Yobo 11

₂“Xana marito yo tarisa leswi a ma hlamuriwi xana?

Xana munhu a nga tiendla la lulameke hi ku vulavula ngopfu xana?

₃Ku phyaphyarha ka wena ku nga miyeta vanhu ke?

Loko u sola Xikwembu, a wu nga tshinyiwi xana?

₄Wena Yobo, u ri leswi u swi ehleketaka swi lulamile;

u tivula la nga riki na xisandzu emahlweni ka Xikwembu.

₅Loko Xikwembu a xo pfula nomo wa xona xi ku hlamula,

a ndzi ta tsaka ngopfu;

₆a xi ta ku komba swihundla swa vutlhari,

hikuva ku twisisa ka xona ka hlamarisa;

naswona tiva leswaku Xikwembu a xi ku banga

hi ku ya hi vukulu bya swidyoho swa wena.

₇“Xana u nga twisisa leswi Xikwembu-xa-matimba-hinkwawo xi nga swona xana?

Xana u nga tiva laha matimba ya xona ma helelaka kona xana?

₈Vutivi bya xona byi lehile ku hundza matilo,

byi entile byi fika ni le xivandleni xa vafi;

wena Yobo u nge endli nchumu,

hikuva bya wena vutivi a byi fiki helo!

₉Vutivi bya Xikwembu byi navile ku tlula misava,

byi tlula ni malwandle hi ku anama.

₁₀Loko Xikwembu xi hundza xi khoma munhu, xi n'wi yisa ehubyeni,

xi nga siveriwa hi mani xana?

₁₁Xikwembu xi tiva vanhu lava nga pfuniki nchumu,

mintirho ya vona leyo biha, xi hatla xi yi vona.

₁₂Xiphukuphuku xi ta tlhariha,

siku mangwa yi nga ta mila timhondzo.

₁₃“Wena Yobo, veka miehleketo ya wena eka Xikwembu,

tlakusa mavoko u khongela xona.

₁₄Leswo biha leswi nga ka wena, swi cukumete kule,

u nga pfumeleli leswo homboloka swi nghena emutini wa wena.

₁₅Loko u endla tano, u ta languta emahlweni u nga soleki,

u ta va u hlayisekile u nga chavi nchumu.

₁₆Mahlomulo ya wena a wu nga ha ma tsundzuki,

u ta ma rivala ku fana ni mati lama khulukeke ma hundzela mahlweni.

₁₇Kutani vutomi bya wena byi ta vangama kukota dyambu ninhlekanhi,

xinyami xa byona xi ta tlhavela hi vurhonga.

₁₈U ta va u hlayisekile, u ri ni ku tshemba;

u ta lavisisa matlhelo hinkwawo, u ko u kuma ku tshamiseka u wisa.

₁₉U ta etlela u tsakile u nga chavisiwi ha nchumu;

vanhu lavo tala va ta navela ku kateka tanihi wena.

₂₀Kambe mahlo ya lavo homboloka a ma nga ha voni,

ni ndlela yo baleka ha yona a va nga ha yi tivi;

va to langutela ntsena siku ra vona ra ku fa!”