Yobo 15

₂“Munhu wo tlhariha a nge hlamuli hi vutivi byo vevuka onge swimoyana,

a nge tati marito lama hahaka ni moya;

₃a nga ka a nga tiomisi nhloko,

a nge vulavuli leswi nga pfuniki nchumu.

₄Kambe wena Yobo, u onha vukhongeri,

u sivela vanhu ku anakanya Xikwembu.

₅Swidyoho swa wena swi ku nyika marito,

u hlawula mavulavulele ya vakanganyisi.

₆A hi mina ndzi ku avanyisaka, wo tiavanyisa hi ku vulavula ka wena,

marito ya wena ma ku veka nandzu.

₇“Xana ku lo rhanga wena u velekiwa la misaveni,

a wu ri kona tintshava ti nga si tumbuluka xana?

₈Loko Xikwembu xi boha makungu ehubyeni ya xona, u swi twile ke?

Xana vutlhari byo va na wena ntsena ke?

₉Xana u tiva yini, lexi hina hi nga xi tiviki,

leswi u swi twisisaka, swa hi kohla xana?

₁₀Exikarhi ka hina, ku ni lavakulu lava baseke tinhloko,

lava tlulaka ni tata wa wena hi malembe.

₁₁Leswi hi ku chavelelaka hi vito ra Xikwembu,

u bakanyela yini marito ya hina ya musa ke?

₁₂“Vukari byi ku yive mbilu,

byi vangamisa mahlo ya wena:

₁₃I Xikwembu lexi u xi hlundzukelaka,

marito ya wena ma rhuketela xona!

₁₄Munhu wa nyama i ncini, leswaku a va la tengeke,

la velekiweke hi wansati, a nga va la lulameke xana?

₁₅Hambi swi ri swivumbiwa swa le tilweni, Xikwembu a xi swi tshembi,

na rona tilo ra kona, a ri tenganga emahlweni ka xona.

₁₆Hikokwalaho, munhu wo homboloka wo bola miehleketo,

loyi eka yena ku dyoha ku fanaka ni ku nwa mati,

a nge pfuki a va la lulameke!

₁₇“We Yobo, rhiya ndleve, u yingisa,

ndzi ta ku byela leswi ndzi swi kumeke,

₁₈ma nga marito ya vanhu lava tlhariheke.

Vatata wa vona a va va civelanga wona,

₁₉siku va nyikiweke tiko ri va ra vona ntsena,

ku nga si nghena vanhu vambe exikarhi ka vona.

₂₀Va ri, munhu wo homboloka wa tihanyi,

ú ta xaniseka vutomi bya yena hinkwabyo;

₂₁ú ta twa mpfumawulo wo chavisa;

loko a ha tshamisekile, vahlaseri va ta n'wi juma.

₂₂“A nga ha tshembi leswaku a nga pona rifu,

fumu ri n'wi languterile.

₂₃Ku dyiwa hi makoti, swi n'wi yimerile,

wa swi tiva leswaku ku fa swi n'wi fanerile.

₂₄Siku ra munyama ri n'wi heta matimba,

makhombo ni ku xanisiwa swa n'wi hlula, swi n'wi hlasela ku fana ni hosi leyi hlomeke matlhari.

₂₅Hakunene, munhu wo tano u lwa ni Xikwembu,

wa tikurisa emahlweni ka Xikwembu-xa-matimba-hinkwawo,

₂₆a hatla a xi yela a ri karhi a titshemba,

a rhangisa xitlhangu xa yena xo tiya no tsindziyela.

₂₇“Hambileswi xikandza xa yena xi nyukaka,

a dyaka a xurha, a huma ni khwiri,

₂₈miti leyi a yi akeke yi ta herisiwa,

a ku nga ha tshami munhu etindlwini ta yena;

ti lo akeriwa ku hundzuka marhumbi.

₂₉A nga ka a nga ha fumi, vukosi bya yena byi ta dzudzeka,

tinhundzu ta yena a ti nga ha tati tiko;

₃₀rifu ri nge n'wi sukeli,

ndzilo wu ta hisa swihluke swa yena,

matluka ya yena ma ta haha hi moya.

₃₁“Munhu loyi a nga tshuki a tikanganyisa, a tshemba swilo swa hava,

hikuva a swi nga n'wi vuyiseli nchumu.

₃₂Ú ta vuna nkarhi wu nga si fika,

a nge phaki marhavi.

₃₃Mihandzu ya yena yi ta dzudzeka yi nga si vupfa, kukota leya vhinya,

a wisa vuluva bya yena kukota mutlhwari.

₃₄Hakunene, ku tolovelana ni lava sandzaka Xikwembu, a swi tisi minkateko;

la pfumelaka ku xaviwa, ú ta tshwela hi tindlu.

₃₅La tikeke hi leswo homboloka, ú veleka makhombo,

makungu ya yena i vuxisi ntsena.”