikuva a a yi hluvurile, kutani a bvun'wala elwandle. ₈Kambe vadyondzisiwa lava van'wana va ta hi byatso bya vona, va koka rikoka leri a ri tele hi tinhlampfi, hikuva a va nga ri kule ni ribuwu; mpfhuka wa kona a wu lava ku ringana 100 m.

₉Loko va humile va ta eribuwini, va vona ndzilo wa makala, ni tinhlampfi leti tlhandlekiweke ehenhla ka wona, ni xinkwa. ₁₀Yesu a ku ka vona: “Pambulani tinhlampfi tin'wana eka leti ma ha ku ti phasaka sweswi, mi tisa haleno.” ₁₁Simoni Petro a nghena ebyatsweni, a kokela rikoka eribuwini, ri tele hi tinhlampfi letikulu. A ti ri 153. Kambe hambileswi a ti tele ngopfu, rikoka a ri handzukanga. ₁₂Yesu a ku ka vona: “Tanani, mi ta fihlula.” Kambe a ku vanga na mudyondzisiwa na un'we la nga tiyela ku n'wi vutisa a ku: “U mani?” hikuva va swi tivile leswaku hi yena Hosi. ₁₃Kutani Yesu a ta, a teka xinkwa a va nyika; a endlisa sweswo hi tinhlampfi. ₁₄Ku tikomba loku ka Yesu eka vadyondzisiwa va yena, a ku ri ka vunharhu, endzhaku ka loko a pfukile eku feni.

₁₅Kuteloko va fihlurile, Yesu a ku ka Simoni Petro: “Simoni, n'wana Yohane, xana wa ndzi rhandza ku tlula leswi hinkwaswo ke?” A ku ka yena: “Ina, Hosi, wa swi tiva leswaku ndza ku rhandza.” Yesu a ku ka yena: “Risa swinyimpfana swa mina.” ₁₆A engeta ra vumbirhi a ku ka yena: “Simoni, n'wana Yohane, xana wa ndzi rhandza xana?” A ku ka yena: “Ina, Hosi, wa swi tiva leswaku ndza ku rhandza.” Yesu a ku ka yena: “Hlayisa tinyimpfu ta mina.” ₁₇A engeta ra vunharhu a ku ka yena: “Simoni, n'wana Yohane, xana wa ndzi rhandza xana?” Petro a khomiwa hi gome, hi mhaka ya leswi a n'wi vutiseke ra vunharhu a ku: “Xana wa ndzi rhandza xana?” Kutani a ku ka yena: “Hosi, u tiva hinkwaswo, wa swi tiva leswaku ndza ku rhandza.” Yesu a ku ka Petro: “Risa tinyimpfu ta mina. ₁₈Ndzi tiyisisile ndzi ri ka wena: Enkarhini lowu a wa ha ri lontshwa, a wu tiboha hi wexe hi vamba ra wena, u ya lomu u lavaka ku ya kona; kambe loko u ta va u dyuharile, u ta tshambuluta mavoko ya wena, kutani un'wana ú ta ku boha, a ku yisa lomu u nga laviki ku ya kona.” ₁₉A a vurisa sweswo hi ku ringanisa rifu leri Petro a nga ta dzunisa Xikwembu ha rona. Loko Yesu a vurise sweswo, a ku ka yena: “Ndzi landze!”

₂₀Petro a hundzuluka, kutani a vona mudyondzisiwa loyi a a rhandziwa hi Yesu a ri karhi a va landza. (A a ri loyi a tshamaka a voyamela eka Yesu, loko va ri eku dyeni, a hlevetela a ku: “Hosi, i mani loyi a nga ta ku xenga xana?”) ₂₁Loko Petro a n'wi vonile, a ku ka Yesu: “Hosi, swi ta ku yini hi loyi ke?” ₂₂Yesu a ku ka yena: “Loko ndzi lava leswaku a tshama ndzi kondza ndzi vuya, swi nga va yini eka wena ke? Wena, ndzi landze!” ₂₃Hikokwalaho rito rero a nga ri vula ri hangalaka exikarhi ka vamakwavo leswaku mudyondzisiwa loyi a nga ka a nga fi. Kasi Yesu a a nga n'wi byelanga leswaku a nga ka a nga fi; kambe a a te: “Loko ndzi lava leswaku a tshama ndzi kondza ndzi vuya, swi nga va yini eka wena ke?”

₂₄Mudyondzisi loyi, hi yena la vulaka vumbhoni bya timhaka leti, kutani ú ti tsarile. Ha swi tiva leswaku vumbhoni bya yena byi tiyile.

₂₅Ka ha ri ni timhaka tin'wana leto tala leti Yesu a nga ti endla; loko ti nga tsariwa ha yin'we-yin'we, a ndzi tshembi leswaku misava hinkwayo yona yi nga ringana tibuku leti a ti ta tsariwa.