Yobo 22

₂“Xana munhu a nga pfuna Xikwembu ha yini ke?

Loko a ri ni mianakanyo leyinene, swi to pfuna yena n'wini.

₃Wena Yobo, loko u endla leswi lulameke, swi nga tsakisa Lowa-matimba-hinkwawo xana?

Hambi mahanyelo ya wena lamanene ma ta n'wi vuyisela yini ke?

₄“Loko Xikwembu xi ku tshinya ni ku ku veka nandzu,

a hi mhaka ya vukhongeri bya wena,

₅kambe xi ku bela ku homboloka ka wena lokukulu;

swidyoho swa wena, a hi ku tala ka swona!

₆“U rihisile varikwenu, va nga ku dyohelanga,

swisiwana, u swi tekerile swiambalo.

₇Lava karheleke, u va tsonile mati yo nwa,

u arile ku phamela lava twaka ndlala.

₈Munhu la fumeke, u n'wi nyike ndhawu,

u tshamisisa eka yona loyi u n'wi tsakelaka.

₉U tlherisile tinoni ti nga kumanga nchumu,

lava pfumalaka vatswari, u va hete matimba.

₁₀Hikokwalaho, u rhiyeriwile mintlhamu matlhelo hinkwawo,

u wele hi makhombo layo chavisa.

₁₁U le xinyamini, a wu voni nchumu,

u mbombomerile exidziveni.

₁₂“Wa swi tiva, Xikwembu xi tlakukile ku tlula matilo,

languta ni tinyeleti letikulu le henhla!

₁₃Kambe wena u ri: ‘Xikwembu xi nga tiva yini,

xana xi nga tsemakanya mapapa ya ntima xi tela ku avanyisa vanhu xana?’

₁₄U ri: ‘Munyama wu xi siva mahlo, a xi voni,

xo tirhendzelekela le vugimamusi!’

₁₅“We Yobo, xana wa ha lava ku famba etindleleni ta khale,

leti vadyohi va fambeke ha tona xana?

₁₆Vona va lovisiwile va ha ri lavantshwa,

va khukhuriwile hi ndhambi ya mati.

₁₇A va ku: ‘Xikwembu a xi suke laha ka hina;

hambileswi xi nga ni matimba hinkwawo, xi nga hi endla yini ke?’

₁₈Kasi hi xona xi nga andzisa rifuwo emitini ya vona!

Makungu ya Xikwembu ma le kule na vona.

₁₉Vanhu vo lulama va swi vonile, kutani va tsaka;

lava pfumalaka nandzu va hlekula vadyohi lava.

₂₀Hakunene, valala va hina va herisiwile,

ndzilo wu hisile tinhundzu ta vona.”

₂₁“We Yobo, vuyela eka Xikwembu u va ni ku rhula,

hi kona u nga ta kuma minkateko.

₂₂Pfumela leswaku xi ku dyondzisa milawu,

u hlayisa marito ya xona embilwini ya wena.

₂₃Loko u tlhelela eka Lowa-matimba-hinkwawo, yena ú ta ku aka.

Susa leswo biha emutini wa wena.

₂₄Cukumeta nsuku wa wena wa le Ofiri eritshurini,

eka wena a wu fane ni maribye ya le nkoveni!

₂₅Xikwembu-xa-matimba-hinkwawo a xi ve nsuku wa wena,

ni silivhere ya wena leyo saseka,

₂₆kutani u ta titsakela eka xona,

u tlhela u langutana na xona.

₂₇U ta xi khongela, kutani xi ta ku twa;

u ta xi humesela leswi u tiboheke ku xi nyika swona.

₂₈Makungu lawa u ma boheke, ma ta humelela,

u ta voningeriwa tindlela.

₂₉Loko Xikwembu xi tsongahata van'wana, wena u ta ku: ‘Va lo tikurisa!’

kambe lava titsongahataka, xa va ponisa.

₃₀Hambi va ri lava nga ni nandzu, xi ta va ntshunxa,

hikwalaho ka mintirho ya wena leyi tengeke.”